|
 Rusiyanın
qabaqcıl təhsil ocaqlarından biri olan M.V.Lomonosov
adına Moskva Dövlət Universiteti (MDU) 260 illik
yubileyini qeyd edib. Əlamətdar hadisə münasibətilə
yanvarın 26-da MDU-nun akt zalında təntənəli iclas
keçirilib. Təntənəli mərasimdə Rusiya Prezidenti
Vladimir Putinin tədbir iştirakçılarına ünvanlanmış
təbrik məktubu oxunub.
Daha sonra çıxış edən MDU-nun rektoru, akademik Viktor
Sadovniçi tədbirdə çoxsaylı xarici qonaqların, ölkənin
bir sıra universitet rektorlarının, yüksək rütbəli
dövlət rəsmilərinin, Rusiya Elmlər Akademiyası
nümayəndələrinin, gələcəkdə ali məktəbin taleyini həll
edəcək və universitetin qüdrətini artıracaq
tələbələrin, aspirantların iştirak etdiyini diqqətə
çatdırıb. Ali məktəbin əsasının qoyulması zərurətinə
toxunan rektor qeyd edib ki, MDU ölkədə məhz maarifə
daha çox ehtiyacın hiss olunduğu tarixi bir dövrdə
yaradılıb. Ali məktəbin keçdiyi uzun yoldan, əldə etdiyi
uğurlardan və ali təhsil ocağının qarşısında duran
qlobal əhəmiyyətli planlardan danışan rektor qeyd edib
ki, bu gün 260 yaşlı MDU XXI əsrdə təkcə bizim ölkədə
deyil, xaricdə də ən nüfuzlu ali təhsil ocaqlarından
biridir. Dünya reytinqlərində Rusiya ali məktəbləri
arasında MDU-nun tutduğu yer də onun lider universitet
olduğunu bir daha təsdiqləyir. Onun sözlərinə görə, bu
gün MDU öz qarşısında hazırda uğurla həyata keçirilən
bir sıra mühüm vəzifələr qoyur. Viktor Sadovniçi
MDU-nun əsas nailiyyətlərini sadalayıb. Universitetdə
çox müasir, istehsal gücü 1.7 petaflops olan "Lomonosov"
superkompüteri yaradılıb. Bir qədər əvvəl inşa olunmuş
Lomonosov korpusu əsasında isə yeni mühəndis-texnik
infrastruktura yaradılıb, bu isə superkompüterlərin
gücünü 30 petaflopsa qədər artırmağa imkan verir.
Rektora görə, bütün bunlar MDU-nun bir neçə ildən sonra
bu istiqamətdə dünyada lider olacağını deməyə əsas verir.
Yubiley münasibətilə Rusiya Federasiya Şurasının sədri
Valentina Matviyenko, Rusiyanın müdafiə naziri Sergey
Şoyqu, Dövlət Dumasının sədri Sergey Narışkin, Rusiya və
bir sıra xarici universitetlərin rektorları, senatorlar,
deputatlar, səfirlər, Rusiya subyektlərinin rəhbərləri,
eləcə də hazırda kosmosda işləyən rusiyalı
kosmonavtlar Aleksandr Samokutyayev, Anton Şkaplerov və
Yelena Serova da öz təbriklərini çatdırıblar. |
