Javascript DHTML Drop Down Menu Powered by dhtml-menu-builder.com

ARXİV

14 Mart 2015 - №10

 

"Bahar, istəklimsən başdan, binadan"

 

Böyütmək üçün seçinBöyük şairimiz Səməd Vurğunun incə rübabından süzülmüş bu misra ilin ən gözəl fəsli olan bahar haqqında çoxumuzun fikir, hiss və duyğularımızı sərrast ifadə edir. Doğrudan da bahar hamının xoşladığı fəsildir. Onun hər gəlişini hamımız sevinclə, toy-bayramla qarşılayırıq. Görünür, elə Novruzu da baharın müjdəsi olduğu üçün çox sevirik. Baharın, Novruzun gəlişini ömürlərinin bahar çağını yaşayan uşaqlar daha  böyük sevinc hissi ilə qarşılayırlar. Bunu təhsil aldıqları müəssisələrdə onların hər il keçirdikləri bir-birindən maraqlı, rəngarəng bayram şənlikləri də sübut edir. Belə bayram tədbirlərindən biri martın 9-da Təhsil Nazirliyinin birbaşa tabeliyindəki İltifat Hacıyev adına "Tərəqqi" texniki-humanitar liseyində düzənlənmişdi. Şənliyi təşkil edənlər də, öz çıxışları ilə ona rövnəq verənlər də liseyin 2-ci "B" sinfinin şagirdləri idi.

Tədbirin gedişi göstərdi ki, uşaqlar sinif müəllimi və rəhbəri Aygün Baxışovanın köməyi ilə ona çoxdan və yaxşı hazırlaşıblar. Yaradıcı müəllim Aygün xanımın şənlik üçün tərtib etdiyi ssenari də maraqlı və orijinal idi.

Tədbir liseyin geniş foyesində keçirilirdi. Burada Novruz ruhunda tərtibat işləri aparılmışdı: yerə xalılar, xalçalar döşənmiş, onların üzərində mütəkkələr qoyulmuş, bayram xonçaları, səmənilər düzülmüşdü. Bir tərəfdə rəmzi bayram tonqalı "yanırdı".

Mərasim rəqslə başladı. Şagirdlərdən biri "Şuşanın dağları" mahnısının sədaları altında rəqs etdi. Aparıcılar Əli və Nuray şənliyə toplaşmış müəllimləri, valideynlərini qarşıdan gələn Novruz bayramı münasibəti ilə təbrik etdilər. Sonra əllərində bayram xonçaları tutmuş qızlar gəlib dövrə vuraraq əyləşdilər. Əli hamının gəldiyini görüb: "çay gətirilsin", - dedi. "Çay" mahnısı ifa olundu. Elton, Ayan rəqs etdilər və əllərində çaynik dövrə vurmuş, uşaqlara "çay" süzdülər.

Sonra milli geyimli uşaqların rəqsi təqdim olundu, iki qız bahar, Novruz haqqında şeirlər söylədi. Novruz bayramı, çərşənbələr, xalqımızın Novruzla bağlı adət-ənənələrindən söz açıldı.

Sonra aparıcıların dəvəti  ilə Bahar qız - Xədicə Aslanlı şənliyə gəldi, Novruz haqqında mahnı oxudu, şeir söylədi. Uşaqlar da Bahar qıza qoşulub Novruz, çərçənbələr haqqında şeirlər ifa etdilər, "ağırlığım, uğurluğum odlara", - deyərək "tonqalın" üstündən atıldılar.

Bahar qızın Novruza, onun atributlarına aid tapmacalar söyləməsi, bir qrup şagirdin fala baxması səhnəsi şənliyin ən maraqlı anları kimi yadda qaldı. Sonra meydan "Rep" musiqisinin ifaçılarına verildi. Uşaqlar bu musiqi janrının oynaq, ritmik sədaları altında bayrama aid maraqlı proqram təqdim etdilər.

Bütün Novruz  şənlikləri kimi bu mərasimdə də ən şən anlar Keçəllə Kosanın çıxışları oldu. Novruz  personajlarını Rəvan, Eldar, Əlihüseyn və Səbuhi ifa etdilər. Onlardan ikisi müasir, ikisi isə ənənəvi Keçəl və Kosa idi. Uşaqların duzlu-məzəli çıxışları tədbir iştirakçıları tərəfindən alqışlarla qarşılandı. Keçəl və Kosa yumurta döyüşdürdülər. Kosa məclisi dolanıb bayram payını yığdı. Beləcə şənlik mahnı və rəqslərin  ifası ilə davam etdi. Uşaqlar rəmzi "Qarabağ torpağı"nda məşəl yandırdılar.

Sonda "Dədə Qorqud" gəlib öyüdlərini, alqışlarını söylədi. Mərasim uşaqların müəllimləri ilə birgə rəqsilə başa çatdı.

Liseyin direktoru, əməkdar müəllim Məhbubə Məmmədova mərasim iştirakçılarını əziz bayramımız Novruz münasibəti ilə təbrik etdi, ikinci sinif şagirdlərinin öz məharətli çıxışları ilə hamıya xoş anlar yaşatdığını, təkcə öz siniflərini deyil, bütövlükdə liseylərini çox uğurla təqdim etdiklərini bildirdi. Uşaqların çıxışlarını yüksək qiymətləndirən M.Məmmədova onların bu hazırlığında Aygün müəllimin, Lalə müəllimin böyük rolu olduğunu söyləyib, onlara təşəkkür etdi.

Direktor uşaqlara bayram alqışlarını və arzularını da çatdıraraq onlara yaxşı oxumağı tövsiyə etdi, valideynlərə tədbirə qatıldıqları üçün minnətdarlığını bildirdi.

***

Martın 10-da liseydə daha bir tədbir - dahi bəstəkar Üzeyir Hacıbəylinin anadan olmasının 130 illiyinə həsr olunmuş "O olmasın, bu olsun" komediyasının səhnələşdirilmiş tamaşası oldu. Novruz ruhlu bu tədbiri liseyin II "a" sinif şagirdləri sinif müəllimi İradə İsmayılovanın rəhbərliyi və köməkliyi ilə hazırlamışdılar.

Tamaşadan öncə şagirdlər Aydan, Zəhra, Lalə əllərində Novruz xonçası şeirlər söylədilər. Kosa (Ziyadxan) və Keçəl (Emin) maraqlı çıxışları ilə tədbir iştirakçılarına xoş ovqat bəxş etdilər.

 Sonra "Almanı atdım xarala" xalq mahnısı xorla ifa olundu, Zəhra və Ələsgər rəqs etdilər, 6 qız "fala" baxdı, Kosa və Keçəl onlara papaq atıb bayram paylarını aldılar. Bir qrup qız "Bənövşə" oyununu oynadı, digər uşaqlar bahara, Novruza aid şeirlər söylədilər, mahnı və rəqslər ifa etdilər.

Tədbirin Novruza həsr olunmuş hissəsi başa çatdıqdan sonra şagirdlər Azərbaycan musiqisinin korifeyi Üzeyir Hacıbəylinin həyat və yaradıcılığı haqqında məlumat verib, "O olmasın, bu olsun" komediyasının səhnələşdirilmiş tamaşasını təqdim etdilər. Balaca Tunar (Məşədi İbad), N.Zəhra (Sənəm), E.Adilə (Gülnaz), Ələsgər (Sərvər), Kənan (Rüstəm bəy), Teymur (qoçu Əsgər), Muhəmmədhüseyn (Rza bəy), Əli (Həsən bəy) öz rollarının öhdəsindən məharətlə gəldilər.  Sərvərlə Gülnazın görüşü, Rüstəm bəylə Məşədi İbadın razılaşması, Məşədi İbadın Gülnazla tanışlığı, qonaqlıq, dava səhnəsi və s. kimi ayrı-ayrı səhnələr şəklində təqdim olunan tamaşa tədbir iştirakçılarının çox xoşuna gəldi və alqışlarla qarşılandı.

Tamaşadan sonra çıxış edənlər tədbirin hazırlanmasında İradə müəllimin böyük rolu olduğunu qeyd edib, şagirdlərə maraqlı bayram proqramı üçün minnətdarlıqlarını bildirdilər. 

Yusif ƏLİYEV,
"Azərbaycan müəllimi"

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

700 BAL TOPLAYANLAR

 
 
 

Copyright  ©  All Rights Reserved.
Created and supported by Mehman Shafagatov