Javascript DHTML Drop Down Menu Powered by dhtml-menu-builder.com

ARXİV

14 Mart 2015 - №10

 

Qarabağ həqiqətləri mövzusunda beynəlxalq konfrans

 

6-7 mart 2015-ci il tarixlərində Azərbaycan Təhsil Şurası Bakı Pedaqoji Kadrların İxtisasartırma və Yenidənhazırlanma İnstitutu ilə birlikdə "Qarabağ həqiqətlərinin böyüyən nəslə çatdırılmasının elmi-metodiki və praktik məsələləri" mövzusunda beynəlxalq elmi-praktik konfrans keçirdi.

BPKİYİ-də keçirilən elmi-təcrübi konfransı giriş sözü ilə açan rektor, professor Asəf Zamanov söylədi ki, bu gün Azərbaycanın ağrılı yeri olan Qarabağ probleminin dünya ictimaiyyətinə çatdırılması, bu məsələnin həlli istiqamətində Prezident İlham Əliyev dünya miqyasında fundamental xarakterli işlər həyata keçirir. Bütün bunlar torpaqlarımızın tezliklə işğaldan azad olunacağına böyük inam verir. Çox yaxşı haldır ki, Azərbaycan Təhsil Şurası müəllimləri bu mühüm mövzu ətrafında birləşdirmək, dünya ictimaiyyətinin diqqətini Qarabağ probleminə yönəltmək kimi əhəmiyyətli bir tədbiri həyata keçirməyi qərara almışdır. Hesab edirəm ki, bu, bizim hər birimizin vətəndaşlıq borcudur.

Azərbaycan Təhsil Şurasının sədri, professor Əjdər Ağayev müəllimlərin Qarabağ həqiqətlərinin  dünya ictimaiyyətinə çatdırılması istiqamətində bir araya gələrək fikir bildirmələri, elmi-tədqiqat xarakterli yazılarla çıxış etmələrinin təqdirəlayiq hal olduğunu dilə gətirdi. O, Təhsil Şurasının keçirdiyi elmi-təcrübi konfransın mahiyyətindən, ermənilərin Azərbaycan xalqına qarşı törətdikləri soyqırımlardan, ölkəmizə qarşı irəli sürdükləri ərazi iddialarından, işğalçılıq niyyətlərindən bəhs etdi. Söylədi ki, bu gün müəllimlərin qarşısında Qarabağ həqiqətlərinin dünya ictimaiyyətinə, eləcə də gənc nəslə çatdırılması kimi çox mühüm vəzifələr dayanır. Biz düşünürük ki, müəllimlər dərs prosesinin imkanlarından istifadə etməklə bu mühüm vəzifənin öhdəsindən gəlməlidir.

Bildirildi ki, konfrans materialları ABŞ-da və Azərbaycanda yayılması nəzərdə tutulan Azərbaycan, ingilis, rus dillərində çap olunacaq "Realities of Karabakh" adlı kitabda yer alacaq. Kitabın nəşrinin Təhsil Şurası, yayımının ABŞ Qarabağ Fondu tərəfindən həyata keçirilməsi nəzərdə tutulur.

Daha sonra çıxış edənlər Təhsil İşçiləri Azad Həmkarlar İttifaqı Respublika Komitəsinin sədr müavini, Azərbaycan Dövlət İqtisad Universitetinin dosenti Şaiq Əsgərov, professor Mirzəli Murğuzov əsrlər boyunca davam edən erməni məkrindən, onların təkcə Azərbaycana qarşı deyil, bütün türk dünyasına qarşı işğalçılıq siyasətindən bəhs etdilər.

Konfransda iştirak edən ABŞ-ın Qarabağ Fondunun icraçı direktoru xanım Diana Kohen Altman "Qarabağ həqiqətlərinin dünya ictimaiyyətinə çatdırılmasının metodoloji əsasları" mövzusunda məruzə etdi. O, məruzəsində vurğuladı ki, bu gün Azərbaycan müəllimlərinin qarşısında dayanan ən vacib məsələlərdən biri Qarabağın mədəniyyəti, incəsənəti, təhsili, ədəbiyyat tarixi, maddi-mədəni irs nümunələri və s. haqqında həqiqətə söykənən gerçəkliyi beynəlxalq ictimaiyyətə çatdırmaq, eyni zamanda bu həqiqətləri dərindən bilən gənclik formalaşdırmaqdır. Xanım Diana Altman daha sonra Qarabağ Fondunun ABŞ-da Qarabağ həqiqətləri ilə bağlı həyata keçirdiyi layihələrdən bəhs etdi.

Konfransın ikinci hissəsində tarix üzrə fəlsəfə doktoru, Bakı Dövlət Universitetinin müəllimi  Ülviyyə Əjdərqızı, Xəzər Universiteti və "Dünya məktəbi"nin tarix müəllimi Arif İbrahimovun birgə hazırladıqları  "Erməniçilik nədir və uydurma erməni soyqırımı" adlı tədris filmi (metodik-praktik) nümayiş olundu.

Martın 7-də konfrans öz işini bölmələrdə davam etdirdi.

Konfransın sonunda dünya ictimaiyyətinə müraciət-qətnamə qəbul olundu.

Martın 8-də konfrans iştirakçılarından bir qrupu Quba Soyqırımı memorial abidəsini ziyarət etdilər. 

Təhsil Şurasının Mətbuat və ictimaiyyətlə əlaqə mərkəzi

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

700 BAL TOPLAYANLAR

 
 
 

Copyright  ©  All Rights Reserved.
Created and supported by Mehman Shafagatov