Azərbaycanın
Milli Qəhrəmanı Eldar Tağızadə adına Bakıdakı 164
nömrəli tam orta məktəbdə vətənpərvərlik mövzusuna həsr
olunan tədbirlərin keçirilməsi artıq ənənə halını alıb.
Bu tədbirlər şagirdlərdə doğma vətənə, torpağa olan
məhəbbəti birə-beş artırır. Məktəbin VI b sinfində
hər həftə mütaliə günü keçirilir. Şagirdlər
Azərbaycan dili və ədəbiyyat müəllimi Təranə
Bağırovanın tərtib etdiyi ədəbiyyat siyahısına
əsasən əsərləri oxuyur, sonra onları kollektiv
şəkildə müzakirə edirlər.
Altıncılar bu günlərdə yazıçı-publisist Mustafa
Çəmənlinin Azərbaycanın Milli Qəhrəmanı Mübariz
İbrahimovdan bəhs edən "Mübariz" sənədli povestinin
müzakirəsini keçirib. "Mübariz" povestinin sözün əsl
mənasında gənclərə vətənpərvərlik hissi aşılaya biləcək
bir əsər olduğunu diqqətə çatdıran şagirdlər əsərdə
müəllifin öz qəhrəmanından nə qədər təsirləndiyini də
vurğulayıblar.
Müzakirədə məktəbin direktoru Kəmalə Qədirova,
direktor müavini Nazimə Zeynalova, Azərbaycan dili
və ədəbiyyat müəllimləri iştirak ediblər.
Altıncılar Fəxri xiyabana gedərək Azərbaycanın
Milli Qəhrəmanı Mübariz İbrahimovun və baş leytenant
Fərid Əhmədovun məzarlarını ziyarət ediblər.
Sifai SƏFƏROVA,
"Azərbaycan müəllimi" |