Aprelin 8-də paytaxtın Nizami rayonunda yerləşən 62
nömrəli məktəb-liseydə "Ən yaxşı oxucu mənəm"
layihəsinin hesabatı keçirildi. Tədbirdə məktəbin
müəllim-şagird kollektivi ilə yanaşı Bakı Şəhəri üzrə
Təhsil İdarəsinin müdir müavini Məhəbbət Vəliyeva,
Akademik Milli Dram Teatrının aktyoru, xalq artisti
Nurəddin Mehdixanlı, məktəb direktorları və digər
şəxslər iştirak edirdilər.
Tədbiri giriş sözü ilə açan məktəb-liseyin direktoru
Mətanət Cabbarlı iştirakçıları salamlayaraq tədbirin
əhəmiyyətindən danışdı. Təhsil naziri Mikayıl Cabbarovun
şagirdlərin mütaliə vərdişlərinin təkmilləşdirilməsi və
onlarda mütaliə mədəniyyətinin formalaşdırılması ilə
bağlı əmrinə əsasən tədris ocağında "Ən yaxşı oxucu
mənəm" layihəsinin həyata keçirildiyini diqqətə
çatdırdı. Layihənin tədris ili müddətində davam etdiyi
qeyd edilərək layihə çərçivəsində görülən işlərdən
danışıldı.
Sonra şagirdlərin ifasında "Əmir Teymur" tamaşası
nümayiş etdirildi, şeirlər söylənildi.
Bakı Şəhəri üzrə Təhsil İdarəsinin müdir müavini
Məhəbbət Vəliyeva çıxış edərək şagirdlərdə mütaliə
vərdişinin təkmilləşdirilməsi və formalaşdırılması
istiqamətində bir çox tədbirlər keçirildiyini, bu
tədbirin də silsilə xarakter daşıdığını nəzərə çatdırdı.
Məktəb-liseyin şagirdlərinin məharətli çıxışlarını
yüksək qiymətləndirən M.Vəliyeva tədbirdə mütaliəyə olan
fərqli yanaşma modeli nümayiş olunduğunu qeyd etdi. Belə
layihələrin və tədbirlərin uşaqların bir şəxsiyyət kimi
formalaşmasına müsbət təsir etdiyi bildirildi. Tədbirin
təşkil olunmasında zəhməti olan hər bir şəxsə
təşəkkürünü bildirən müdir müavini belə layihələrin
davamlı keçirilməsinin vacibliyini diqqətə çatdırdı.
Tədbirdə çıxış edən Akademik Milli Dram Teatrının
aktyoru, xalq artisti Nurəddin Mehdixanlı təhsil
ocağında, müəllimlərin əhatəsində olmağından böyük
məmnunluq hissi keçirdiyini bildirdi. Şagirdlərdə
mütaliə vərdişlərinin formalaşmasının çox vacib amil
olduğunu qeyd edən xalq artisti, şagirdlər tərəfindən
səhnələşdirilən tamaşanı da yüksək qiymətləndirdi.
Tədbirdə layihə çərçivəsində müxtəlif nominasiyalar üzrə
fərqlənən şagirdlərə diplom və hədiyyələr verildi.
Niyazi RƏHİMOV |