|
 Təhsil
Nazirliyinin dəstəyi ilə reallaşdırılan "Müasir
Azərbaycan Peşəkarları" layihəsinin icrası başlanandan
18 nömrəli Bakı Peşə Liseyinin müəllim və tələbə
kollektivi tərəfindən mütəmadi qaydada xeyriyyəçilik
tədbirlərinin həyata keçirilməsi ənənə halını almışdır.
Həmin tədbirlərdə tərəfdaş müəssisələr, o cümlədən də
"Bərbər" ixtisası üzrə kadr hazırlığını aparan "Eldar
Studio" şirkətinin daim yaxından iştirakı xüsusi önəm
kəsb edir.
Aprelin 4-də liseyin 20 nəfərdən ibarət Tələbə
Parlamentinin üzvləri, 10 nəfər "Bərbər" ixtisası üzrə
təhsil alan yeniyetmənin və xeyli sayda kollektiv
üzvlərinin də qatıldığı növbəti xeyriyyəçilik tədbiri
baş tutmuşdur. Əvvəlcədən aparılmış danışıqlar və
görülmüş hazırlıq işlərinin yekununda Səhiyyə
Nazirliyinin Həzi Aslanov qəsəbəsində yerləşən 4 saylı
Uşaq Vərəm Sanatoriyasında yaşayan 40-dan artıq xəstə
uşaqla görüş təşkil olunmuşdur.
İlk öncə bütün uşaqlara hədiyyələr verilmiş, lisey
tələbələrinin hazırladıqları uşaq kompozisiyası - nağıl,
rəqs proqramı göstərilmiş, viktorinalar keçirilmişdir.
Sonra "Aşpaz" ixtisası üzrə təhsil alan bir qrup tələbə
tərəfindən uşaqlara nahar süfrəsi və şirniyyat stolu
açılmışdır. Liseydə "Bərbər" ixtisasına yiyələnən
yeniyetmələr bütün uşaqlara bərbər xidmətləri göstərmiş,
onlar üçün maraqlı saç düzümləri etmişlər. Uşaq Vərəm
Sanatoriyasına zəruri dərman preparatları, ilk tibbi
yardım üçün materiallar, uşaq bezləri, geyim dəyişikləri
və sair bu kimi gündəlik tələbat malları da təqdim
edilmişdir. 7 saata yaxın müddət ərzində xəstə uşaqlarla
qurulmuş bu təmaslar onların böyük marağına, sevincinə
səbəb olmuşdur. Müəllim və tələbələrin uşaqlarla xatirə
şəkilləri çəkilmiş, sosial şəbəkələrdə ətraflı
məlumatlar, eləcə də liseyin internet saytında
(18-bpl.com) foto və video xülasələr yerləşdirilmişdir.
Göstərilmiş qayğıya və bu cür təşəbbüslərə görə
sanatoriya rəhbərliyi liseyə və Təhsil Nazirliyinə öz
səmimi minnətdarlıqlarını bildirmişdir.
Qeyd olunmalıdır ki, 18 nömrəli Bakı Peşə Liseyində
"Bərbər" ixtisası üzrə təhsil alan tələbələr artıq 3
dəfə Buzovna qəsəbəsində yerləşən 8 saylı sanatoriya
tipli internat məktəbində təhsil alan 280 nəfərə, eləcə
də digər 2 internat məktəbinin 200 nəfər valideyn
himayəsindən məhrum olmuş uşaqlarına bərbər xidmətləri
göstərmişlər. Həmin tədbirlərin davamlı xarakter
daşıması üçün Təhsil Nazirliyinin aidiyyəti strukturları
tərəfindən liseyə lazımi dəstək verilir. Bu cür
fəaliyyətin xeyriyyəçilik kimi mənəvi dəyəri ilə yanaşı,
liseydə təhsil alan tələbələrin - cəmiyyətin sabahkı
üzvlərinin, müstəqil həyata qatılacaq gənclərin,
təhsilin inkişafı üzrə Dövlət Strategiyasında nəzərdə
tutulduğu kimi, müasir tərbiyə konsepsiyası ruhunda
inkişafına da son dərəcə pozitiv təsiri xüsusi
vurğulanır. |
