Təhsil Nazirliyinin "Vətən" Respublika
İxtisaslaşdırılmış Olimpiya Ehtiyatları Uşaq-Gənclər
Futbol Məktəbinin 3 komandası Türkiyənin Alanya
şəhərində "FİFA Grassroots" proqramı çərçivəsində təşkil
edilən "Turkish Holidays. Spring Edition" beynəlxalq
futbol turnirində iştirak edib. Futbol məktəbinin
direktoru Mustafa Həsənovdan aldığımız məlumata görə,
"Evima" şirkəti tərəfindən keçirilən turnirdə Türkiyə,
Azərbaycan, Qazaxıstan, Özbəkistan, İtaliya, İspaniya,
Rusiya, Bolqarıstan və Gürcüstandan 42 komanda 8 yaş
qrupu üzrə mübarizə aparıb. Azərbaycanı 42 nəfərlik
futbolçu heyəti ilə təmsil edən "Vətən"in yetirmələri
11, 12 və 13 yaşlı idmançıların qarşılaşmasında
qüvvələrini sınayıblar.
Komandalarımız bir həftə ərzində müxtəlif ölkələri
təmsil edən rəqiblərlə mübarizə aparıblar. Onlar
arasında İspaniyanın "Selta Viqo", Türkiyənin "Beşiktaş"
komandaları da olub. Turnirin 12 və 13 yaşlılar qrupunda
komandalarımız IV yeri tutublar.
Qeyd edək ki, 5-ci dəfə keçirilən festivala "Vətən"
futbol məktəbinin komandaları ötən il də qatılıblar.
"Vətən" təmsilçiləri bu il daha uğurlu çıxış ediblər.
|