|
Ötən həftə təhsil ictimaiyyəti üçün
daha bir sevincli hadisə ilə yaddaqalan oldu. Aprelin
18-dən start götürən respublika fənn olimpiadalarının
final mərhələsi aprelin 20-də qaliblərin
mükafatlandırılması ilə yekunlaşdı. Təhsil Nazirliyinin
verdiyi məlumata əsasən, əvvəlki illərdən fərqli olaraq
bu il fənn olimpiadalarının keçirilməsində bir sıra
yeniliklər tətbiq olunmuşdu. İlk dəfə olaraq 3
mərhələdə keçirilən olimpiadanın I- rayon (şəhər)
mərhələsində 8 fənn üzrə 22000 şagird iştirak edib.
3700 şagirdin iştirakı ilə bu ildən təşkil edilən
yarımfinal mərhələsi Bakı, Sumqayıt, Gəncə, Şirvan,
Şəki, Mingəçevir, Lənkəran, Şamaxı, Ağdaş, Xaçmaz və
Naxçıvanda yerləşən 11 mərkəzdə təşkil olunub. Fənn
olimpiadalarının final mərhələsində Azərbaycanın 58
müxtəlif şəhər və rayon məktəblərindən 450 şagird
qatılıb. Əvvəlki illərdən fərqli olaraq yoxlamada
şəffaflığı və ədalətli qiymətləndirməni təmin etmək üçün
olimpiada sualları açıq şəkildə deyil, ilkin mərhələdə
test sınağı formasında tətbiq olunub. Bu il olimpiada
fənləri sırasına coğrafiya da əlavə edilib. Yarış boyu
olduqca gərgin və məsuliyyətli anlar yaşayan şagirdlər
öz bilik və bacarıqlarını nümayiş etdiriblər. Onlar
arasından yüksək biliyi, intellektual səviyyəsi ilə daha
çox fərqlənən 240 nəfər mükafatçılar sırasına daxil
olub. Daha bir yenilik isə ilk dəfə olaraq iştirakçılar
arasında hər bir fənn üzrə "Birincilərin birincisi"
nominasiyası üzrə də qaliblərin müəyyənləşdirilməsi və
beynəlxalq fənn olimpiadalarında iştirak edəcək
namizədlərin seçilməsi idi.
Aprelin 20-də "Kempinski Badamdar"
otelində təhsil naziri Mikayıl Cabbarovun, ali məktəb
rektorlarının, millət vəkillərinin , nazirliyin struktur
bölmə rəhbərlərinin, təhsil ekspertlərinin, məktəb
direktorlarının, qabaqcıl müəllimlərin, valideynlərin
və media nümayəndələrinin iştirak etdikləri respublika
fənn olimpiadalarının final mərhələsi qaliblərinin
mükafatlandırılması mərasimində onlarca yeniyetmə oğlan
və qızın ömür səhifələrinə sevincli və qürurverici anlar
yazıldı.
Aşağıda respublika fənn
olimpiadalarının ən yüksək nəticəyə -I yerə layiq
görülən qaliblərindən bir qrupu haqqında məlumatı və
onların təəssüratlarını təqdim edirik.
"Birincilərin birincisi" olduğuma görə
çox sevinirəm"
 Şahverdiyev Sirac Mübarız oğlu
2000-ci il noyabrın 1-də Cəbrayıl rayonu Böyük Mərcanlı
kəndində anadan olub. 2007-ci ildə Cəbrayıl rayonu Vüqar
Hüseynov adına Daşkəsən kənd tam orta məktəbinin I
sinfinə gedib. Hazırda həmin məktəbin VIII sinfində
təhsil alır. Bu il keçirilən respublika fənn
olimpiadalarında IX siniflərlə birlikdə iştirak edərək
yüksək nəticə göstərib. Tarix fənnindən I yerə, eyni
zamanda "Birincilərin birincisi" adına layiq görülən
Sirac bunları qeyd edir:
- Qızıl medal qazandığıma və "Birincilərin birincisi"
olduğuma görə çox sevinirəm. Bu uğurumda təhsil aldığım
məktəbimin əvəzsiz rolu var. Mən üstümdə əməyi keçən
bütün müəllimlərimin, o cümlədən də tarix fənnini
bizlərə tədris edən Aynur Həşimovanın, yüksək
təlim-tərbiyə almağımız üçün yaradılmış şəraitə görə
Vüqar Hüseynov adına Daşkəsən kənd tam orta məktəbinin
direktoru İlqar Rüstəmovun əməyini xüsusi vurğulamaq
istəyirəm.
Biz yeniyetmələrə göstərilən diqqət və qayğıya görə
cənab Prezident İlham Əliyevə minnətdarlığımı
bildirirəm. Təhsil aldığım orta məktəb Heydər Əliyev
Fondu tərəfindən təmir edilərək biz şagirdlərin
istifadəsinə verilmişdir. Buna görə Heydər Əliyev
Fondunun prezidenti, Milli Məclisin deputatı,
Azərbaycanın birinci xanımı Mehriban Əliyevaya çox sağ
ol deyirik.
Bizə göstərilən etimadı hər zaman doğrultmağa,
Azərbaycanımıza layiq övlad olacağımıza çalışacağıq.
"Özümü şanslı şagirdlərdən biri hesab
edirəm"
 Əliyev Tural İqlam oğlu
1997-ci il yanvarın 24-də Bakıda anadan olub. I-VI
sinifləri paytaxtdakı 165 nömrəli tam orta məktəbdə,
VII-X sinifləri "Dədə Qorqud" Özəl Türk Liseyində
oxuyub. Hazırda Bakı "İstək" liseyinin XI sinif
şagirdidir. Fizika fənninə böyük marağı var, VII
sinifdən bu fənni daha ətraflı, dərindən və mükəmməl
şəkildə öyrənməyə başlayıb. Fənn olimpiadalarında IX
sinifdən etibarən iştirak edir. IX sinifdə respublika
fənn olimpiadalarında III, X sinifdə I yerlərə layiq
görülüb. Tural xarici ölkələrdə keçirilən bir neçə
beynəlxalq olimpiadalarda da iştirak edib. Belə ki, X
sinifdə oxuyarkən Qazaxıstanda keçirilən
məktəblilərin X beynəlxalq fizika-riyaziyyat və
informatika olimpiadasında gümüş, Sinqapurda təşkil
olunan fizika olimpiadasında isə IV yerə layiq
görülüb. Bundan başqa Tural 86 ölkənin iştirak etdiyi
və ötən il 45-cisi keçirilən İPhO-da (beynəlxalq fizika
olimpiadası) da bürünc medala layiq görülüb. Sevinc
hissini paylaşan Tural bildirir:
- Belə bir olimpiadada iştirak etdiyimə görə özümü
şanslı şagirdlərdən biri hesab edirəm. Çoxlu sayda
şagirdin içərisindən seçilib tanınmaq hər bir kəsə
müyəssər olmur. Bu işdə müəllimlərimin və
valideynlərimin rolu danılmazdır. Məhz onların yaratdığı
şərait, verdikləri dəyərli məsləhətlər, eyni zamanda
zəhmətim sayəsində uğur əldə etdim. Mən bütün qalib
şagirdləri əldə etdikləri nailiyyət münasibəti ilə
təbrik edirəm.
Ən böyük arzusu yüksək nəticə
göstərərək ali məktəbə daxil olmaqdır
 Hacılı Nərmin Fərman qızı
1997-ci il avqustun 24-də Bakıda anadan olub. 2004-cü
ildə Bakıdakı 240 nömrəli tam orta məktəbin I sinfinə
gedib. Hazırda həmin məktəbin XI sinfində təhsil alır.
Dərs əlaçısı olan Nərmin hər zaman fəallığı ilə də
seçilir. Bu yeniyetmə qız 2014-cü ildə "Azərbaycan Hüquq
İslahatları Mərkəzi" İctimai Birliyi və "Almaniya
Beynəlxalq Əməkdaşlıq Cəmiyyəti"nin (GİZ) birgə həyata
keçirdiyi "Hüquq və mən" layihəsi çərçivəsində təşkil
olunan hüquqi təlimlərdə xüsusi fərqləndiyinə görə fəxri
fərmanla təltif olunub.
Respublikamızda keçirilən fənn olimpiadalarında da öz
bilik və bacarığını sınayan Nərmin 2011-ci ildə
biologiya, 2014-cü ildə isə coğrafiya fənləri üzrə rayon
turlarının qalibi olub. Bu il isə onun üçün daha uğurlu
və yaddaqalan oldu. Belə ki, Nərmin respublika fənn
olimpiadalarında coğrafiya üzrə I yer tutmaqla bərabər
"Birincilərin birincisi" adına da layiq görülüb.
Nərmin fənn olimpiadalarının tam şəffaf və obyektiv
keçirildiyini xüsusi qeyd edərək, biliyinə belə yüksək
qiymət verdiklərinə, onu birincilərin birincisi
seçdiklərinə görə əməyi keçən münsiflər heyətinə və
bilik yarışını gözəl səviyyədə keçirən Təhsil
Nazirliyinə təşəkkürünü bildirdi.
Qarşıda Nərmini daha bir sınaq gözləyir. II ixtisas
qrupu üzrə TQDK-nın keçirəcəyi qəbul imtahanına
hazırlaşan yeniyetmənin ən böyük arzusu yüksək nəticə
göstərərək seçdiyi ali məktəbə qəbul olunmaqdır.
"Sözün düzün desəm, birinci olmağı
gözləmirdim"
 Əliyev Cavad Əbdülhəsən oğlu
2000-ci il sentyabrın 20-də Bakı şəhərində anadan olub.
İbtidai təhsilini Bakıdakı 145 nömrəli tam orta
məktəbdə alıb. Daha sonra V sinifdə Türkiyə Dəyanət
Vəqfi Bakı Türk Liseyinə qəbul olunub. Hazırda IX
sinifdə oxuyur.
- İlk dəfə idi ki, belə bir mötəbər olimpiadada iştirak
edirdim. Coğrafiya ən çox sevdiyim fəndir. Belə bir
olimpiadanın keçirildiyini biləndə orada iştirak etmək
qərarına gəldim. Sözün düzün desəm, 1-ci olmağı
gözləmirdim və nəticələr elan olanda, adımı birincilər
siyahısında eşidəndə çox sevindim. Buna gorə, ilk
növbədə, məni dəstəkləyən valideynlərimə, təhsil aldığım
liseyin müəllimlərinə minnətdaram. Olimpiada sualları
həqiqətən də çətin idi və cavab verərkən bir qədər
düşünməli olurdum.
Bu olimpiada mənə bir sıra məqamlara xüsusi diqqət
yetirməyi öyrətdi. Gələcək illərimdə də belə
olimpiadalarda iştirak etməyi çox istəyirəm.
"Mənə olan bu yüksək etimadı
doğrultmağa çalışacağam"
 Qaralova Nərgiz Bəhram qızı
1999-cu il martın 3-də Bakıda anadan olub. 2005-ci
ildə 112 nömrəli tam orta məktəbin I sinfinə daxil
olub. Hazırda X sinifdə təhsil alır. Bu il keçirilən
respublika fənn olimpiadalarında Azərbaycan dili
üzrə yüksək nəticə göstərərək I yerə layiq görülüb.
Nərgiz Qaralova builki respublika fənn olimpiadalarının
yüksək səviyyədə keçirildiyini söyləyir:
- Fənn olimpiadalarının bütün mərhələləri obyektiv və
aşkarlıq şəraitində təşkil olunmuşdu. Təşkilati işlər
də çox yaxşı idi. Bizim üçün yaradılan şəraitə görə
Təhsil Nazirliyinin nümayəndələrinə təşəkkür edirəm.
Əldə etdiyim uğur mənim üzərimə daha bir məsuliyyət
qoydu. Mənə olan bu yüksək etimadı doğrultmağa
çalışacağam.
"Həqiqətən də olimpiada yüksək səviyyədə təşkil
olunmuşdu"
 Səmədov
İlham Hacıbala oğlu
1997-ci il dekabrın 17-də Neftçala rayonunun Kürkənd
kəndində anadan olub. Hazırda Nizami Gəncəvi adına
Neftçala şəhər 3 nömrəli tam orta məktəbin XI sinif
şagirdidir. Dərs əlaçısı olmaqla bərabər müxtəlif bilik
yarışlarında iştirak edərək uğurlar qazanıb. Respublika
fənn olimpiadalarının final turunda coğrafiya üzrə I
yeri tutaraq qızıl medala layiq görülüb.
İlham Beynəlxalq Təhsil Mərkəzinin "Araz" kurslarının
2012-ci ilin aprelində keçirdiyi bilik yarışlarında
zona birincisi, 2012-ci ilin noyabr və 2013-cü ilin mart
aylarında respublika birincisi olub. Hər zaman
fəallığı ilə seçilən yeniyetmə 2014-cü ilin avqustunda
"Ölkəmizi tanıyaq" layihəsi çərçivəsində Gəncə-Şəmkir
şəhərlərində keçirilən tədbirdə fəal iştirak etdiyinə
görə Mədəniyyət və Turizm Nazirliyinin xüsusi
sertifikatına layiq görülüb.
İlham keçirilmiş bilik yarışının və qazandığı uğurun
onun həyatında unudulmaz iz qoyduğunu söyləyir:
- Həqiqətən də olimpiada yüksək səviyyədə təşkil
olunmuşdu. Biz şagirdlərə tam obyektiv və şəffaf bir
mühitdə öz biliyimizi nümayiş etdirmək üçün geniş
imkan yaradılmışdı. Bilik və bacarığımızı nümayiş
etdirməklə bərabər oteldə qaldığımız müddətdə asudə
vaxtımızı da səmərəli və mənalı keçirdik. Bir şagird
kimi belə bir yüksək nəticə əldə etməyimlə qürur və
sevinc hissi duyuram. Nə yaxşı ki, belə bir nüfuzlu
olimpiadada iştirak etmək mənə də nəsib oldu.
"Sevinirəm ki, müəllimlərimin çəkdiyi zəhmət hədər
getmədi"
 Muradov
Fərid Cavanşir oğlu
1998-ci il avqustun 19-da Ağdam rayonunda anadan olub.
2004-cü ildə Bakı şəhərindəki 17 nömrəli məktəbin
birinci sinfinə gedib. 2011-ci ildən Avropa Azərbaycan
Məktəbində təhsil alır. XI sinif şagirdidir.
Avropa Azərbaycan Məktəbində oxuduğu illərdə bir sıra
uğurlara imza atıan yeniyetmə Azərbaycan Respublikasının
Prezidenti yanında Gənclər Fondunun keçirdiyi qrant
müsabiqəsinin qalibi olub. Rusiyada riyaziyyat üzrə
beynəlxalq distant olimpiadasında II yer tutub. 2013-cü
ildə məktəblilərarası keçirilən İnformatika Layihə
Olimpiadasında iştirak edib. 2014-cü ildə "Məqalələr
silsiləsi" adlı ilk kitabı işıq üzü görüb.
2014-cü ildə respublika fənn olimpiadalarında tarix
üzrə IV yeri tutub. Bu il isə respublika fənn
olimpiadalarında tarix fənni üzrə I yerə layiq görüldü.
Fərid fikirlərini bizimlə bölüşür:
- Keçən il yığdığım təcrübə builki olimpiadada köməyimə
çatdı. Əmin idim ki, olimpiadada qalib olacağam.
Məqsədimə nail olmaq üçün biliklərimi daha da artırmağa
başladım, tarixlə bağlı çoxlu kitablar oxuyurdum və
məktəbdə keçirilən materialları tez-tez təkrarlayırdım.
Onu da qeyd edim ki, olimpiadaya hazırlıqla bağlı
məktəbimizdə xüsusi proqram hazırlanmışdı. Həmin
proqrama uyğun olaraq şagirdlərin fənn olimpiadasında
iştirak edəcəyi fənlər üzrə intensiv hazırlıqlar
aparılırdı.
Oxuduğum təhsil ocağında mənə tarix fənnini tədris edən
Namiq Məmmədovun olimpiadada uğur qazanmağımda müstəsna
rolu vardır. Sevinirəm ki, müəllimlərimin çəkdiyi zəhmət
hədər getmədi.
Builki olimpiada öz möhtəşəmliyi ilə daha yaddaqalan
oldu. Mükafatlandırma mərasimində təhsil nazirinin
olimpiada qaliblərinə səmimi münasibəti, orada iştirak
edən millət vəkillərinin, tanınmış alimlərin, digər
nüfuzlu insanların ünvanımıza xoş sözlər söyləməsi
bizi daha da ruhlandırdı. Bizə etimad göstərən bütün
şəxslərə öz minnətdarlığımı bildirirəm. Fikrimcə, fənn
olimpiadalarında əldə etdiyimiz təcrübə gələcək
fəaliyyətimizdə mühüm rol oynayacaq.
"Oxuduğum liseyə başucalığı gətirdiyim üçün fərəh
duyuram"
 Ağayev
İsmət Fabil oğlu
1998-ci il yanvarın 8-də Quba rayonunun Çağacıq
kəndində anadan olub. Quba "İstək" liseyinin XI sinif
şagirdidir. 11 il ərzində savadlı, hazırlıqlı, nümunəvi
bir şagird kimi tanınıb. Dərs əlaçısıdır. Ən çox sevdiyi
fənn riyaziyyatdır. VII sinifdən respublikamızda təşkil
olunan olimpiadalara, IX sinifdən isə bir sıra xarici
ölkələrdə keçirilən beynəlxalq bilik yarışlarına
qatılan və müvafiq yerlərə layiq görülən İsmətin bu
sahədə kifayət qədər təcrübəsi var. O, VIII sinifdə fənn
olimpiadalarının respublika turunda I, IX sinifdə II, X
sinifdə III yerləri tutub. Bu il isə İsmət üçün daha
uğurlu olub. Belə ki, istedadlı yeniyetmə yüksək bilik
nümayiş etdirərək həm riyaziyyat fənni üzrə I yerə, həm
də "Birincilərin birincisi" adına layiq görülüb. İkiqat
sevinc hissi yaşayan İsmət deyir:
- Sevincimin hədd-hüdudu yoxdur. Çəkdiyim zəhmətin
bəhrəsini gördüm. Çoxlu sayda şagird içərisindən I yerə
layiq görülməyimlə bərabər "Birincilərin birincisi"
adını qazanmaq mənim üçün qürurvericidir. Təmsil etdiyim
rayona, oxuduğum liseyə başucalığı gətirdiyim üçün fərəh
duyuram.
Olimpiadanın keçirildiyi 3 gün ərzində qaldığımız
"Kempinski Badamdar" otelində bizim rahat işləməyimiz,
eyni zamanda asudə vaxtımızın səmərəli təşkili üçün hər
cür şərait yaradılmışdı.
Qəzetinizin mənə verdiyi imkandan istifadə edərək bütün
şagirdlər adından olimpiadanın belə gözəl və möhtəşəm
təşkili üçün təhsil naziri Mikayıl Cabbarova
minnətdarlığımı bildirirəm. Qarşıda məni daha bir sınaq
gözləyir. Yunanıstanın paytaxtı Afinada keçiriləcək
olimpiadada iştirak edəcəyəm. İnanıram ki, mənə olan
ümidləri doğruldaraq Vətənimə qələbə ilə dönəcəyəm.
"Hər bir şagirdə mənim qazandığım uğuru arzu edirəm"
 Əfəndiyev
Eldar İlqar oğlu
2000-ci il mayın 14-də Sumqayıt şəhərində ziyalı
ailəsində anadan olub. Sumqayıt şəhər Təbiət elmləri
təmayüllü gimnaziyanın IX sinfində təhsil alır. Eldar
VII sinifdə oxuyarkən riyaziyyat fənni üzrə şəhər
ikincisi, VIII sinifdə isə biologiya fənni üzrə şəhər
birincisi olub. İlk böyük uğuruna isə bu il imza
atıb. Belə ki, respublika fənn olimpiadalarında
biologiyadan həm I yerə, həm də olimpiadanın xüsusi
nominasiyası olan "Birincilərin birincisi"nə layiq
görülüb. Yeniyetmə əldə etdiyi nailiyyət barədə belə
deyir:
- İlk növbədə, valideynlərimə, yaxınlarıma, təhsil
aldığım gimnaziyanın müəllim kollektivinə bu sevinci
yaşatdığım üçün sevinir və qürur hissi keçirirəm. Təbii
ki, əldə etdiyim nailiyyət, eyni zamanda doğma təhsil
ocağımın uğurudur. Bu bilik yarışına məni hazırlayan
biologiya müəllimi Sevil Ağayevaya, sinif rəhbərimiz
biologiya müəllimi Aygün Əhmədovaya minnətdarlığımı
bildirirəm. Hər bir şagirdə mənim qazandığım uğuru arzu
edirəm. Belə olimpiadalar biz yeniyetmələrə öz
istedadımızı və yüksək biliyimizi nümayiş etdirməyə
gözəl şans yaradır.
Hazırladılar: Samirə KƏRİMOVA, Sifai SƏFƏROVA,
"Azərbaycan müəllimi"
|
