Javascript DHTML Drop Down Menu Powered by dhtml-menu-builder.com

ARXİV

2 May 2015 - №15

 

Avropa İttifaqının bir beynəlxalq layihəsi də uğurla yekunlaşıb

 

Böyütmək üçün seçinAzərbaycan  2005-ci ilin may ayında Bolonya Bəyannaməsini imzalamaqla Avropa təhsil məkanına daxil oldu. Həmin vaxtdan Avropa İttifaqının təhsil layihələrində iştirak edən ölkəmizin ali məktəbləri bir sıra uğurlara imza atıblar. Bu beynəlxalq layihələrdən biri də  2011-ci ildən İtaliyanın Genoa Universitetinin koordinatorluğu ilə həyata keçirilən "Tədris Proqramlarının Keyfiyyətinin Təmin Edilməsi üzrə Sənədləşmə" (DoQuP)  TEMPUS layihəsidir. Almaniya, Azərbaycan, Belarus, İtaliya, Qazaxıstan, Qırğızıstan və Tacikistanın 28 ali məktəbinin iştirak etdiyi layihədə ölkəmizi Bakı Dövlət Universiteti, Azərbaycan Tibb Universiteti, Xəzər Universiteti, Qafqaz Universiteti və Odlar Yurdu Universiteti təmsil edib.

Layihənin əsas məqsədi tərəfdaş ölkələrdə tədris proqramlarının  keyfiyyətinin təmin edilməsi üzrə Avropa Standartları və Əsaslarına müvafiq online sənədləşmə sisteminin müəyyən edilməsi və yerinə yetirilməsidir. Qeyd etmək yerinə düşər ki,  Bolonya prosesinin ən vacib məqsədlərindən olan online sənədləşmə tədris proqramlarının şəffaflığını təmin edir. Bundan əlavə, tədris proqramları haqqında məlumatların online yerləşdirilməsi onların milli və beynəlxalq səviyyədə müqayisəliliyi üçün də  əhəmiyyətlidir.

5 əsas standartdan ibarət olan (ehtiyac və məqsədlər, tədris prosesi, resurslar, monitorinq və nəticələr, keyfiyyət üçün idarəetmə sistemi) layihə  çərçivəsində Almatı, Bakı, Bişkek, Genoa, Bratislava, Düşənbə, Alikante, Roma şəhərlərində mühüm əhəmiyyət kəsb edən  bir sıra konfrans, treninq və seminarlar təşkil edilib. 21-22 aprel 2015-ci il tarixlərində Bişkek şəhərində keçirilən final konfransda isə tərəfdaş universitetlər görülən işlər haqqında hesabat veriblər.

Final konfransında Bakı Pedaqoji Kadrların İxtisasartırma və Yenidənhazırlanma İnstitutunun rektoru, professor Asəf  Zamanov beynəlxalq ekspert olaraq iştirak edib. Tərəfdaş ölkələrdə tədris proqramlarının keyfiyyətinin təmin edilməsi üzrə standartların müəyyənləşdirilməsi, məlumatların sənədləşməsinin metodologiya və üsullarının, məsuliyyətlərin və imkanların müəyyən edilməsi, online sənədləşmə üçün proqram təminatının layihələndirilməsi və yerinə yetirilməsi layihənin əsas nəticələri kimi qiymətləndirilib. Qərara alınmışdır ki, DoQuP layihəsinin nəticələri tərəfdaş ölkələrdə tədris proqramlarının keyfiyyətinin təmin edilməsi və keyfiyyətli idarə edilməsinin davamlı inkişafının başlanğıcı kimi qəbul edilə bilər.

Səfər çərçivəsində BPKİYİ-nin rektoru, professor Asəf Zamanov və J.Balasaqın adına Qırğız Milli Universitetinin rektoru, professor Ermek Usekeyev elm və təhsil sahəsində əməkdaşlığa dair müqavilə imzalayıblar. Müqavilədə ixtisasartırma və yenidənhazırlanma proqramlarının mübadiləsi, tələbə və dinləyicilər üçün treninqlərin təşkili, beynəlxalq layihələrdə professor-müəllim heyətinin iştirakı, beynəlxalq konfrans və simpoziumların təşkili, nəşr məhsullarının mübadiləsi və digər məsələlər nəzərdə tutulub.  

Sevinc QULİYEVA,
BPKİYİ-nin mətbuat katibi

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

700 BAL TOPLAYANLAR

 
 
 

Copyright  ©  All Rights Reserved.
Created and supported by Mehman Shafagatov