|
 Mayın
14-də Bakı Pedaqoji Kadrların İxtisasartırma və
Yenidənhazırlanma İnstitutunda "Heydər Əliyev və
Azərbaycanın intellektual potensialının inkişaf
dinamikası" mövzusunda III Respublika elmi-praktik
konfransı keçirildi. Konfransda institutun
professor-müəllim heyəti, Binəqədi Rayon Ziyalılar
Cəmiyyətinin İdarə Heyətinin üzvləri, təhsil
ictimaiyyətinin və KİV nümayəndələri iştirak edirdilər.
Heydər Əliyev muzey-lektoriyasında təşkil olunmuş
konfransda institutun rektoru, Binəqədi Rayon Ziyalılar
Cəmiyyətinin sədri, professor Asəf Zamanov "Heydər
Əliyev və Azərbaycan elmi" mövzusunda geniş məruzə etdi.
Rektor bildirdi ki, məhz Heydər Əliyevin müdrik siyasəti
nəticəsində qüdrətli müstəqil Azərbaycan dövləti
yaradılmışdır. İmzası imzalar içində olan müstəqil
dövlətimiz hazırda özünün ən uğurlu dövrünü yaşayır.
Azərbaycanın ən yeni tarixinin hər bir məqamı ümummilli
lider Heydər Əliyevin adı, həyatı və siyasi fəaliyyəti
ilə sıx bağlıdır. İllər ötdükcə biz bu həqiqəti daha
dərindən dərk edirik. Bu siyasət hazırda Azərbaycan
Respublikasının Prezidenti möhtərəm İlham Əliyev
cənabları tərəfindən uğurla davam etdirilir.
Konfransda millət vəkili, AMEA-nın müxbir üzvü, BDU-nun
kafedra müdiri, professor Bəxtiyar Əliyev "Azərbaycan
təhsil sisteminin inkişafında Heydər Əliyevin rolu",
Azərbaycan Təhsil İşçiləri Azad Həmkarlar İttifaqı
Respublika Komitəsinin sədr müavini, dosent Şaiq
Əsgərov "Heydər Əliyevin təhsil siyasəti və onun dinamik
inkişafı", vergilər nazirinin müşaviri, AMEA-nın müxbir
üzvü, professor Akif Musayev "İnnovasiya iqtisadiyyatı
və insan resursları", Yeni Azərbaycan Partiyası
Binəqədi rayon təşkilatının sədri Ramiz Göyüşov
"İntellektual potensial və Azərbaycan dövlətçiliyi",
İrəvan Dövlət Azərbaycan Dram Teatrının direktoru
İftixar Piriyev "Azərbaycan mədəniyyətinin və
incəsənətinin inkişafına Heydər Əliyev qayğısı",
BPKİYİ-nin kafedra müdiri Aydın Paşayev "Heydər Əliyev
və Azərbaycan dilçiliyinin inkişafı" mövzularında məruzə
etdilər.
Digər çıxış edənlər də Heydər Əliyev irsinin Azərbaycan
xalqı üçün böyük məktəb olduğunu vurğuladılar.
Sevinc QULİYEVA,
BPKİYİ-nin Mətbuat katibi |
