|
 Mayın
22-də Azərbaycan Milli Elmlər Akademiyası İdarəetmə
Sistemləri İnstitutunun 50 illik yubileyinə həsr olunmuş
yığıncaq keçirilib.
İnformasiya Texnologiyaları İnstitutunun akt zalında
keçirilən tədbiri AMEA-nın prezidenti, akademik Akif
Əlizadə açaraq İdarəetmə Sistemləri İnstitutunun keçdiyi
tarixi, eyni zamanda şərəfli yoldan danışıb. Qeyd
olunub ki, institut fəaliyyət göstərdiyi müddətdə
texnoloji proseslərin riyazi modelləşdirilməsi,
idarəetmə, informasiya-telekommunikasiya sistemlərinin
nəzəri, tətbiqi problemlərinin həlli, ölkə
iqtisadiyyatının müxtəlif sahələrində real nəzarət və
idarəetmə sistemlərinin yaradılması istiqamətində
akademiyanın aparıcı elmi-tədqiqat müəssisələrindən biri
kimi nüfuz qazanıb.
AMEA-nın prezidenti İdarəetmə Sistemləri İnstitutunun
mövcudluğunun ulu öndər Heydər Əliyevin adı ilə bağlı
olduğunu söyləyib. İnstitutun elmi və elmi-təşkilati
fəaliyyətində ciddi dəyişikliklərin müstəqillik illərinə
təsadüf etdiyini diqqətə çatdıran alim elmimizin dünya
elmi mühitinə inteqrasiyası zərurətinin nəticəsi kimi,
İdarəetmə Sistemləri İnstitutunun müasir elmin aktual
istiqamətlərini əhatə etmək məqsədilə müxtəlif
problemlər üzrə öz fəaliyyətini genişləndirdiyini deyib.
Qeyd olunub ki, fəaliyyətini ölkəmizin inkişaf
konsepsiyasına və yeni prioritet elmi istiqamətlərə
uyğunlaşdırmaq məqsədi ilə Nazirlər Kabinetinin 15 aprel
2014-cü il tarixli qərarı ilə Kibernetika İnstitutunun
adı dəyişdirilərək İdarəetmə Sistemləri İnstitutu
adlandırılıb.
50 illik yubileyi qeyd olunan İdarəetmə Sistemləri
İnstitutunun həmçinin Azərbaycanda informatika elminin
təşəkkülü və bu sahə üzrə yüksək ixtisaslı kadrların
hazırlanmasında əvəzsiz rol oynadığını deyən
akademiyanın rəhbəri çıxışının sonunda institutun
əməkdaşlarını təbrik edərək onlara elmi nailiyyətlər
arzulayıb.
Sonra AMEA İdarəetmə Sistemləri İnstitutunun direktoru,
akademik Telman Əliyevin "İdarəetmə Sistemləri
İnstitutunun yaranması və inkişaf mərhələləri" adlı
məruzəsi dinlənilib.
Rəhbərlik etdiyi institutun 1965-ci ildən təsis
edildiyini deyən akademik burada görülən işlərdən
danışıb. Bildirilib ki, hazırda institutun 4 şöbəsində
25 elmi-tədqiqat laboratoriyası fəaliyyət göstərir.
İnstitutda AMEA-nın 4 həqiqi üzvü, 3 müxbir üzvü, 20
elmlər doktoru, 70 fəlsəfə doktoru və elmi tədqiqatların
tətbiqi ilə məşğul olan təcrübəli elmi işçilər çalışır.
Son 10 ildə institut tərəfindən 177 iş respublikanın
müxtəlif sahələrində tətbiq edilib, 3089 elmi əsər,
(1363-ü xaricdə), 69 monoqrafiya (30-u xaricdə) çap
olunub, 39 qrant, 3 beynəlxalq, 14 Avrasiya, 14
Azərbaycan Respublikasının patenti alınıb.
Strateji əhəmiyyətli və elmtutumlu problemlərin
araşdırılmasına həsr edilmiş elmi-tədqiqatların yüksək
nəzəri səviyyədə yerinə yetirilməsinin rəhbərlik etdiyi
elm müəssisəsinin əsas hədəflərindən olduğunu deyən
direktor institutun qarşısında duran vəzifələrdən də söz
açıb.
Çıxış üçün söz alan Tələbə Qəbulu üzrə Dövlət
Komissiyasının sədri Məleykə Abbaszadə, rabitə və yüksək
texnologiyalar nazirinin müavini Elmir Vəlizadə,
Azərbaycan Memarlıq və İnşaat Universitetinin rektoru,
Milli Məclisin deputatı Gülçöhrə Məmmədova, AMEA-nın
akademik katibi, AMEA İnformasiya Texnologiyaları
İnstitutunun direktoru, akademik Rasim Əliquliyev və
başqaları yubilyar institutun uğurlu elmi
fəaliyyətindən, Azərbaycan elminə verdiyi töhfələrdən
danışıblar.
Sonra İdarəetmə Sistemləri İnstitutunun keçdiyi 50 illik
tarixi yola həsr edilmiş videofilm nümayiş olunub.
Tədbirdə iştirak edən M.V.Lomonosov adına Moskva Dövlət
Universitetinin professoru Nikolay Filimonov,
Sankt-Peterburq Arktika Akademiyasının prezidenti
Valeriy Mitko, Atom Enerjisi üzrə Beynəlxalq Agentliyin
(MAQATE) proqram təminatı şöbəsinin rəhbəri Bəxtiyar
Siracov, Türkiyənin İzmir şəhərindəki Dokuz Eylül
Universitetinin dekanı Əfəndi Nəsibov İdarəetmə
Sistemləri İnstitutunun rəhbərliyi başda olmaqla bütün
əməkdaşlarını yubiley münasibəti ilə təbrik edərək
onlara yeni-yeni elmi uğurlar arzulayıblar.
Samirə KƏRİMOVA,
"Azərbaycan müəllimi"
Foto Rəşad Ramazanoğlu |
