|
 İyunun
10-da Gəncə Dövlət Universitetində 15 iyun - Milli
Qurtuluş Günü münasibətilə təntənəli yığıncaq keçirilib.
Yığıncağı giriş sözü ilə açan universitetin rektoru,
professor Yusif Yusibov iştirakçıları bu gün
münasibətilə təbrik edərək qeyd edib ki, Azərbaycanın
dövlət quruluşunun əsasını qoyan 15 iyun - Milli
Qurtuluş Günü əslində xalqımızın milli ruhunun, milli
mənəviyyatının oyanış, dirçəliş günüdür. Rektor bildirib
ki, XX yüzillikdə ikinci dəfə dövlət müstəqilliyini əldə
edən Azərbaycanda 90-cı illərin əvvəllərində cərəyan
edən hadisələr, xaos və anarxiya AXC-Musavat
hakimiyyətinin idarəetmə səriştəsizliyini üzə çıxardı və
mövcud rejimə qarşı xalqın narazılığını artırdı. Ona
görə də 1988-ci ildən 1993-cü ilədək olan dövr
qarışıqlıq, hakimiyyətsizlik və anarxiya dövrü
adlandırılır.
1992-ci ildən 1993-cü ilin iyununadək rəhbərlərin
səriştəsizliyi ucbatından uzun illər qurub yaratdığının
tamamilə dağıdıldığını görən Heydər Əliyev Azərbaycan
xalqının təkidli tələbi ilə Bakıya qayıtmağa qərar verdi
və Azərbaycan parlamentinin 15 iyun 1993-cü il tarixli
iclasında Milli Məclisin sədri seçildi. Həmin gün Milli
Qurtuluş Günü kimi tarixə yazıldı.
Heydər Əliyevin Ali Sovetin sədri seçilməsi sadəcə
hakimiyyətə təkrar qayıdışı deyil, eyni zamanda xalqın
qurtuluş tarixidir. Bu tarixi qayıdış ilk növbədə
Azərbaycanın varlığını, müstəqilliyini, dövlətçiliyini
qoruyub saxladı, ölkəni parçalanmaqdan, vətəndaş
müharibəsindən, düşmən işğalının geniş miqyas almasından
xilas etdi.
Ümumi tarix kafedrasının baş müəllimi Nərgiz Rəsulova
"Böyük qurtuluşa aparan yol" mövzusundakı çıxışında
Milli Qurtuluş Gününün mahiyyətini tarixi faktlar
əsasında iştirakçılara çatdırıb. Ulu öndərin hakimiyyətə
yenidən qayıdışı ümumxalq qələbəsinin təntənəsi kimi
mənalandırılıb.
Sonra ulu öndərin xidmətlərindən, dövlətçiliyimiz,
müstəqilliyimiz, iqtisadi cəhətdən qüdrətli bir inkişafa
nail olmağımız yolunda gördüyü işlərdən bəhs edən
videoçarx nümayiş olunub.
Rəsmi hissədən sonra tələbələrin hazırladığı bədii hissə
təqdim olunub.
Sonda rektor Yusif Yusibov ümummilli lider Heydər
Əliyevin anadan olmasının 92-ci ildönümü münasibətilə
Bakı şəhərində keçirilən ali məktəblərin bədii
yaradıcılıq festivalında fəal iştirak etdiklərinə görə
bir qrup tələbə və müəllimə diplomlar təqdim edib.
Maqbet ƏHMƏDOV,
GDU-nun Mətbuat xidmətinin rəhbəri |
