|
 İyulun
13-də Azərbaycan Respublikasının Təhsil Problemləri
İnstitutunda Təhsil Texnologiyaları Mərkəzinin
"Müəllimlərin peşəkar hazırlığı" mövzusunda təlim
kursunun müdavimlərinə sertifikatların verilməsi ilə
bağlı tədbir keçirilib.
İnstitutun direktoru, hüquq üzrə fəlsəfə doktoru Qulu
Novruzov tədbiri giriş sözü ilə açaraq kursu
müvəffəqiyyətlə bitirən müdavimləri təbrik edib.
Q.Novruzov qeyd edib ki, "Azərbaycan Respublikasında
təhsilin inkişafı üzrə Dövlət Strategiyası"nda ikinci
əsas strateji istiqamət olan təhsil sahəsində insan
resurslarının müasirləşdirilməsi diqqət mərkəzindədir.
Müəllimlərin peşəkar inkişafına dəstək verərək
səriştəli, təcrübəli təhsilverəni formalaşdırmaq
mümkündür. Səriştəli, təcrübəli təhsilverən innovativ
metodları təhsil prosesində səmərəli tətbiq edərək,
təhsilalanların istedadını üzə çıxarır, inkişafını
izləyir və həyati bacarıqları formalaşdırır.
Təhsil Problemləri İnstitutunun Təhsil Texnologiyaları
Mərkəzində təşkil olunmuş "Müəllimlərin peşəkar
inkişafı", "Müəllimlərin işə qəbulu" mövzusunda təlim
kursları da səriştəli təhsilverənlərin hazırlığı ilə
məşğuldur. Təlimlər Təhsil Texnologiyaları Mərkəzinin
direktoru Muxtar Həsənov, Əlavə təhsilin kurikulumu
şöbəsinin müdiri Afaq Əliyeva, Monitorinq və
qiymətləndirmə şöbəsinin müdiri İlham Cavadov, Dərslik
və dərs vəsaitlərinin metodologiyası şöbəsinin müdiri
Asif Hacıyev, elmi məsləhətçi Nərminə Məmmədova və
institutun digər əməkdaşları tərəfindən aparılıb.
Sonra institutun direktor müavini, pedaqogika üzrə
fəlsəfə doktoru, dosent Ənvər Abbasov çıxış edərək
müdavimlərin təlim zamanı aldıqları biliklərin onların
nəzəri-elmi və metodiki biliklərini daha da
dərinləşdirdiyini və İKT-dən istifadə bacarıqları
formalaşdırdığını bildirib.
Müəllimlik sənətinin müqəddəsliyindən bəhs edən
Ə.Abbasov qeyd edib ki, müəllimin məktəbdə əsas sima
olması şübhəsizdir. Müəllim şagirdə yanaşma zamanı
pedaqoji və psixoloji bilik və bacarıqlara, sosial
vərdişlərə malik olmalıdır.
Ölkə təhsil sisteminin inkişafı üçün növbəti 10 il
müddətinə müəyyən olunan hədəflər arasında müəllim
peşəkarlığının yüksəldilməsi məsələsinə xüsusi yer
verilməsi də müəllimin məktəbdə oynadığı müstəsna roldan
irəli gəlir.
Dərslik və dərs vəsaitlərinin metodologiyası şöbəsinin
müdiri, pedaqogika üzrə fəlsəfə doktoru, dosent Asif
Hacıyev müdavimlərə öz üzərlərində müstəqil surətdə
işləməyi tövsiyə edib.
Təlim kursunu bitirmiş müdavimlər kurikulum, fəal təlim,
məntiq və ixtisasla bağlı bilik və bacarıqların
mənimsədilməsini özündə ehtiva edən təlimin məzmunundan
və təşkilindən razılıqlarını deyərək, bu təlimlərin
vacibliyini vurğulayıblar. Bildiriblər ki, təlim
nəticəsində müdavimlər özünü bir müəllim kimi kəşf edir
və bununla bağlı şəxsi və peşə keyfiyyətlərini inkişaf
etdirir, yaxşı müəllim olmağa çalışır və özündə etik
normalara əsaslanan davranış tərzi formalaşdırır, öz
təcrübəsinə tənqidi münasibət bəsləməyə, işinə və şəxsi
inkişafına məsuliyyətlə yanaşmağa başlayır.
Tədbirin sonunda müdavimlərə sertifikatlar təqdim
olunub. |
