Javascript DHTML Drop Down Menu Powered by dhtml-menu-builder.com

ARXİV

29 Avqust 2015 - №32

 

Xarici mətbuatdan

 

İspaniya məktəblərində şagirdlərin sayını azaltmaq istəyirlər 

Tələbə təqaüdləri isə artacaq 

İspaniyanın Təhsil  Nazirliyi orta təhsilin bütün  üç pilləsi üzrə  siniflərdə şagirdlərin sayının 20% azaldılması təşəbbüsü ilə çıxış edib. Artıq yeni tədris ilində ibtidai siniflərdə şagirdlərin sayının 25, orta  siniflərdə 30, yuxarı siniflərdə isə 35 nəfərədək  azaltmaq nəzərdə tutulur. Hələ 3  il əvvəl ispanlar  büdcə vəsaitlərinə  qənaət edilməsi məqsədi ilə  siniflərin  müvafiq olaraq beş, altı, yeddi nəfər  olaraq  əlavə komplektləşdirilməsi  məcburiyyətində qalıblar, ancaq  indi Təhsil Nazirliyində hesab edirlər ki,  ölkədə maliyyə-iqtisadi vəziyyətin yaxşılaşması ilə əlaqədar bu tədbirlərdən imtina  olunması  vaxtı çatıb.  Bundan başqa, universitet təqaüdləri  ildə  orta hesabla  100 avro artacaq, beləliklə də   orta illik məbləğ  3229 avrodan  3340 avroya qədər artacaq.  Bütünlüklə təhsilalanların təqaüdlərinin  ödənilməsi üçün büdcədə 1416 milyard avro nəzərdə tutulub ki, bu da ölkə tarixində ən yüksək göstərici hesab olunur.


Əcnəbi tələbələr Böyük Britaniyada təhsildən razılıq edirlər 

Ali məktəblərdə sorğu aparılıb            

Böyük Britaniyada oxuyan əcnəbi tələbələr  bu ölkədə  təhsil almalarından razılıq edirlər.  "University World News" saytının məlumatına görə, təhsil haqlarının qalxmasına baxmayaraq  Böyük Britaniyada təhsil əvvəlki tək  əcnəbi tələbələr üçün cəlbedicidir.  Milli tələbə sorğusuna əsasən, əcnəbi tələbələrin 86 faizi  əldə etdikləri təhsildən  razı qaldıqlarını  bildirib.  Sorğuda ölkənin 155 ali məktəbinin, 190 kollec və 5 özəl universitetinin  yuxarı kurslarının  300 min tələbəsi iştirak edib.  2014-cü illə müqayisədə tələbə məmnunluğu dəfələrlə artıb.    "Higher Education Funding Council for England" (HEFCE) şirkətinin icraçı direktoru, professor Madlen Atkinsin sözlərinə görə,  bu cür tədqiqatın aparılması  universitet və kolleclərdə tədrisin  və təhsilin keyfiyyətini  yaxşılaşdırmaq üçün ətraflı  və etibarlı məlumatlar əldə etməyə imkan verir.  Bu cür informasiyalar  həm də ali məktəb seçimində gələcək tələbələr və onların valideynləri üçün də əhəmiyyətlidir. 


Oxumaq istəyi uşağa irsən keçir 

Tədqiqatçılar bunu araşdırıblar 

Amerika alimlərinin araşdırmalarına əsasən, oxumaq istəyi uşağa irsən keçir. Əgər valideynlər öz  uşaqlıq illərində məktəbdə həvəslə oxuyublarsa, tamamilə mümkündür ki, bu keyfiyyət onların uşaqlarına da irsən keçsin.  Alimlər  doğma qardaş və bacıları olan  1594  yeniyetmənin iştirakı ilə tədqiqat aparıblar. Tədqiqatçılar  oxumaq həvəsi yaradan genləri aşkar etməyə nail olublar. Məlum olub ki, anaları ali təhsil almış uşaqların gələcəkdə daha geniş biliklər alması şansı çox yüksəkdir.  Hər iki valideyni ali təhsil almış uşaqlar orta hesabla 1,7 ildən  çox  parta arxasında vaxt keçiriblər.  Bu isə ali məktəbin 2 kursuna uyğundur.  "AERA"  jurnalının  yazdığına görə,  görünür uşaqlara təkcə genlər deyil,  həm də ali təhsilli valideynlərdən tərbiyə almaları da təsir göstərir. Əksər hallarda belə valideynlər uşaqlarına  erkən yaşlarından oxumaq hissi aşılamağa və hər hansı ixtisasın əhəmiyyəti barədə danışmağa   çalışırlar.


Rusiyada müəllimlərin vəzifə sistemi yaradıla bilər 

Müəllimlər üçün yeni imkan 

Rusiyada müəllimlərin vəzifə sistemi yaradıla bilər.  "Uçitelskaya qazeta"nın məlumatına görə,  bu barədə RF təhsil və elm nazirinin birinci müavini Natalya Tretyak bildirib.  "Belə ki,  müəllimin assistenti,  müəllim köməkçisi, müəllim,  baş müəllim, rəhbər, ekspert  kimi vəzifələr yarana bilər. Bu, onunla əlaqədardır ki, pedaqoqların bir çoxu şikayət edirlər ki,  müəllimlik peşəsində heç bir karyera yüksəlişi anlayışı yoxdur.  Baxmayaraq ki, müəllimin peşəkarlığı  onun məktəbdəki fəaliyyətinin  I  ilində  və bir neçə ildən sonra ciddi  şəkildə  fərqlənir.  Bundan başqa, müxtəlif  funksional vəzifələri də var və bu, əməkhaqlarının həcminə təsir etməlidir",- deyə nazir müavini əlavə edib.  Onun sözlərinə görə, yeni sistem daha parlaq müəllimləri  üzə çıxarmağa imkan verəcək. Nazir müavini bu yeniliyin bütün  tədris ili ərzində pedaqoji cəmiyyətdə  geniş müzakirə olunacağını deyib.


ABŞ-ın Kaliforniya ştatında uşaq bağçaları icbari olacaq 

Yeni qanun layihəsi hazırlanıb 

Kaliforniya Müəllimlər Assosiasiyasının  nümayəndələri qeyd edirlər ki, yeni dərs ilində məktəb həyatına ilk dəfə ayaq açan birincilərin əksəriyyəti əldə qələm saxlamaq iqtidarında deyil və 100-ə qədər saymağı belə bilmirlər. Əgər valideynlər ibtidai siniflərdə uşaqlarının uğur  qazanmasını istəyirlərsə,  uşaq bağçalarını icbari etmək lazımdır. Kaliforniya ştatının müəllimləri yerli məmurlarla birlikdə qanun layihəsi hazırlayıb. Qanuna əsasən uşaq bağçalarında məşğələlər bundan sonra hər bir uşaq üçün məcburi olacaq.  "Uşaq bağçaları əvvəllər birinci siniflərə alternativ olub", - deyə ştatın məktəb departamentinin nümayəndəsi Telma Beyon  bildirib.  Onun sözlərinə görə, əvvəllər məktəbəqədər təhsil müəssisələrinə gələn uşaqlara ilkin mərhələdə mahnı  oxumaq və rəsm çəkmək  vərdişləri öyrədirdilər.  Bu gün isə amerikalı müəllimlər  oxu, yazı  və  riyaziyyat kimi fənlərə  daha  çox diqqət ayırırlar.  Buna  görə də təhsilin bəhs olunan mərhələsini keçməyən birincilər üçün  ibtidai siniflərdə xeyli çətinlik yaranır.


Ukrayna 12 illik təhsilə keçir 

Yeni sistemə keçid tədricən baş verəcək 

2016-cı ildən başlayaraq Ukrayna məktəblərində təhsil 12 il davam edəcək.  Bu barədə Ukraynanın təhsil və elm naziri Sergey Kvit bildirib.  "2016-cı ildə ilk dəfə məktəbə gedəcək birincilər 12 il oxuyacaqlar", - deyən nazir  bu cür islahatın zəruriliyini  ölkənin orta  təhsil sisteminə dair mövcud narazılıqların artması ilə izah edib.  "Bizim proqramlar  şikayətlər doğurur, onlar hədsiz yüklənib və maraqsızdır", - deyə  nazir bildirib. Bununla belə o, əlavə edib ki,  mövcud 11 illik təhsil sistemindən  12 illiyə keçid tədricən baş verəcək. İlk növbədə,  məktəbin  kadr heyətinin və maddi-texniki təminatının zəruri hazırlığı  işi aparılmalıdır.

 Oruc MUSTAFAYEV,
"Azərbaycan müəllimi"
xarici mətbuat
materialları əsasında

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

700 BAL TOPLAYANLAR

 
 
 

Copyright  ©  All Rights Reserved.
Created and supported by Mehman Shafagatov