|
 Yeni
dərs ilində Lənkəran Dövlət Universitetində 2400 tələbə
oxuyacaq. Bunun 577 nəfəri bu il daxil olub. Onların
arasında 600 və daha çox bal toplayan tələbələr vardır.
Dövlət sifarişi üzrə tələbə qəbulu planı yerinə
yetirilmiş, maliyyə (qiyabi) ixtisası üzrə yeni qrup
açılmışdır.
Bütün bunlar barədə 15 sentyabr -Bilik günündə keçirilən
tədbirdə məlumat verildi. Tədbiri açan universitetin
rektoru, fizika-riyaziyyat elmləri doktoru, əməkdar elm
xadimi, professor Asəf İsgəndərov yeni dərs ilinin
başlanması münasibətilə tələbələri təbrik etdi, onlara
elm və təhsil yollarında uğurlar arzuladı.
Lənkəran Ağsaqqallar Şurasının sədri Kamal Kələntərli,
universitet valideynlər şurasının sədri Sərhad Məmmədov
çıxış edərək ürək sözlərini söylədilər.
Tələbələr adından 600-dən çox balla qəbul olunmuş Leyla
Abdullazadə və Səkinə Şabıyeva çıxış edərək yaxşı
oxuyacaqlarına, universitetin ictimai həyatında fəal
iştirak edəcəklərinə söz verdilər.
Tədbirdə universitetə yüksək balla daxil olanların bir
qrupuna tələbə bileti və hədiyyələr təqdim edildi.
Sonra universitet bədii özfəaliyyət kollektivinin
konserti oldu. Konsertdə tələbələrdən Fəridə Nağıyeva,
Şəhla Adıgözəlova, İlqar Əliyev, Elnur Valeh və
başqaları maraqlı proqramla çıxış etdilər.
Tədbirdən sonra universitetin rektoru, professor Asəf
İsgəndərov valideynləri ali məktəb həyatı ilə tanış etdi,
onları maraqlandıran suallara cavab verdi.
Bilik gününə həsr edilmiş tədbirdə rayonun elm, təhsil
müəssisələrinin və ictimaiyyətin nümayəndələri iştirak
edirdilər.
Hacı Etibar ƏHƏDOV,
LDU-nun Mətbuat və informasiya xidmətinin rəhbəri
|
