|
 "Tərbiyəçi
və müəllim kimi doğulmaq lazımdır, onları anadangəlmə
bacarıqlar idarə edir". Böyük alman mütəfəkkiri və
pedaqoqu A.Disterveqə məxsus olan bu sözlər Azərbaycan
Respublikasının əməkdar müəllimi, Bakı şəhərindəki 145
nömrəli tam orta məktəbin direktoru, gözəl insan,
bacarıqlı müəllim, həyatının mənasını yaratmaqda, gənc
nəslin təlim-tərbiyəsində görən təcrübəli təşkilatçı
Vasilçenko Nikolay Zinovyeviçin xarakter və
yaradıcılığını hərtərəfli əks etdirir.
O, ömrünün 25 ilini bizim məktəbin inkişafına həsr etmiş
və onun əməyi bir çox mükafatlarla qiymətləndirilmişdir.
Təhsilin inkişafındakı xidmətlərinə görə Nikolay
Zinovyeviç Azərbaycan Respublikasının Prezidenti
tərəfindən "Tərəqqi" medalı ilə təltif edilmişdir. Fəal
ictimai və peşəkar yaradıcılığının nəticəsidir ki, onun
adı "XXI əsrin Azərbaycan ziyalıları", "Azərbaycanın
məşhur təhsil işçiləri", " Yaxşıların yaxşısı" adlı
Fəxrı kitablara salınmışdır. Azərbaycanla Rusiya
arasındakı humanitar əlaqələrin inkişafına verdiyi
töhfəyə görə Rusiya XİN -in fərmanı ilə
mükafatlandırılmışdır. 2004-cü ildən Vasilçenko Nikolay
Zinovyeviç Beynəlxalq Pedaqoji Cəmiyyətin əlaqələndirmə
şurasının üzvü, "Moskva merinin təqaüdü" hamilik
şurasının koordinatorudur.
Bizim direktorun əqidəsi belədir: "Mən uşaqları çox
sevirəm. Mənim işim - mənim həyatımın əsas hissəsidir".
Bu, həqiqətən də belədir. Müasir dövrdə direktor olmaq
çox çətindir. Çünki direktor ətrafında hər şeyi görməli
və ən çətin gözlənilməz vəziyyətlərdə qərar çıxarmağı
bacarmalıdır. Yalnız savadlı və təcrübəli şəxs müasir
məktəbə başçılıq edə bilər. Nikolay Zinovyeviç
belələrindəndir.
Onun yaradıcılığındakı uğurlar daim axtarışda olması,
pedaqoji kollektivi də yaradıcı işə cəlb etməsidir. O,
motoidman üzrə idman ustası, SSRİ yığmasının üzvü, on
dəfə Azərbaycan çempionu, beynəlxalq dərəcəli hakim
olmuşdur.
1990-cı ildə Azərbaycanın ağır günlərində Nikolay
Zinovyeviç bizim məktəbimizə direktor təyin edildi.
Respublikamızdakı vəziyyətlə əlaqədar məktəbimizdə də
bir çox çətinliklər yaranmışdı: bir sıra fənn
müəllimlərinin və şagirdlərin sayı azalmışdı. Kollektivi
möhkəmləndirmək, nizam-intizamın, təlim-tərbiyənin
səviyyəsini yüksəltmək, məktəbdən şagird axınının
qarşısını almaq lazım idi. Məhz bu zaman təcrübə imdada
çatdı.
Vasilçenko Nikolay Zinovyeviç artıq 25 ildir ki, bizim
məktəbə başçılıq edir. Bu müddət ərzində şagird
kontingenti sürətlə yüksəlmiş, 750 nəfərdən 2018 nəfərə
çatmışdır. Bu gün məktəbin məzunları ölkənin və başqa
suveren dövlətlərin ali məktəblərinə qəbulun sayına görə
respublika məktəbləri arasında aparıcı yerlərdən birini
tutur. Müəllimlərin və şagirdlərin birgə əməyi
nəticəsində məktəbimiz Nikolay Zinovyeviçin rəhbərliyi
ilə iki dəfə "Ən yaxşı ümumtəhsil məktəbi"
müsabiqəsinin qalibi olmuşdur. Bundan əlavə, hər il
məktəbi bitirən 130-150 məzunun 6-7 nəfəri qəbul
imtahanlarında 600-dən çox bal toplayır.
2002-ci ildən başlayaraq məktəbimizin 9-11-ci sinif
şagirdləri Moskva şəhərində keçirilən MDB və Baltikyanı
ölkələri məktəblilərinin Beynəlxalq olimpiadasında
iştirak edir və yüksək nailiyyətlər qazanırlar.
Məktəbimiz bir çox göstəricilərə görə respublikanın ən
yaxşı məktəbləri sırasındadır. 2000-ci ildən Təhsil
Nazirliyinin təqdimatına əsasən 145 nömrəli məktəb
UNESCO-nun əlaqələndirmə məktəbləri sırasına daxil
edilmişdir.
Böyük pedaqoji təcrübəsindən istifadə edən Nikolay
Zinovyeviç tez-tez şəhər, respublika və beynəlxalq
konfranslarda çıxışlar edir.
Vasilçenko Nikolay Zinovyeviç böyüyən nəslin tərbiyəsinə
dair ideya və təkliflərini "Oxumaq üçün oxumalı"
kitabında bölüşüb. Bu kitabda müəllifin təşkilati
metodikanın yüksəlməsi və müəllimin yeni təlim
prosesindəki fəaliyyəti əsasında təlim-tərbiyə işinin
aparılması yollarına diqqət yetirilir.
Bizim direktor həm də fəal ictimai işlərə də vaxt tapır.
O, Azərbaycanda Rus icması sədrinin müavinidir və
dəfələrlə respublika müəllimlər qurultaylarına nümayəndə
seçilmişdir. 2012-ci ildə isə MDB müəllimlər
qurultayında respublikamızı təmsil etmişdir.
Gözəl müəllim, ata, baba olan Nikolay Zinovyeviç həm
pedaqoji kollektivin, həm də dost və əzizlərinin hörmət
və sevgisini qazanmışdır. Biz fəxr edirik ki, belə bir
insanla çiyin-çiyinə çalışırıq.
70 illik yubileyi ərəfəsində biz Nikolay Zinovyeviçə
möhkəm cansağlığı, yeni yaradıcılıq axtarışları, gənc
nəslin tərbiyələndirilməsi işində və Azərbaycanın
çiçəklənməsi naminə böyuk uğurlar arzulayırıq.
Əziz Nikolay Zinovyeviç! Yaş artsa da qoy qəlbiniz
həmişə gənc olaraq qalsın. Uğurlar sizi kölgə kimi
izləsin, çətinlikləri arxada qoyub irəlidə sonsuz
sevinclər dadasınız.
Sitarə MÜRSƏLBƏYOVA,
Bakı şəhəri E.Quliyev adına 145 nömrəli tam orta
məktəbin müəllimi |
