|
Naxçıvan şəhərindəki Heydər Əliyev adına tam orta
məktəbdə Naxçıvan Muxtar Respublikası Təhsil Nazirliyi,
Heydər Əliyev adına tam orta məktəb və Naxçıvan Dövlət
Universitetinin birgə təşkilatçılığı ilə 5 oktyabr -
Beynəlxalq Müəllimlər Günü münasibətilə tədbir keçirilib.
Əvvəlcə tədbir iştirakçıları ulu öndərimizin məktəbin
ərazisində ucaldılan abidəsi önünə gül dəstələri
qoyublar.
Məktəbin iclas zalında keçirilən tədbiri giriş sözü ilə
təhsil ocağının direktoru, Azərbaycan Respublikasının
əməkdar müəllimi Namiq Məmmədov açaraq bu günün tarixi
haqqında geniş məlumat verib, həyatını xalqın işıqlı
gələcəyinə həsr edən müqəddəs peşə sahiblərini təbrik
edib.
Naxçıvan Muxtar Respublikası təhsil nazirinin müavini
Məmməd Qəribov bildirib ki, ümummilli liderimiz Heydər
Əliyev elmin, təhsilin inkişafını, geniş dünyagörüşə
malik, savadlı və intellektual gənc nəslin
yetişdirilməsini dövlət siyasətinin prioritet istiqaməti
kimi müəyyənləşdirmişdir. Ümummilli liderimizin layiqli
davamçısı Azərbaycan Respublikasının Prezidenti cənab
İlham Əliyev də təhsilin inkişafını dövlətin qarşısında
duran ümdə vəzifə kimi qəbul edərək müəllimlərə qayğıkeş
münasibət göstərir. Dövlət başçısının rəhbərliyi ilə
ölkəmizdə ixtisaslı müəllim kadrların hazırlanması,
müəllimlərin sosial vəziyyətinin yaxşılaşdırılması
istiqamətində ardıcıl tədbirlər görülür. Vurğulanıb ki,
ölkəmizdə son illərdə təhsilin inkişafı ilə bağlı həyata
keçirilən kompleks tədbirlər, Prezident İlham Əliyevin
bu amili dövlət siyasətinin mühüm prinsipləri sırasına
daxil etməsi, təhsil işçilərinə hərtərəfli qayğı
dövlətin öz gələcəyini daha etibarlı və inamlı görmək
əzmindən xəbər verir. Muxtar respublikada müəllim
əməyinin qiymətləndirilməsinin daim diqqət mərkəzində
saxlanıldığını nəzərə çatdıran təhsil nazirinin müavini
vurğulayıb ki, Naxçıvan Muxtar Respublikası Ali Məclisi
Sədrinin "Naxçıvan Muxtar Respublikasının dövlət ümumi
təhsil müəssisələrində çalışan, bilik və bacarıqlarının
qiymətləndirilməsi aparılan müəllimlərin dərs yükünün və
əməkhaqqının artırılması haqqında" 2015-ci il 22 iyun
tarixli sərəncamı müəllim əməyinə, ümumilikdə, təhsilə
göstərilən dövlət qayğısının bariz nümunəsidir.
"Hər birimizdə müəllimin hərarətli qəlbinin bir
zərrəciyi var. ...Mən dünyada müəllimdən şərəfli ad
tanımıram", -deyən ümummilli lider Heydər Əliyev
Azərbaycana rəhbərlik etdiyi bütün illərdə müəllim
əməyini yüksək qiymətləndirib, onlara böyük hörmətlə
yanaşıb, təhsil işçilərinin maddi vəziyyətinin, rifah
halının yaxşılaşdırılmasının qayğısına qalıb". Bu
fikirləri universitetin tədris işləri üzrə prorektoru,
filologiya üzrə fəlsəfə doktoru, dosent Surə Seyid
çıxışında vurğulayıb. Natiq bildirib ki, müəllim
əməyinin nəticəsində cəmiyyət formalaşır, savadlı,
bilikli, dünyagörüşlü, nümunəvi əxlaqa malik insanlar
yetişir.
Heydər Əliyev adına tam orta məktəbin Azərbaycan dili və
ədəbiyyat müəllimi, Naxçıvan Muxtar Respublikasının
əməkdar müəllimi Gülşən Fətullayeva, Heydər Əliyev adına
tam orta məktəbin məzunu, Naxçıvan Dövlət
Universitetinin tələbəsi Xeyrənsə Səfərova çıxış
ediblər.
Sonda dahi rəhbərin adını daşıyan orta məktəbin bir qrup
müəllimi pedaqoji fəaliyyətindəki uğurlara görə Fəxri
fərmanla təltif olunub, həmçinin təhsil ocağının
şagirdləri müəllimə həsr olunmuş şeirləri bədii qiraət
ediblər.
Mina QASIMOVA,
NDU-nun Mətbuat şöbəsinin əməkdaşı |
