|
 Oktyabrın
15-də Bakı Slavyan Universiteti nəzdində yaradılmış
Germanistika İnstitutunun açılış mərasimi keçirilib.
Azərbaycan və Almaniya Federativ Respublikasının
Dövlət himnlərinin səsləndirilməsi ilə başlanan tədbiri
giriş sözü ilə açan BSU-nun rektoru, professor Asif
Hacıyev qonaqları salamlayaraq ali təhsil müəssisəsində
slavyan dilləri ilə yanaşı alman dili və mədəniyyətinə
göstərilən diqqət, bu sahədə həyata keçirilən layihələr
barədə məlumat verib. Rektor bildirib ki, akademik Kamal
Abdullayev və professor Ziqlinde Hartmannın birgə həyata
keçirdikləri “Kitabi-Dədə Qorqud” və “Nibelunqlar
haqqında nəğmə”: Ortaçağ qəhrəmanlıq dastanlarında Şərq
və Qərb” və digər irimiqyaslı layihələr bu sahədə
qazanılan uğurlu nailiyyətlərdir. Germanistika
İnstitutunun yaradılmasının əhəmiyyətindən danışan
A.Hacıyev bu institutun açılmasını Bakı Slavyan
Universitetinin Almaniyanın bir çox tanınmış
universitetləri ilə əlaqələrin möhkəmlənməsində mühüm
rol oynayacağını vurğulayıb.
Vürtsburq Universitetinin professoru və Osvald fon
Volkenştayn Cəmiyyətinin prezidenti, BSU-nun rektorunun
müşaviri və fəxri professoru xanım Ziqlinde Hartmann
uzun illərdən bəri əməkdaşlıq etdiyi Bakı Slavyan
Universiteti barədə xoş təəssüratlarını bölüşüb.
Mütəmadi olaraq BSU-da alman ədəbiyyatından silsilə
mühazirələr oxuyan xanım Hartmann onun və Augsburg
Universitetinin müəllimi Janina Franzke ilə birlikdə
Azərbaycana ezam olunduqları üçün BSU rəhbərliyinə
minnətdarlığını bildirib. Germanistika İnstitutunun
yaradılmasını BSU ilə Almaniyanın ali təhsil ocaqları
arasındakı münasibətləri daha da gücləndirəcəyinə
ümidvar olduğunu deyib.
Almaniya Federativ Respublikasının Azərbaycandakı
fövqəladə və səlahiyyətli səfiri xanım Hadrun Tempel
çıxışında Bakı Slavyan Universitetinin alman dili və
mədəniyyətinə böyük maraq göstərməsini yüksək
qiymətləndirib və xüsusilə qeyd edib ki, BSU
germanistikanın tədrisində aparıcı müəssisədir. Səfir
Germanistika İnstitutunun açılması münasibəti ilə
universitet rəhbərliyini və professor-müəllim
kollektivini təbrik edib, onlara uğurlar arzulayıb.
Tədbirdə iştirak edən Avstriya Respublikasının
Azərbaycandakı fövqəladə və səlahiyyətli səfiri cənab
Aksel Vexin BSU-da alman dili və ədəbiyyatının yüksək
səviyyədə tədrisi və tələbələrin bu dili asanlıqla
mənimsəməsinə heyranlığını dilə gətirib.
“Alman dili xarici dil kimi” bölməsinin
koordinatoru Aleksandr Eşer Bakıda həyata keçirilən
alman məktəbi layihəsi ilə bağlı görülən işlərdən,
həmçinin reallaşdırılacaq digər tədbirlərdən söz açıb.
Bildirilib ki, layihəyə əsasən BSU nəzdində fəaliyyət
göstərən Məktəb-Lisey Kompleksinin (MLK) şagirdləri bir
il müddətində təhsil almaq məqsədi ilə Almaniyaya gedir,
orada alman ailəsinin qonağı olurlar. Bu, şagirdlərin
alman dilini daha yaxşı öyrənmələrinə imkan yaradır.
Universitetin alman filologiyası kafedrasının
müdiri, dosent Sevinc Rzayeva Germanistika İnstitutu və
onun vəzifələri barədə məlumat verib.
Filologiya fakültəsinin dekanı, professor Zemfira
Vəliyeva fakültənin yaranma tarixi və alman
filologiyası kafedrasının fəaliyyətindən söhbət açıb.
Mərasimdə BSU-nun alman filologiyası üzrə təhsil
alan tələbələri və MLK şagirdlərinin ifasında alman
dilində şeir və mahnılar səsləndirilib. Tədbirin sonunda
BSU nəzdində Məktəb-Lisey Kompleksinin Almaniyada təhsil
alan şagirdləri sertifikat və hədiyyələrlə
mükafatlandırılıblar.
BSU-nun Mətbuat xidməti |
