|
Gəncədə keçirilən “Aqrar elmin və təhsilin innovativ
inkişafı: dünya təcrübəsi və müasir prioritetlər”
mövzusunda beynəlxalq konfransa yekun vurulub. Son
toplantıdan əvvəl Azərbaycan Dövlət Aqrar Universiteti (ADAU)
ilə Fransanın Rouen və Türkiyənin Namiq Kamal
universitetləri arasında əməkdaşlıq müqaviləsi
imzalanıb.
Beynəlxalq təcrübələrin öyrənilməsinə, tələbə-müəllim
mübadiləsinə, nəzəriyyə ilə praktikanın
uyğunlaşdırılmasına yol açan müqavilə dünyada ərzaq
təhlükəsizliyi, problemlər və onun həlli yollarında iş
birliyini təmin edəcək.
ADAU-nun rektoru, professor, AMEA-nın müxbir üzvü
İbrahim Cəfərov deyib ki, universitetimiz aqrar bölmənin
inkişafının tənzimlənməsində başlıca rol oynayır və
sözügedən sahənin inkişafını elmi cəhətdən tənzimləyir,
yüksək ixtisaslı kadrların hazırlığı hesabına nəzərdə
tutulan işlərə elmi baxımdan təkan verir. Eyni zamanda
ADAU bu cür konfranslarla xarici əlaqələrini
genişləndirir, mütərəqqi metodların təhsilə tətbiqini
reallaşdırır, texniki imkanlarını müasirləşdirir,
bütövlükdə aqrar elminin əsaslı bazaya söykənməsi üçün
ən vacib tədbirlər həyata keçirir.
3 gün davam edən beynəlxalq konfransda 16 xarici
dövlətdən 73 alim qatılıb və 300-ə yaxın məruzə
dinlənilib. Həmin məruzələr əvvəlcədən kitab şəklində
çap edilib və iştirakçılara təqdim olunub.
ABŞ-ın İllinoys Universitetinin professoru Mohammad
Babadost, Rusiya Dövlət Qiyabi Aqrar Universitetinin
rektoru, professor Vladimir Dubovik və digər elm
xadimləri konfransın səmərəliliyinin artırılması üçün
alimlər arasında əməkdaşlığın genişləndirilməsinin
vacibliyini bildiriblər.
Qalib RƏHİMLİ,
Mətbuat xidmətinin rəhbəri |
