|
 Tələbələrinin,
xüsusən də gələcək ibtidai sinif müəllimlərinin geniş
dünyagörüşlü, milli-mənəvi dəyərlər daşıyıcısı və
ötürücüsü kimi hazırlanmasına böyük önəm verən və bu
məqsədlə təşkil etdiyi orijinal məzmunlu və formalı
tədbirləri ilə zaman-zaman həm tələbələrdə, həm də
iştirak edən qonaqlarda dərin təəssürat yaradan
Azərbaycan Dövlət Pedaqoji Kolleci noyabrın 18-də
növbəti belə bir tədbir - ümumrespublika konfransı
keçirdi. “Təhsil: milli mühit, milli ruh,
istiqamətlər, nəticələr” kimi zamanımız üçün çox aktual
mövzuya həsr olunmuş ümumrespublika konfransında Yasamal
Rayon İcra Hakimiyyətinin başçısı İbrahim Mehdiyev, YAP
Yasamal rayon təşkilatının sədri Tağı Əhmədov, Təhsil
Nazirliyinin İlk peşə və orta ixtisas təhsili şöbəsinin
müdiri Samir Vəliyev, şöbənin baş məsləhətçisi Ənvər
İmanov, Milli Məclisin üzvü Aqiyə Naxçıvanlı, Ailə,
Qadın və Uşaq Problemləri üzrə Dövlət Komitəsinin sədr
müavini Sədaqət Qəhrəmanova, “Kaspi” Təhsil Mərkəzinin
rəhbəri, “Kaspi” qəzetinin təsisçisi Sona Vəliyeva,
orta ixtisas və orta ümumtəhsil məktəblərinin
rəhbərləri, tanınmış ziyalılar, KİV təmsilçiləri iştirak
edirdilər.
İştirakçılar öncə kollecin birinci mərtəbəsinin foye və
dəhlizində təşkil olunmuş tələbələrin əl işlərindən və
rəsmlərindən ibarət sərgi ilə tanış oldular, Heydər
Əliyev Muzeyinə baxış keçirdilər, sonra müxtəlif
fənlərdən ayrı-ayrı qruplarda keçilən dərslərdə iştirak
etdilər.
Kollecin akt zalında keçirilən ümumrespublika
konfransını bu təhsil ocağının direktoru, filologiya
elmləri doktoru, professor Nurlana Əliyeva açaraq
iştirakçıları salamladı və tədbirin aktuallığını
vurğuladı. Sonra professor N.Əliyeva “Təhsil: milli
mühit, milli ruh, istiqamətlər, nəticələr” mövzusunda
geniş məruzə etdi. Zala toplaşanlar tərəfindən diqqətlə
dinlənilən məruzəsində Nurlana Əliyeva öncə ulu öndər
Heydər Əliyevin indi Azərbaycanın təhsil sisteminin
xalqımızın tarixinə, milli-mənəvi dəyərlərinə,
adət-ənənələrinə uyğun qura bilməyimizin
müstəqilliyimizin bizə verdiyi ən böyük töhfə olması
barədəki müdrik fikrini xatırladaraq, bunun doğrudan da
çox böyük və qiymətli bir töhfə olduğunu son illər bütün
səviyyələrdən olan təhsil müəssisələrinin fəaliyyətinin
də sübut etdiyini söylədi. Bildirdi ki, bu gün ölkəmiz
təkcə iqtisadi-siyasi sabitliyinə, inkişaf tempinə görə
deyil, həm də milli-mənəvi dəyərlərinə, mentalitetinə
görə bir çox dövlətlərin diqqətini cəlb edir. Xalqımızın
özünəməxsus dünyagörüşü, zövqü, qabiliyyəti,
qonaqpərvərliyi və digər çoxlu müsbət xüsusiyyətlərini
son illər Azərbaycanda təşkil olunan bir sıra
beynəlxalq tədbirlərin xarici ölkələrdən olan
iştirakçıları da dəfələrlə qeyd və etiraf etmişlər.
Professor N.Əliyeva məruzəsində milli-mənəvi dəyərlərin
gənc nəslə ötürülməsində bu dəyərlərin beşiyi olan
məktəblərin üzərinə böyük vəzifə və məsuliyyət düşdüyünü
söylədi. Bu işdə ibtidai sinif müəllimlərinin rolunun
xüsusilə böyük olduğunu deyən N.Əliyeva onları gələcək
nəsillərin bünövrəsini qoyan insanlar kimi
səciyyələndirdi. Qeyd etdi ki, ibtidai sinif müəllimləri
öz siması, danışığı, geyimi, ünsiyyəti, insanlarla təmas
qurmaq bacarığı, istedadı, qabiliyyəti, sadəliyi və bu
sadəlikdə aliliyi, dövlətçiliyə sədaqəti ilə
yetirmələrinə örnək, bu keyfiyyətləri onlara ötürən şəxs
olduğundan onların hazırlığına xüsusi diqqət
yetirilməli, gənc müəllimlərin işə qəbulu zamanı
təcrübəli müəllimlərin onlarla müsahibələr aparması
təşkil olunmalıdır. N.Əliyevaya görə, ibtidai sinif
müəllimlərinin mənəvi keyfiyyətləri, vətənpərvərliyi o
qədər yüksək mövqedə inkişaf etmiş olmalıdır ki, onlar
bizim gələcəyimiz olan balalarımızı gözəl vətəndaşlar
kimi yetişdirə bilsinlər.
Məruzəçi milli-mənəvi dəyərlərin qorunması, təbliği,
gələcək müəllimlərə aşılanması istiqamətində kollecdə
aparılan işləri, xüsusən də ümummilli lider Heydər
Əliyevin 2000-ci ildə milli-mənəvi dəyərlərimizin
qorunması və inkişafı ilə bağlı verdiyi bəyanatdan sonra
həyata keçirilən silsilə tədbirləri diqqətə çatdırdı,
bugünkü konfransın da həmin silsilədən növbəti tədbir
olduğunu söylədi.
Sonra konfransda uşaq ədəbiyyatının tanınmış
nümayəndəsi, filologiya elmləri doktoru, professor Zahid
Xəlil “Uşaq ədəbiyyatının milli ruhun oyanmasına təsiri”
mövzusunda məruzə etdi. Milli-mənəvi dəyərlərin gənc
nəslə ötürülməsində anaların rolunu xüsusi qeyd edən
alim-şair ana-övlad münasibətlərinin ədəbiyyatımızda
kifayət qədər öz əksini tapdığını bildirdi. Uşaqlarda
milli ruhu qaldırmaq üçün onlara belə ruhlu bədii
əsərləri mütaliə etdirməyi vacib saydı.
Kollecin III-IV kurs tələbələrinin “Milli dəyərlərimiz
nəsillərdən nəsillərə” mövzusunda nümayiş etdirdikləri
maraqlı kompozisiya konfrans iştirakçıları tərəfindən
alqışlarla qiymətləndirildi. Kompozisiyada milli-mənəvi
dəyərlər və onların gənc nəslə aşılanması haqqında
kəlamlar, o cümlədən bu məsələyə öz fəaliyyətlərində
xüsusi önəm verən ulu öndər Heydər Əliyevin, Azərbaycan
Respublikasının Prezidenti İlham Əliyevin müdrik
fikirləri öz əksini tapmışdı.
Konfransın digər məruzəçisinin - TPİ-nin baş elmi
məsləhətçisi, pedaqoji elmlər doktoru, professor Vidadi
Xəlilovun “Gənclərin milli ənənələr, mütaliə, virtual
aləm təfəkkürünün formalaşması prosesində məktəbin və
ailənin rolu” mövzusunda çıxışı da iştirakçılarda böyük
maraq doğurdu.
Sonra kollecin IV kurs tələbəsi Aygün Paşazadə məktəbin
milli mühitin beşiyi olması barədə qənaətlərini təhsil
aldığı müəssisənin təcrübəsi əsasında dinləyicilərlə
bölüşdü.
Tədbirin sonunda çıxış edən Yasamal Rayon İcra
Hakimiyyətinin başçısı İbrahim Mehdiyev konfransı yüksək
dəyərləndirdi, onun müzakirə etdiyi məsələnin hazırda
cəmiyyətdə hər kəsi düşündürdüyünü söylədi. Kollecdəki
ab-havadan, xüsusən də konfransdan böyük təəssüratlar
aldığını, burada həmişə yüksək səviyyəli tədbirlərin
keçirilməsinə şahid olduğunu deyən icra başçısı bütün
bunlara görə kollecin rəhbərliyinə, müəllim və
tələbələrinə təşəkkür etdi.
Konfransı yekunlaşdıran professor Nurlana Əliyeva onun
iştirakçılarına fayda verəcəyinə əminliyini ifadə etdi
və qonaqlara minnətdarlığını bildirdi.
Yusif ƏLİYEV,
“Azərbaycan müəllimi”
foto Rəşad ZİYADOV |
