|
Qədim və müasir Qəbələ şəhəri məktəbliləri heyran edib
 Prezident
İlham Əliyevin tapşırığı ilə respublikamızın ümumtəhsil
məktəblərinin yuxarı sinif şagirdləri üçün təşkil edilən
növbəti tur-aksiya çərçivəsində Abşeron, Qusar, Quba,
Sumqayıt, Xaçmaz və Xızıdan olan məktəblilər noyabrın
17-də Qəbələ rayonuna səfər ediblər.
AZƏRTAC xəbər verir ki, İsmayıllı-Qəbələ-Şəki marşrutu
üzrə keçirilən tur-aksiyada iştirak edən məktəblilər
Qəbələnin tarixi abidələri, turizm obyektləri, mənzərəli
guşələri, adət-ənənələri, eləcə də son illər inşa edilən
istehsal müəssisələri və sosial obyektləri ilə tanış
olublar.
Altı rayonu təmsil edən 210 nəfər məktəblinin Qəbələ ilə
ilk tanışlığı “Tufandağ” Qış-Yay Turizm İstirahət
Kompleksindən başlayıb. Bölgənin ən çox turist qəbul
edən bu obyekti ilə tanışlıq zamanı şagirdlərə
kompleksin tikintisinin birinci mərhələsi çərçivəsində
dörd kanat xəttinin inşa olunduğu, 10 xizək yolundan
5-də tikinti işlərinin başa çatdığı, turistlərin
istirahətinin təşkili üçün hər cür şəraiti olan
restoranların açıldığı, bütün dağ-xizək trasının süni
qaryağdıran generasiya sistemi ilə təchiz edildiyi və
gün ərzində kompleksdə 3 min nəfərə xidmət
göstərilməsinin mümkünlüyü barədə məlumat verilib.
Sonra şagirdlər rayon tarix-diyarşünaslıq muzeyində 900
il Qafqaz Albaniyasının paytaxtı olmuş qədim Qəbələ
şəhərinin tarixi, mədəniyyəti və etnoqrafiyası haqqında
məlumat əldə ediblər. Onlara bildirilib ki, muzeyin əsas
fondunda Qəbələnin 2500 illik tarixini əks etdirən 12
mindən çox tarixi və elmi əhəmiyyətə malik eksponat
mühafizə olunur.
Heydər Əliyev Mərkəzini ziyarət edən məktəblilər burada
ulu öndərin həyatını və siyasi fəaliyyətini əks etdirən
fotoşəkillər və sənədlərlə tanış olublar.
“Beltmann” piano fabrikində istehsal prosesi ilə
yaxından tanış olan tur-aksiyanın iştirakçılarının
diqqətinə çatdırılıb ki, müəssisədə dünyada məşhur olan
“Beltmann” markalı pianolar istehsal olunur.
Heydər Əliyev adına Konqres Mərkəzi ilə tanışlıq zamanı
məlumat verilib ki, 1200 yerlik mərkəz üç mərtəbədən
ibarətdir. Birinci mərtəbədə zallar, 350 yerlik restoran
və inzibati otaqlar yerləşir. Çoxfunksiyalı konfrans
zalı isə ikinci mərtəbədədir. Konfrans zalı qısa müddətə
başqa məqsədlər - konsert, iclas üçün kresloların aşağı
enməsi ilə müstəvi halına keçə bilir.
Daha sonra Nic qəsəbəsinə səfər edən şagirdlər buradakı
“Cotari” Alban kilsəsinə böyük maraqla baxıblar. Məlumat
verilib ki, kilsə tarixi baxımdan ən qədim və
əhəmiyyətli abidələrdən biridir. Nic qəsəbəsi
tolerantlığın kiçik bir modeli hesab edilir. Həmçinin
şagirdlər Çuxur Qəbələ kəndində qədim Qəbələ şəhərinin
xarabalıqları və ərazidə aparılan arxeoloji qazıntıların
nəticələri ilə tanış olublar.
Şagirdlər Qəbələyə səfərlərinin sonunda beşulduzlu
“Qafqaz Riverside”, “Qafqaz Yeddi gözəl” otelləri,
“Qəbələnd” İstirahət və Əyləncə Mərkəzi, rayonda
yaradılan müasir turizm infrastrukturu, bölgənin
füsunkar təbiəti, eləcə də Nohur gölü ilə tanış olub,
istirahət edib, əylənib və xatirə şəkilləri çəkdiriblər.
Sonda məktəblilər səfər zamanı qədim və müasir Qəbələ
şəhərini heyranlıqla seyr etdiklərini bildirib, xoş
təəssüratlarla Şəki şəhərinə yola düşüblər.
Cənub bölgəsi ilə tanışlıq şagirdlərdə zəngin təəssürat
yaradıb
 “Ölkəmizi
tanıyaq” tur-aksiyasının iştirakçısı olan Gəncə, Göygöl,
Şəmkir, Samux, Gədəbəy rayonlarının məktəbliləri
noyabrın 17-də Lənkəran rayonunda olublar.
AZƏRTAC xəbər verir ki, Lənkəranla tanışlığa Bayraq
Meydanından başlayan şagirdlər üçrəngli bayrağımızın
önündə Azərbaycanın Dövlət himnini ifa etdilər.
Lənkəran şəhərindəki “Qoşa Qala qapıları”, “Dairəvi qala”,
“Mayak” binası ilə tanışlıq məktəblilərin böyük marağına
səbəb oldu.
Daha sonra tur-aksiyanın iştirakçıları iki dəfə Sovet
İttifaqı Qəhrəmanı, tank qoşunları general-mayoru Həzi
Aslanovun abidəsini ziyarət edib, onun Lənkəran
şəhərindəki ev-muzeyində nümayiş etdirilən eksponatlarla
tanış olublar. Burada şagirdlərə Həzi Aslanovun İkinci
Dünya müharibəsində keçdiyi döyüş yolu barədə ətraflı
məlumat verildi.
Məktəblilər rayondakı “Xanbulan” istirahət mərkəzinə və
“Hirkan” Milli Parkına da səyahət etdilər. Məlumat
verildi ki, sahəsi 21,435 hektar olan “Hirkan” qoruğu
2004-cü ildə “Hirkan” Milli Parkına çevrilib. Milli park
Astara və Lənkəran rayonlarının ərazisinin bir hissəsini
tutur.
Məktəblilər, həmçinin rayondakı konserv kombinatında
texnoloji prosesləri yaxından izləyiblər.
Həmin gün tur-aksiyanın Qazax, Ağstafa və Tovuz
rayonlarından olan iştirakçıları Lerik və Astara
rayonuna səyahət ediblər.
Məktəblilər Lerikdə Heydər Əliyev Mərkəzində,
Tarix-Diyarşünaslıq Muzeyində və Uzunömürlülər Muzeyində
nümayiş etdirilən eksponatlar və fotoşəkillərlə, “Relax”
turizm və istirahət mərkəzində yaradılan şəraitlə
yaxından tanış olublar.
Lerikdən sonra Astaraya səfər edən məktəblilər rayonda
fəaliyyət göstərən “Astaraçay” fabrikində istehsal
prosesini izləyib, Heydər Əliyev Mərkəzində ulu öndərin
zəngin və mənalı ömür yolunu əks etdirən eksponatlar və
fotoşəkillərlə tanış olub, Astara şəhərində Xəzər dənizi
sahili boyu 8 hektar ərazidə salınmış park-bulvar
kompleksində gəziblər.
Məktəblilər, həmçinin Astara rayonunun Ərçivan
qəsəbəsində “Yanar bulaq”da suyun necə yandığını böyük
maraqla izləyiblər.
Cənub bölgəsinə səyahəti həmişə xatırlayacaqlarını
bildirən məktəblilər tur-aksiyanın onlarda zəngin
təəssürat yaratdığını vurğulayıblar.
Astara ilə tanışlıqdan sonra tur-aksiyanın iştirakçıları
Lənkərana yola düşüblər.
Səkkiz rayonun təmsilçiləri Azərbaycanın şimal qapısı
Qusard
 Noyabrın
17-də səkkiz rayonun məktəblilərindən ibarət 300-ə yaxın
şagird “Ölkəmizi tanıyaq” devizi ilə təşkil olunan
maarifləndirici tur-aksiya çərçivəsində Qusar rayonunun
görməli yerləri ilə tanış olublar.
AZƏRTAC xəbər verir ki, İsmayıllı, Şamaxı, Şəki, Qəbələ,
Oğuz, Qax, Zaqatala və Balakən rayonlarından olan
qruplar günün birinci yarısında Qusar rayonundakı
“Şahdağ” Turizm Mərkəzində olublar. Onlara burada
yaradılan şərait, istirahət və əyləncə növləri haqqında
məlumat verilib. Bildirilib ki, Azərbaycan tarixində ilk
dağ-xizək kurortu olan “Şahdağ” Turizm Mərkəzinin təməli
2009-cu ilin sentyabrında Prezident İlham Əliyevin
iştirakı ilə qoyulub. Bu mərkəzin tikintisi ölkəmizdə
dağ-xizək və digər qış idman növləri ilə məşğul olmaq
üçün geniş imkanlar yaratmaqla yanaşı, respublikamıza
xarici turistlərin marağını da artırır.
Bundan sonra məktəblilər Qusarın Həzrə kəndindəki “Şeyx
Cüneyd” türbəsini ziyarət ediblər. Onların diqqətinə
çatdırılıb ki, bu türbə XVI əsrdə Azərbaycanda tikilən
və Səfəvilərin yadigarı olan abidələrdən biridir. Şeyx
Cüneyd XV əsrdə Şirvana hərbi yürüşü zamanı Şirvanşahlar
tərəfindən öldürülüb və Həzrə kəndində dəfn edilib.
Məzar üzərində türbə 1544-cü ildə tikilib.
Tur-aksiyanın iştirakçıları Qusar şəhərindəki Heydər
Əliyev Mərkəzində ulu öndərin zəngin irsini və
fəaliyyətini əks etdirən fotoşəkillərə baxıblar. Onlara
ümummilli lider Heydər Əliyevin Azərbaycanın dinamik
inkişafı, müstəqilliyimizin qorunması və
möhkəmləndirilməsi naminə gördüyü əvəzsiz işlər haqqında
məlumat verilib. Məktəblilər Qusar Tarix-Diyarşünaslıq
Muzeyi və rəsm qalereyası ilə də yaxından tanış olublar.
Məktəblilər dəniz səviyyəsindən 689 metr yüksəklikdə
yerləşən Bayraq Meydanından Qusar şəhərini seyr ediblər. |
