|
 Dekabrın
16-da “Holiday İnn” mehmanxanasında Təhsil Nazirliyi və
Təhsil Problemləri İnstitutunun birgə təşkilatçılığı ilə
“Azərbaycan təhsilində strateji hədəflər və pedaqoji
elmlərin qarşısında duran vəzifələr” mövzusunda
respublika elmi konfransı keçirilib.
Əvvəlcə tədbir iştirakçıları Təhsil Problemləri
İnstitutunun hazırladığı dövri və yeni nəşrlərdən
ibarət kitab sərgisi ilə tanış olublar.
Konfransı Təhsil Problemləri İnstitutunun direktoru,
hüquq üzrə fəlsəfə doktoru Qulu Novruzov açaraq
tədbirin məramından danışıb. Bildirib ki, tədbirin
məqsədi “Azərbaycan Respublikasında təhsilin inkişafı
üzrə Dövlət Strategiyası”na uyğun olaraq pedaqoji
elmlərin vəzifələrinin müəyyənləşdirilməsi, respublikada
səriştə əsaslı, nəticəyönümlü yeni təhsil məzmununun
yaradılması məsələlərinin reallaşdırılması üçün konkret
təkliflərin hazırlanmasıdır. XXI əsrin dünyada təhsil
əsri kimi dəyərləndirildiyini söyləyən Q.Novruzov bu
dövrün ən başlıca tələblərindən birinin cəmiyyətin
inkişafını stimullaşdıran müasir təhsil mexanizmlərinin
qurulmasından və onun bütövlükdə insan, vətəndaş
şəxsiyyətinin formalaşdırılmasına yönəldən
inkişafyönümlü təhsil mühitinin yaradılmasından ibarət
olduğunu deyib. Son illər ölkəmizdə bununla bağlı həyata
keçirilən tədbirlərdən, təhsil islahatlarından danışan
institutun direktoru hazırda da davam etməkdə olan bu
işlərin əsasında geniş miqyasda öyrənilən milli və
beynəlxalq təcrübənin dayandığını bildirib. Qulu
Novruzov “Azərbaycan 2020: gələcəyə baxış” İnkişaf
Konsepsiyasında öz əksini tapan bir sıra müddəalardan,
həmçinin “Azərbaycan Respublikasında təhsilin inkişafı
üzrə Dövlət Strategiyası”nda qarşıya qoyulan hədəflərdən
danışıb.
 Təhsil
nazirinin müavini Firudin Qurbanov iştirakçıları
salamlayaraq onları bu konfransda görməyindən məmnunluq
hissi keçirdiyini bildirib. Müstəqil Azərbaycan
dövlətinin banisi və qurucusu, ümummilli lider Heydər
Əliyevin hər zaman təhsilə, elmə xüsusi diqqət və qayğı
göstərməsindən danışan nazir müavini hazırda onun
layiqli davamçısı ölkə başçısı İlham Əliyev tərəfindən
də bu məsələlərə yüksək həssaslıqla yanaşıldığını qeyd
edib. Bildirilib ki, artıq təhsil müəssisələrində
əlverişli təlim mühiti formalaşıb, keyfiyyət
göstəricilərinin artması istiqamətində mühüm addımlar
atılır. Təhsil müəssisələrinin maddi-texniki və tədris
bazasının təkmilləşdirilməsi, müasir cəmiyyətdə təhsilin
vacib komponentinə çevrilən İKT ilə təmin olunması
istiqamətində görülən işləri təqdirəlayiq hal kimi
dəyərləndirən nazir müavini müəllimlik peşəsi ilə bağlı
mühüm məqamlara da toxunub.Bu müqəddəs peşə sahiblərinə
xas olan əsas keyfiyyətlərdən söz açan Firudin Qurbanov
müəllimlərimizdə hər bir şagirdə qarşı xüsusi və
fərdi yanaşma tərzinin olmasının vacibliyinə diqqət
çəkib, müəllimlərə, ümumtəhsil müəssisələrinin
rəhbərlərinə bununla bağlı müəyyən tövsiyələrini verib.
Ölkənin təhsil sistemində həyata keçirilən tədbirlərin,
tətbiq olunan yeniliklərin son nəticədə təhsilimizin
inkişafına xidmət etdiyini deyən nazir müavini Firudin
Qurbanov təhsilin keyfiyyətinə təsir göstərən bir sıra
həlli vacib məsələləri təhsil işçilərinin diqqətinə
çatdırıb, bəzi məqamlara aydınlıq gətirib.
Konfransda Azərbaycan Dövlət Pedaqoji Universitetinin
rektoru Yusif Məmmədov, Milli Məclisin Elm və təhsil
komitəsinin sədr müavini Bəxtiyar Əliyev, Azərbaycan
Respublikasının Prezidenti yanında Bilik Fondunun
icraçı direktoru Oktay Səməov, Təhsil İşçilərinin
Peşəkar İnkişafı İnstitutunun rektoru Asəf Zamanov,
Qafqaz Universitetinin rektoru Ahmet Saniç çıxış
edərək son illər ölkə təhsilinin uğurla inkişaf
etdiyini, bu sahədə müsbət nəticələrin əldə olunduğunu
söyləyiblər. Çıxış edənlər Azərbaycan təhsilində
strateji hədəflər və pedaqoji elmlərin qarşısında duran
vəzifələrdən danışıblar, öz fikir və təkliflərini
bildiriblər.
Sonra respublika elmi konfransı öz işini bölmə
iclaslarında davam etdirib.
Samirə KƏRİMOVA,
“Azərbaycan müəllimi”
Fotolar Rəşad ZİYADOV |
