Azərbaycan Memarlıq və İnşaat Universitetinin (AzMİU) memarlıq fakültəsinin tələbəsi Murad Mirzadə Britaniya Memarlarının Kral İnstitutuna (RİBA) üzv seçilib.Qurum bununla əlaqədar AzMİU tələbəsinə bildiriş göndərib.
Universitetdən bildirilib ki, dünyada tanınan nüfuzlu və peşəkar bir qurum olan RİBA-ya ödənişsiz üzv seçilmək AzMİU tələbəsi üçün böyük şans yaradır. Belə ki, quruma üzv olmaqla, M.Mirzadə "RİBA President's Medal" dizayn müsabiqəsi, 30-dan çox məktəbin iştirak etdiyi Polyark beynəlxalq dizayn müsabiqəsi və RİBA “Norman Foster Traveling” təqaüd müsabiqəsində iştirak edə bilər. O, 2020-ci ildə onlayn keçiriləcək RİBA CPD proqramı və professional tədbirlərə minimum 50% endirim əldə etməklə yanaşı, informasiya bülleteni və RİBA jurnalına (RİBAJ) abunə olmaq üçün də endirim qazanıb. Bundan başqa, regionda baş verənlər haqqında praktik məsləhətlər və məlumatlara dair beynəlxalq tələbə bülletenləri əldə edə biləcək. Eyni zamanda müsabiqələrə giriş, lazım olduqda layihələri onlayn, sərgilərdə və RİBA nəşrlərində reklam etmək imkanı da qazanacaq.
Xatırladaq ki, AzMİU-nun memarlıq fakültəsi ötən ilin sonunda RİBA-nın 5 illik akkreditasiyasını alıb.