Bakı Mühəndislik Universitetində (BMU) 2019/2020-ci tədris ilinin yaz semestrinin imtahan sessiyası öz işini onlayn formada davam etdirir.

BMU-dan verilən məlumata görə,  4 fakültə üzrə təhsil alan tələbələr üçün 3 həftə (8-25 iyun tarixlərində) ərzində artıq 870 imtahan keçirilib.  Bu imtahanlarda tələbələr yüksək fəallıq nümayiş etdiriblər.

Tələbələrin biliyinin qiymətləndirilməsində şəffaflığı və obyektivliyi təmin etmək məqsədilə lazımi texniki tədbirlər yüksək səviyyədə tətbiq edilir. İmtahanın nəticəsindən narazı qalan tələbələrin müraciətlərinin operativ araşdırılması məqsədilə onlayn şəkildə apelyasiya təşkil edilməsi təmin olunub.

Qeyd edilib ki, 8 iyun tarixində başlayan yaz semestrinin imtahan sessiyası iyulun 4-də yekunlaşacaq. Onlayn formada keçirilən imtahan sessiyasında tələbələr ümumilikdə 1016 imtahan verəcəklər. Belə ki, 623 (61%)  imtahan frontal sorğu şəklində, 393 (39%) imtahan isə test formasında təşkil olunacaq.