“Hər yarımilin sonunda - yanvar və iyun aylarında 4-11-ci siniflərdə məktəbdaxili summativ qiymətləndirmə həyata keçirilir. Summativ qiymətləndirmə müvafiq fənnlər, dövlət və tədris dili üzrə aparılır. Eyni zamanda, müvafiq siniflər üzrə xarici dil fənnindən də summativ qiymətləndirmə təşkil olunur. 4, 9 və 11-ci sinif şagirdləri üçün isə bu qiymətləndirmə bütün fənlər üzrə həyata keçirilir”.

“Azərbaycan müəllimi” xəbər verir ki, bu fikirləri Təhsil TV-nin "360 dərəcə təhsil" verilişində Məktəbəqədər və Ümumi Təhsil üzrə Dövlət Agentliyinin Keyfiyyətə nəzarət və monitorinq sektorunun müdiri Fidan Nəcəfova səsləndirib.

O bildirib ki, 2008-ci ilə qədər bu qiymətləndirmə kağız daşıyıcılarda yazılı şəkildə aparılırdı:

“Suallar müəllimlər və məktəb rəhbərliyi tərəfindən hazırlanır, müəyyən olunmuş tarixlərdə şagirdlərə təqdim edilirdi. Şagirdlər bu sualları cavablandırdıqdan sonra müəllimlər təxminən 2-3 həftə ərzində cavabları yoxlayırdılar. Lakin 2018-ci ildən bu prosesin elektronlaşdırılmasına başladıq. İlk olaraq Bakı şəhərində yerləşən 40 məktəbdə bu sistem pilot olaraq tətbiq olundu”. 

Sektor müdiri əlavə edib ki, yanvar ayında 697 ümumtəhsil müəssisəsində 230 mindən artıq şagird summativ qiymətləndirməyə elektron formada cəlb edilib:

“Bu, sadəcə sualların PDF şəklində təqdim edilməsi deyil. Məsələ ondan ibarətdir ki, müvafiq platforma üzərindən suallar hazırlanır və həmin suallar konkret siniflər üzrə sistemə yerləşdirilərək əlaqələndirilir. Artıq imtahan günü şagird məktəbdə təşkil olunmuş İKT laboratoriyasına daxil olur, öz şəxsi hesabına giriş edir və həmin saatda aktivləşmiş sualları ekranda görür. Şagird həmin sualları məktəb binası daxilində cavablandırır. Cavablandırma tamamlandıqdan sonra şagird dərhal öz nəticəsini və topladığı balı görə bilər”.

Onun sözlərinə görə, hədəf bu nəticələrin avtomatik olaraq elektron jurnala inteqrasiyasını təmin etməkdir. Beləliklə, həm şəffaflıq artır, həm də qiymətləndirmənin obyektivliyi qorunur.