“EESTEC JLC Baku” təşkilatının təşkilatçılığı, “STEAM Azərbaycan” layihəsi, “İNNOLAND” İnkubasiya və Akselerasiya Mərkəzi və “Bir Könüllü” Tələbələrin Əməkdaşlığı İctimai Birliyinin dəstəyi ilə “EESTech Challenge Baku’25” müsabiqəsi keçirilib.

“Azərbaycan müəllimi” xəbər verir ki, müsabiqənin əsas məqsədi mühəndislik sahəsində təhsil alan və bu istiqamətdə bilik və bacarıqlarını inkişaf etdirmək istəyən tələbələr üçün real problemlərin həlli üzrə innovativ düşüncə və texniki yanaşmaların təşviqi olub.

100-dən çox namizəd arasından seçilən 30 iştirakçı 10 komanda tərkibində yarışaraq müxtəlif texnoloji problemlərin yaradıcı yollarla həlli istiqamətində bilik və bacarıqlarını nümayiş etdirib. Müsabiqədə “AirVive” komandası birinci, “Montyorlar” komandası isə ikinci yerə layiq görülüb.

Müsabiqənin bağlanış mərasimində çıxış edən Elm və Təhsil Nazirliyinin İctimaiyyətlə əlaqələr və kommunikasiya şöbəsinin müdiri Səbuhi Rzayev gənclərin texnoloji bilik və bacarıqlarının inkişafına yönəlmiş tədbirlərin əhəmiyyətindən bəhs edib və ölkədə bu istiqamətdə həyata keçirilən siyasətin mühüm nəticələrini vurğulayıb.

"EESTEC JLC Baku" təşkilatının sədri Adil Qasımov isə çıxışında bu kimi layihələrin gənclər arasında innovasiya, komanda işi və texniki düşüncə mədəniyyətinin formalaşmasına mühüm töhfə verdiyini qeyd edib.

Bildirilib ki, qalib komandalar 13–16 may 2025-ci il tarixlərində İtaliyanın Trieste şəhərində keçiriləcək “EESTech Challenge” yarışmasının beynəlxalq final mərhələsində Azərbaycanı təmsil edəcək.

Qeyd edək ki, “EESTech Challenge” Avropanın müxtəlif şəhərlərində keçirilən beynəlxalq müsabiqə formatıdır və gənc texnologiya həvəskarları arasında mühəndislik və innovasiyaların inkişafını təşviq edir.