Xəbər verdiyimiz kimi, bir neçə gün öncə Bakı Ali Neft Məktəbində keçirilən “Sabahın alimləri” XIV Respublika Layihə Müsabiqəsinin qalibləri məlum olub.

Onlardan ikisi Azərbaycanın Milli Qəhrəmanı Mübariz İbrahimov adına Biləsuvar Bağça-Məktəb-Lisey Kompleksinin şagirdləridir.

“Azərbaycan müəllimi” kompleksin müsabiqədə I yeri tutaraq, qızıl medal əldə edən X sinif şagirdləri Gülay Quluzadə və Leyla Əlizadə ilə həmsöhbət olub.

Şagirdlər qeyd ediblər ki, layihələri 2-ci tip şəkərli diabetə innovativ yanaşmadır:

"Bu tədqiqatda 2-ci tip diabet zamanı ən çox istifadə edilən iki dərmandan və bizim tövsiyə etdiyimiz təbii vasitədən - çəpişotundan istifadə etmişik. Araşdırmalarımız nəticəsində sübut etmişik ki, təbii preparat daha effektivdir. Bu qələbənin tək memarları biz deyilik. Bizə daim dəstək olan müəllimlərimiz və bizi yeniliklərə doğru yönləndirən lisey rəhbərimiz də bu uğurun bir parçasıdır. Əgər insan orqanizmi funksional şəkildə işləyirsə, bizim komandamız da eyni prinsiplə hərəkət edərək bu qələbəni qazandı".

Gülay Quluzadənin bildirdiyinə görə, bu, onun ilk qələbəsi deyil:

"Mən 2022-2023, 2023-2024 və 2024-2025-ci tədris illərində Respublika fənn olimpiadalarının rayon turunu uğurla keçmişəm. Mənim gələcək hədəfim ali təhsilimi Almaniyada davam etdirməkdir. Bunun üçün SAT imtahanına hazırlaşıram. Mənim peşə seçimim stomatologiyadır. Liseyimiz bizə çoxlu imkanlar yaradır. SAT imtahanına liseydə ayrılmış xüsusi təchizatlı otaqda və xüsusi müəllimlərlə hazırlaşıram. Bundan əlavə, liseyimiz bizə xaricə səfər etmək imkanı da yaradır. Yay aylarında şagirdlərimiz istirahət üçün Türkiyəyə gedir. Bu il isə Londona səfər nəzərdə tutulub. Bundan əlavə, mən 1-ci yeri qazandığım üçün Dövlət Proqramına düşmüşəm və bu proqram çərçivəsində xaricdə rahatlıqla təhsil ala biləcəyəm".

Layihənin müəlliflərindən olan Leyla Əlizadə də digər uğurları və gələcək planları barədə söhbət açıb:

"2022-2023 və 2023-2024-cü tədris illərində Respublika fənn olimpiadalarının rayon turunu uğurla keçmişəm. Həmçinin, 2024-cü ildə Dövlət İmtahan Mərkəzinin 9-cu sinif buraxılış imtahanında 256 bal toplayaraq zəhmətimin bəhrəsini görmüşəm. Liseyimiz yüksək akademik göstəricilərə malik şagirdlər üçün müxtəlif tədris səfərləri təşkil edir. Bu çərçivədə, 2024-cü ilin iyul ayında lisey kollektivi ilə Çameli gəzintisində iştirak etmiş, burada həm biliklərimi artırmış, həm də unudulmaz təəssüratlar qazanmışam. Gələcək hədəfim – Dövlət İmtahan Mərkəzinin qəbul imtahanında yüksək nəticə göstərərək Prezident təqaüdçüsü olmaq, Azərbaycan Tibb Universitetində (ATU) "Müalicə işi" ixtisası üzrə təhsil almaq və biliyimi daha da dərinləşdirmək üçün təhsilimi Almaniyada davam etdirməkdir. Bu hədəflərimə çatmaq üçün dayanmadan çalışır, elm və bilik səmasında yüksəlməyə davam edirəm".