Təhsildə Keyfiyyət Təminatı Agentliyi (TKTA) tərəfindən “bp Azərbaycan”ın maliyyə dəstəyi ilə həyata keçirilən “Sənətin varsa, sənədin olacaq” layihəsi çərçivəsində peşə tanınması imtahanında uğur qazanan namizədlərə peşə ixtisasını təsdiq edən sənəd təqdim olunub.

“Azərbaycan müəllimi” xəbər verir ki, tədbirdə TKTA-nın Qeyri-formal və informal təhsilin tanınması şöbəsinin müdiri Mansur Rəhimli çıxış edərək peşə sənədi əldə edən ərizəçiləri təbrik edib, formal təhsilə çıxış imkanı məhdud olan, müxtəlif peşə sahələrində çalışan vətəndaşların bilik, bacarıq, təcrübə və səriştələrinin tanınmasının əmək bazarındakı dəyişikliyə müsbət təsiri və ölkə iqtisadiyyatının inkişafı üçün əhəmiyyətini qeyd edib. Həmçinin o, layihənin neft və qaz boru kəmərləri keçən bölgələrdə yaşayan əhalinin sosial müdafiəsini gücləndirmək və onların əmək bazarına inteqrasiyasını təmin etmək məqsədi daşıdığını vurğulayıb.

Məlumat üçün bildirmək istərdik ki, “bp Azərbaycan” şirkətinin maliyyə dəstəyilə TKTA tərəfindən həyata keçirilən layihə çərçivəsində neft və qaz boru kəmərləri keçən bölgələrdə yaşayan 57 nəfər müraciətçi “Avtomobil mühərriklərinin yığıcısı”, “Mühafizəçi”, “Poliqrafiya üzrə dizayner”, “Kompüter operatoru”, “Qənnadıçı, şirniyyatçı” və “Dərzi” peşə ixtisasları üzrə peşə ixtisasını təsdiq edən sənəd əldə edib. Hazırda layihənin icrası davam edir.

Qeyd edək ki, qeyri-formal və informal təhsilin tanınması Azərbaycan Respublikası Nazirlər Kabinetinin 5 avqust 2020-ci il tarixli 279 nömrəli qərarı ilə təsdiq edilmiş "Qayda" əsasında tənzimlənir və əldə edilən peşə ixtisasını təsdiq edən sənəd vətəndaşa əmək fəaliyyətinə başlamaq hüququ verir.