Təhsilin keyfiyyətinin yüksəldilməsi və nailiyyətlərin artırılması müasir idarəetmə modellərinin tətbiqi ilə birbaşa bağlıdır. Strateji planlaşdırma bu sahədə müstəsna əhəmiyyətə malikdir və təhsil müəssisələrinin effektiv idarə olunmasının əsasını təşkil edir.

Latın dilində "sərkərdənin məharəti" mənasını verən strategiya təşkilatın məqsədlərinə çatması üçün əvvəlcədən planlaşdırılmış fəaliyyət modeli kimi təyin olunur.

Məktəblərdə strateji idarəetmə rəhbərlik tərəfindən məqsədyönlü fəaliyyətlərin həyata keçirilməsi və şəffaf idarəetmə mexanizmlərinin formalaşdırılması ilə təhsilin beynəlxalq standartlara uyğunlaşdırılmasını təmin edir.

Strateji planlaşdırmanın məktəblərdə tətbiqi aşağıdakı məqsədləri əhatə edir:
1. Məktəblərin idarə olunmasında şəffaf və hesabatlı mexanizmlərin yaradılması;
2. Təhsilin pillə və səviyyələrinin beynəlxalq standartlara uyğunlaşdırılması;
3. İnformasiya-kommunikasiya texnologiyalarına əsaslanan təlim infrastrukturunun qurulması;
4. Pedaqoji və inzibati heyətin davamlı inkişafını təmin etmək;
5. Şagird nailiyyətlərinin izlənilməsi və qiymətləndirmə mexanizmlərinin təkmilləşdirilməsi.

Strateji planlaşdırmanın effektiv həyata keçirilməsi üçün məktəbin rəhbərliyi aşağıdakı suallara cavab tapmalıdır:

1. Hazırda məktəbimiz haradadır?
2. 3, 5 və ya 10 ildən sonra harada olmaq istəyirik?
3. Bu hədəflərə necə çatacağıq?
Bu sualların cavabları əsasında strateji plan hazırlanmalı, onun icrası və monitorinqi üçün effektiv mexanizmlər qurulmalıdır.

Strateji planın məqsədi rəhbərliyin məktəbin tutmasını istədiyi istiqaməti, məktəbə təsir edən problemləri müəyyən etməklə öz məktəblərini təkmilləşdirməkdir. Bütün məktəblərin strateji planı olmalıdır. Əks halda, məktəbin əsas maraqlı tərəfləri (valideynlər, şagirdlər, müəllimlər və cəmiyyət) məktəbin inkişafının hansı istiqamətdə getdiyini müəyyən edə bilmirlər.

Strateji planlaşdırma məktəbin təkmilləşdirilməsi üçün güclü bir vasitədir və məktəbin yenilənməsi, innovasiya və dəyişiklik üçün ardıcıl fəaliyyət planlaşdırma prosesinin mövcud olmasını təmin edir. Buna görə də məktəblərdə strateji planlaşdırma dəyişiklik ortaya qoymağa və ya innovasiyaya təsir göstərməyə can atmalıdır. Beləliklə, bu proses məktəbin rəhbərliyi tərəfindən istiqamətlənməlidir.

Strateji planlaşdırmaya laqeyd yanaşdıqda isə məktəblər düzgün fəaliyyət göstərə, inkişaf edə bilməz. Strateji planlaşdırma vasitəsilə məktəb öz uzunmüddətli fəaliyyət istiqamətini müəyyən edə, müxtəlif təşəbbüsləri həyata keçirə, prosesin gedişatını izləyə və strategiyasını yeni şəraitə uyğunlaşdıra bilər.

Mənbə: Fatullayev, Vagif. (2024). THE IMPORTANCE OF STRATEGIC MANAGEMENT PLANNING IN SCHOOLS. 10.13140/RG.2.2.18658.75204.