“Xarici dil sahəsində fənn kurikulumunun təkmilləşdirmə işləri davam edir. Artıq bu prosesi başa çatdırmışıq və cari kurikulum ilə yeni hazırladığımız kurikulum arasında əhəmiyyətli fərqlər mövcuddur. Məzun xətləri ilə bağlı isə hər hansı bir dəyişiklik edilməyib”.

Bunu “Azərbaycan müəllimi”nə açıqlamasında Təhsil İnstitutunun Xarici dil fənn kurikulumunun təkmilləşdirilməsi üzrə işçi qrupunun üzvü Günay Nadirova deyib.

O bildirib ki, indiyə qədərki cari kurikulumda müəyyən bir məzun xətti daxilində yalnız bir standart və bir alt standart mövcud idi: 

“Yeni hazırladığımız kurikulumda isə bir neçə standart öz əksini tapıb və hər bir standart bir neçə alt standarta bölünüb. Bu yanaşma dilin daha detallı və effektiv öyrənilməsinə böyük töhfə verəcək”.

Günay Nadirova qeyd edib ki, bu yeniliklər ictimai müzakirədən keçdikdən sonra daha geniş şəkildə tətbiq olunacaq və şagirdlərin dil bacarıqlarının inkişafına ciddi təsir göstərəcək:

“Belə deyək, bu sənədin hazırlanmasında CFR-dən (Common European Framework of Reference - Ümumi Avropa İstinad Çərçivəsi) istifadə edilib. Bu, Avropa çərçivəsidir və bütün Avropa dillərinin öyrənilməsini əhatə edir. Yeni proqramda dilin öyrənilməsi prosesində hansı məqamlara toxunulmalı olduğu barədə göstərişlər yer alır”.

Müəllif əlavə edib ki, CFR-in üstünlüyü ondadır ki, hər bir alt standart dəqiq müəyyən edilir. Əvvəllər bəzi alt standartların ölçülməsi ilə bağlı çətinliklər mövcud idisə, indi bu çətinliklər aradan qaldırılıb. Yeni sənəddə hər bir alt standart ölçüləbilən formada hazırlanıb ki, bu da dil öyrənmə prosesini daha effektiv və məqsədyönlü edir.

“Məktəblərimizdə şagirdlər birinci sinifdən Pre-A1 səviyyəsi ilə başlayırlar və 11-ci sinfi B1 səviyyəsi ilə bitirirlər. Yeni hazırlanan sənəddə hər bir alt standart üçün detallı izahlar verilib”, – deyə o əlavə edib.

İşçi qrupun üzv deyib ki, müəllimlər üçün bu alt standartların necə həyata keçirilə biləcəyi, onların reallaşdırılması üçün hansı üsullardan istifadənin vacib olduğu kimi məsələlər sənəddə dəqiq şəkildə izah edilib. Bu yanaşma sayəsində təlim nəticələrinə necə nail olunacağı və bu nəticələrin necə ölçüləcəyi də tam şəkildə müəyyən edilib. Bu da həm müəllimlərimizə, həm də tədris prosesinə böyük dəstək verəcək.

Onun sözlərinə görə, təkmilləşdirilmiş kurikulum elə hazırlanıb ki, artıq dərslik və ya digər dərs vəsaitləri olmadan da, yalnız standartlardan istifadə etməklə müəllim tədrisi həyata keçirə bilər.