Dünya Universitetlərinin Webometrics Reytinq (Webometrics Ranking of World Universities) siyahısını tərtib edən İspaniyanın Milli Tədqiqat Şurasının tərkibindəki Cybermetrics laboratoriyası 2020-ci il üçün dünya universitetlərinin reytinq siyahısına daxil olan ali məktəblərin adlarını açıqlayıb.

30000-dək universitetin yer aldığı siyahıda Bakı Dövlət Universiteti (BDU) 3480-ci yerdə qərarlaşıb. Adıçəkilən Beynəlxalq Agentliyin ötən ilki reytinq cədvəli ilə müqayisədə BDU 154 pillə irəliləyib. Həmçinin Azərbaycandan bu siyahıya daxil edilən 46 təhsil müəssisəsi arasında ilk sırada yer alıb.

BDU-dan bildirilib ki, beynəlxalq təşkilat 2004-cü ildən başlayaraq, dünyanın 200 ölkəsindən 30000-dək ali təhsil müəssisəsini əhatə edən  Dünya Universitetlərinin Webometrics reytinq siyahısını tərtib edir. Agentlik seçimlərdə əsasən, tədris, tədqiqat fəaliyyəti, akademik reputasiya, universitetdə məşhur professorların və Nobel mükafatı laureatlarının sayı, istinadların sayı, universitetdə xarici tələbə və müəllimlərin sayı, beynəlxalq aktivlik, işəgötürənlərin rəyi və məzunların karyera potensialı, məzunların işlə təmin edilməsi kimi meyarlara diqqət yetirir.