Bu il  Bakı Ali Neft Məktəbinin (BANM) Prezident təqaüdünə layiq görülən 22 tələbəsindən biri Kəlbəcər rayonu 108 saylı tam orta məktəbin yetirməsi  Zərifə Şahbazzadədir.

O, orta məktəbi fərqlənmə diplomu ilə bitirərək, 690 balla BANM-in İnformasiya təhlükəsizliyi ixtisasını seçib. Prezident təqaüdünə layiq görülməsi ilə bağlı təəssüratlarını bölüşən Zərifə Şahbazzadə Kəlbəcər rayonunun azad olunması ilə bağlı da bir kəlbəcərli olaraq hisslərini dilə gətirib...

- Zərifə, ailəniz, yaxınlarınız Kəlbəcər haqqında sizinlə hansı xatirələri bölüşüblər?

- Əvvala deyim ki, Azərbaycan xalqı çox şərəfli və qürurlu bir tarix yaşadı. Mən də  bu tarixə şahidlik etdiyim üçün çox xoşbəxtəm. Kəlbəcər mənim üçün görmədiyim, yalnız xatirələrdə canlandırılan Vətən torpağıdır!.. Nənəmin Kəlbəcər haqqında bitib-tükənməyən xatirələri məndə sanki orada yaşamışam kimi hisslər oyadırdı. Sıldırımlı qayalar, möhtəşəm təbiət, əsrarəngiz gözəllik haqqında eşitdikcə mənfur düşmənlərin orada məskunlaşması onlara niftrətimi daha da artırırdı.

- Doğma torpağının işğaldan azad olunması necə hissdir?

- İşğal altında olan Vətənin hər bir qarışı əzizdir. Hər bir qarış torpaqdan düşmənin qovulması insana qürurverici hisslər yaşadırdı. Məscidlərdə yenidən azan səsinin eşidilməsi çox gözəl duyğudur. Özümü çox xoşbəxt hiss edirəm ki, Kəlbəcərə, Şuşaya getmək, uca dağları seyr etmək, gözəlliklərdən zövq almaq nəsibim olacaq.

- Vətən müharibəsində yaxınlarınızdan iştirak edən oldumu? Siz özünüz  informasiya savaşında fəal idinizmi?

- Torpağımız, şərəfimiz və qürurumuz uğrunda apardığımız savaşda şəhidlərimiz də oldu. Onlar bu günü bizə yaşatmaq üçün qanları ilə tarix yazıblar! Qazilərimiz igidlik göstərərək düşmənin heç bir hiyləsinə aldanmayıblar. Onların qarşısında baş əyirəm. Vətən müharibəsində anamın xalası oğlu iştirak edib. Bu savaşda hər birimiz həmrəy olmalı, birlik və dostluq nümayiş etdirməli idik. Etdirdik. Zəfər qazanmaq üçün bu, çox önəmli şərt idi. Çünki düşmən bizi daim izləyir və mənfi fikirlərlə bizi ruhdan salmağa çalışırdı. Lakin yenilməz xalqımızın birliyi həm döyüş meydanında, həm də virtual aləmdə bütün dünyaya nümunə oldu. Prezidentimizin hər bir müraciəti bir tarixə çevrildi və son 10 noyabr müraciəti ilə 28 illik bir həsrətə son qoyuldu.  Azərbaycan xalqı bir daha sübut etdi ki, bayrağımız əyilməzdir. O, daim yüksəklərdə dalğalanacaq. Bəli, mən də digər həmyaşıdlarım kimi sosial şəbəkələrdə bacardığım qədər fəallıq göstərdim. 

- Siz həm də bu il Prezident təqaüdünə layiq görülmüsünüz.  Təbrik edirik və bilmək istəyirik ki, bu xəbəri ilk dəfə eşidəndə təəssüratınız necə oldu?

- 2020-ci il təzadlı bir il oldu. Fərqli bir yaşayış tərzinə alışmaq və bu şəraitdə ali məktəbə hazırlaşmaq məcburiyyəti  yarandı. Lakin qarşıma qoyduğum məqsəd və gələcək arzularım bu şərtlərə qalib gəldi. 690 bal toplayaraq BANM-in İnformasiya təhlükəsizliyi ixtisasına qəbul olundum.  Müharibənin davam etdiyi bir vaxtda Prezident İlham Əliyevin təqaüdlə bağlı imzaladığı Sərəncam çox gözlənilməz oldu. Ölkənin çox çətin bir zamanında gənclərə ən ali səviyyədə dəyər verilməsi çox qürurverici anlar yaşatdı.

- Bakı Ali Neft Məktəbində təhsil almaq istəyi necə yarandı? 

- BANM-də təhsil alan yaxınlarımdan, məktəbimizin məzunlarından və araşdırdığım mənbələrdən ətraflı məlumatlar əldə etmişdim. Araşdırmalarımdan qənaətim bu oldu ki, keyfiyyətli təhsil almaq, savadlı mütəxəssis  kimi yetişmək arzuma Bakı Ali Neft Məktəbində təhsil alaraq çata bilərəm. Məqsədim peşəkar və bacarıqlı mütəxəssis olmaq üçün universiteti əla nəticələrlə bitirərək magistr təhsili də almaqdır.

BANM-in mətbuat xidməti