ABŞ-da kitabxanalar niyə məşhurdur?

Amerikalılar deyirlər ki, kitabxanalar onlara saxta informasiyalar dənizində boğulmamağa  və özünü inkişaf etdirməyə kömək edir.  Onlar kitabxanalarda  etibarlı və inandırıcı məlumatları daha asan tapırlar. Xüsusilə də  bu,  18-35 yaşda olan gənclərə aiddir.

  

ABŞ-ın "Pew Research Centeru"  Tədqiqat Mərkəzi ictimai kitabxanalardan istifadəyə dair illik sorğu keçirib. Sorğuda ölkənin bütün 50 ştatından olan 16  və daha yuxarı yaşlı 1601 amerikalı iştirak edib.  Tədqiqatın nəticələri statistik əhəmiyyət daşıyır.  Tədqiqatlara əsasən, yaşlı amerikalıların 78 faizi  hesab edir ki, ictimai kitabxanalar onlara  səhih və etibarlı informasiyanı axtarıb tapmaqda  kömək edir.   76%-i isə kitabxanalarda yeni ədəbiyyatlar oxuyur.  56% amerikalının fikrincə, səhih məlumatlar  onlara qərarların qəbul olunmasında kömək edir.  Sorğuya əsasən, amerikalılar hesab edirlər ki, ictimai kitabxanalar onlara digər  sahələrdə -  streslərlə mübarizədə və hətta şəxsi məlumatların mühafizəsində  kömək edir.
       

Kitabxanalara maraq 18 - 35 yaşlı insanlarda daha böyükdür.  Bu yaşda insanların  53 faizi son il ərzində heç olmasa bir dəfə şəxsən  kitabxanaya  getdiklərini,  kitabxana saytından və ya əlavədən (proqramdan) istifadə etdiklərini deyiblər.  Kitabxanaları yaşlı amerikalılarla müqayisədə daha tez-tez ziyarət edən cavanlar  qeyd edirlər ki, kitabxana onlara etibarlı informasiyanın axtarışında daha çox kömək edir.
   

Kağız kitablar hələ də  kitabxanaya getmək üçün ən məşhur səbəbdir.  Rəyi soruşulan 16 yaşdan yuxarı kitabxana istifadəçilərinin 64 faizi kitablara,  29 faizi isə kompüter arxasında əyləşməyə üstünlük veriblər.
  

Amerikalılar kitabxanalardan nə gözləyirlər? Respondentlərin  80 faizi hesab edir ki, kitabxanalar rəqəmsal  bacarıqları öyrənmək üçün proqramlar   təklif etməlidir.  Rəyi soruşulanların tam yarısı  istəyir ki, kitabxanalar ziyarətçilərə yeni yaradıcı  texnologiyalara (məsələn, 3D-printerlər) yiyələnməkdə kömək etsin.  57% amerikalı hesab edir ki, kitabxanaların oxuma, iş və istirahət üçün daha  rahat yerlər təklif etmələri lazımdır,   24% isə  texniki mərkəzlər, mədəni tədbirlər, oxuma və ünsiyyət üçün yer yaratmaq məqsədilə  kağız kitabların bir hissəsinin kitabxanadan çıxarılmasını arzu edir.
  

Qeyd edək ki, adıçəkilən tədqiqat mərkəzi məlumatlara əsaslanan ictimai rəy  sorğuları, demoqrafik tədqiqatlar, məzmun-analizi və başqa sosioloji tədqiqatlar keçirən informasiya mərkəzidir.
 

Oruc MUSTAFAYEV



15.01.2019 | 13:33