Türkiyənin Alanya şəhərində Alanya Əlaəddin Keykubad Üniversiteti və  Bakı Slavyan Universitetinin birgə təşkilatçılığı ilə Azərbaycan Xalq Cümhuriyyətinin 100 illiyinə həsr edilmiş beynəlxalq elmi konfrans keçirilib. Konfransda respublikamızı Bakı Slavyan Universitetinin tədris işləri üzrə prorektoru, professor Telman Cəfərov, elmi işlər üzrə prorektor, professor Rafiq Novruzov, BSU-nun “Jurnalistika” kafedrasının professoru Etibar Babayev, “Diplomatiya və xarici siyasət” kafedrasının müdiri, tarix üzrə fəlsəfə doktoru Əsgər Əhməd, “Azərbaycanşünaslıq” laboratoriyasının müdiri, hüquq üzrə fəlsəfə doktoru Sadir Məmmədov təmsil ediblər.

Konfransı açan Alanya Əlaəddin Keyqubad Universitetinin rektoru, professor Əhməd Pinarbaşı toplantının məram və məqsədi barədə ətraflı məlumat verib. Türkiyə və Azərbaycanın ortaq dəyərlərə malik olduğunu bildirən rektor ölkələrimiz arasındakı münasibətlərin dəfələrlə tarixin  ağır sınaqlarından uğurla keçdiyini diqqətə çatdırıb. O, azərbaycanlıların Çanaqqala döyüşlərində Türkiyə uğrunda şücaətlə vuruşduğunu, erməni-daşnak qüvvələri Bakıda qırğınlar törədərkən isə türk ordusunun azəri qardaşlarının köməyinə yetişdiyini xatırladıb. Ə.Pinarbaşı bu dostluq və qardaşlığın heç zaman unudulmayacağını bildirib.

Tədbirdə iştirak edən Alanya şəhər bələdiyyəsinin başqanı Adəm Umud və dövlət nümayəndəsi Mustafa Harput çıxışlarında Azərbaycanla Türkiyənin həqiqətən “bir millət iki dövlət” olduğunu bildiriblər. BSU-nun “Jurnalistika” kafedrasının professoru Etibar Babayev  Heydər Əliyevin Türkiyə Cümhuriyyət başçıları ilə görüşlərindən bəhs edən sənədli filmini də elə bu deviz altında tamaşaçılara təqdim edib.

Konfransda BSU-nun tədris işləri üzrə prorektoru,  professor Telman Cəfərov “Azərbaycana Avrasiyaçılıq prizmasından bir baxış”, elmi işlər üzrə prorektor,  professor Rafiq Novruzov “Azərbaycan Xalq Cümhuriyyəti dönəmində Yusif Vəzir Çəmənzəminlinin Türkiyə dövlətindəki səfir fəaliyyəti”, “Diplomatiya və xarici siyasət” kafedrasının müdiri, tarix üzrə fəlsəfə doktoru Əsgər Əhməd “Azərbaycan Xalq Cümhuriyyətinin Türkiyə ilə qarşılıqlı əlaqələri”, “Azərbaycanşünaslıq” laboratoriyasının müdiri, hüquq üzrə fəlsəfə doktoru Sadir Məmmədov “Azərbaycan Xalq Cümhuriyyəti dövründə daxili işlər qurumlarının fəaliyyəti” mövzularında məruzə ediblər.

Türkiyəli alimlər Yavuz Uysal, Nacidi Uysal, Mehmet Ak, Namiq Hüseynli, Leyla Harputlu çıxış Azərbaycan Respublikası ilə Türkiyə Cümhuriyyəti  arasındakı əlaqələrin tarixi kökləri, bugünkü vəziyyəti və gələcək perspektivləri haqqında danışıblar.