Dillər Universitetində Azərbaycan-Çin yay düşərgəsi fəaliyyətə başlayıb

Azərbaycan Dillər Universitetinin (ADU) nəzdində fəaliyyət göstərən Konfutsi İnstitutunda Çin-Huzhou Universitetinin tələbələri üçün Azərbaycan-Çin linqvistik-mədəni yay düşərgəsinin açılışı olub. Bu ilki ənənəvi hadisə “Bir kəmər -bir yol”- mədəni səyahət şüarı altında keçirilir.

 

Düşərgənin məqsədi xarici dillərin öyrənilməsi, Azərbaycan mədəniyyəti və ənənələri ilə tanışlıqla yanaşı, iki universitetin tələbələrini müxtəlif tədbirlərdə və müsabiqələrdə özünü sınamaq, yeni dostlar tapma imkanı ilə təmin etməkdir. Düşərgə iştirakçıları üçün Azərbaycanın tarixi və görməli yerlərinə ekskursiyalar, eləcə də mədəni-əyləncəli tədbirlər təşkil olunur.

 

Konfutsi İnstitutunun direktoru Rafiq Abbasov Azərbaycanın Çin və Avropa arasındakı mühüm tranzit rolu və transxəzər beynəlxalq nəqliyyat marşrutunun yaradılmasından danışaraq, Prezident İlham Əliyevin 2015-ci ildə Çinə rəsmi səfəri zamanı imzalanmış “Azərbaycan Respublikası Hökuməti və Çin Xalq Respublikası Hökuməti arasında “İpək Yolu İqtisadi Kəməri”nin yaradılmasının birgə təşviqinə dair Anlaşma Memorandumu”nun əhəmiyyətini vurğulayıb.

 

Tədbirdə çıxış edən ADU-nun Elm və İnnovasiya məsələləri üzrə prorektoru, professor Sevinc Zeynalova təhsil sahəsində Azərbaycan və Çin universitetləri arasında əməkdaşlığın genişləndirilməsinin öz həmyaşıdlarına qədim zamanlardan bəri Çin ilə sıx bağlı olan Azərbaycanın qədim tarixi və mədəniyyəti haqqında məlumat verəcəklərinə ümidvar olduğunu bildirib.

 

Mərasimdə çıxış edən bir qrup Çinli tələbələrin rəhbərləri, Huzhou Universitetinin Rəssamlıq fakültəsinin katibi Qing Vey və müəllim Cheng Chenglin Azərbaycan və Çin arasında humanitar əməkdaşlığın inkişaf etdirilməsinin vacibliyini qeyd ediblər.

 



09.07.2019 | 16:29