İstedadının sorağı  ifa etdiyi  bir-birindən gözəl mahnıların qanadlarında bizim qəzetə də gəlib çıxan  Səmayə  Məmmədova 2003-cü ildə  Bakıda anadan olub. 6 yaşından paytaxtdakı 12 nömrəli musiqi məktəbində  fortepiano şöbəsində  Sveta Mövlazadədən  dərs alıb.  Hazırda  isə  istedadlı yeniyetmə Azərbaycan Milli Konservatoriyasının  tərkibində  İncəsənət Gimnaziyasının 10-cu  sinfində oxuyur. Təəccüblü görünsə də Səmayə artıq müxtəlif musiqi alətlərində məharətlə ifa etməyi bacarır. Necə deyərlər, tarı, kamançanı, pianinonu, qarmonu onların öz dillərində dilləndirə və sevdirə  bilir. Ancaq onun ən çox sevdiyi  bir musiqi aləti də var  ki,  onun da adı fortepianodır. Nə az, nə çox, düz doqquz ildir ki, Səmayə  öyrəndiyi bütün ecazkar  mahnıları fortepianonun  şirmayı dillərinin köməyi ilə  öz yaddaşına köçürür və musiqi dünyasına qovuşdurur. Təhsil aldığı Gimnaziyada yeniyetmə fortepiano ifaçısı  bu gün həvəslə musiqişünaslıq ixtisasına yiyələnir. Onunla dərsdən sonra elə   təhsil ocağında  görüşdük . Gəlişimin səbəbini bilməsə də, “Azərbaycan müəllimi” qəzetindən olduğumu biləndə sevinc hissi yaşadığını etiraf etdi. Söhbətimiz gözlədiyimdən də maraqlı keçdi. Doğrudan da əsl istidad sahibi ilə  həmsöhbət olmaq  necə də rahat olurmuş. Gənc istedad təhsil aldığı illərdə bir çox uğurlara imza atıb. Belə ki, o, dəfələrlə məktəbdə təşkil olunan hesabat konsertlərində, Azərbaycan Dövlət Filarmoniyasında keçirilən konsertlərdə  istedad və bacarığını nümayiş etdirib.

Beynəlxalq  yarışlara qatılmaq uşaqlıq arzum idi

2017-ci ilin dekabr ayı idi. Direktorumuz Aytən Əhmədova  məni otağına çağırıb, Polşada keçiriləcək “Vavel xəzinəsi” musiqi festivalında iştirak edəcəksən, - deyəndə, çox sevindim. Fərəhimin  hədd-hüdudu yox idi. Valideynlərimə bu şad  xəbəri  çatdırmaq üçün evə necə getdiyimi bilmədim. 4 gün  vaxtım vardı. Gecələr yatmır, dünya bəstəkarlarının - İ.S.Baxın, L.V.Bethovenin, V.A.Motsartın, V.Y.Haydnın  əsərlərindən  parçalar üzərində ciddi hazırlaşmağa başladım. Evdə ifalarımı atam, anam, bacım dinləyir, öz iradlarını bildirirdilər. Ailəmizin bütün üzvləri musiqi vurğunları olduqları üçün onların verdikləri qiymətlər də önəmli olurdu. Şübhəsiz, fortepianoda  ifa etmək həm şərəflidir, həm də  məsuliyyətli. Möhtəşəm  konsert salonlarında özünü sınayırsan, hamının diqqəti sənin ifanda olur, tamaşaçıların rəğbətini qazanırsan. Mənim  bütün  uğurlarımın  təməlində həm  təhsil aldığım məktəbin, həm də müəllimlərimin  əməyi  danılmazdır. Onların  üzərimdə çəkdikləri əməyin nəticəsi olaraq mən də  müxtəlif vaxtlarda Moskvada, Ukraynada, Bolqarıstanda keçirilən beynəlxalq  müsabiqələrə qatılaraq birincilik qazanıb, diploma  və  fəxri fərmanlara layiq görülmüşəm.

Çox həyəcanlı idim

Nə isə... Atam  aldığı bileti  mənə  göstərdi və tapşırdı ki, istirahət edim, çünki sabah tezdən yola düşməliyik. Əşyalarımı yığdıqca həyəcanım birə-beş artırdı. Sanki başım fırlanırdı...   Nəhayət ki, atam, anam, bacım və  qardaşım ailəvi Polşaya yola düşdük. Çox həyəcanlı idim. İfalarımın necə qarşılanacağı məni rahat olmağa qoymurdu.  Bu, sözlə ifadə edilməsi mümkün olmayan hisslər idi. Artıq yersiz fikirlər məni yormuşdu. Ən çox isə xarici ölkədə Azərbaycanımızı təmsil etməyim məni  həyəcanlandırır, məsuliyyətimi artırırdı.

Nəticə sevindirici oldu

... Münsiflər  heyəti məni  səhnəyə dəvət edəndə  özümü ələ aldım. Bir anlıq  həyəcan məni tam tərk etdi. Qürur hissim elə məqamındaca qorxu hissimi üstələdi və səhnəyə cəsarətlə çıxdım. Ailə üzvlərimizin gözləri  mənə dikilmişdi. Anam hamıdan  çox həyəcanlı idi. Dünya bəstəkarlarının əsərlərini səsləndirdikcə,  tamaşaçıların baxışlarında razılıq hisslərini oxuduqca sanki coşur, daha da cəsarətlənirdim.  Anam, atam, qardaşım tez-tez durur və  əl işarələri ilə “bravo”, “bravo”- deyə qışqırırdılar. Nəticə də sevindirici oldu və mən Qran -pri mükafatına layiq görüldüm.

“Əhsən, qızım, üçrəngli bayrağımızı göylərə qaldırdın”

Bu festivalda, dediyim kimi, ölkəmizi mən təmsil edirdim. Polyaklar, bolqarlar çox mehriban idilər. Onlarla ünsiyyət qurduq. Gimnaziyamızda təhsil alan, çoxlu  sayda beynəlxalq yarışlarda qalib olan istedadlı dostlarım barədə onlara məlumat verdim. Azərbaycandan apardığımız hədiyyələri onlara bağışladıq. Ayrılarkən çox məyus olmuşduq.  Beynəlxalq  yarışlara qatılmaq  sevindirici olduğundan qat-qat artıq məsuliyyətlidir. Daha böyük uğurlara imza atacağıma həm müəllimlərimə, həm də valideynlərimə söz vermişəm. Anamın  qaliblər sırasında adımı eşidən vaxt gözlərindən axan yaşı heç vaxt unutmaram. Düzdür, bu sevinc göz yaşları idi, ancaq eyni zamanda, müqayisəolunmaz dərəcədə təsirləndirici idi. O, - əhsən, qızım, sən üçrəngli bayrağımızı göylərə qaldırdın! - deyərək qeyri-ixtiyari  qışqırırdı.

Tarixi abidələr haqqında məlumatlar topladıq

Polşanın Krakov şəhərində 3 gün qaldıq, orada  park və xiyabanlarda olduq. Şəhərin mədəniyyəti ilə tanış olduq, incəsənəti və tarixi abidələri  haqqında  məlumatlar topladıq. Qeyd edim ki, Krakov Polşanın elm, incəsənət və mədəniyyət mərkəzi, eləcə də bir çox tarixi hadisələrin şahidi olduğuna görə bu ölkənin qəlbi hesab olunur. Şəhər öz gözəlliyi ilə turistləri də özünə cəlb edir. Dünyanın ən qədim ticarət mərkəzlərindən biri olan Cloht Hall burada yerləşir.

Sinfimizdə 10 nəfər musiqi ilə məşğul olur

Sinfimizdə təhsil alan 29 şagirdin  10  nəfəri  musiqi ilə  məşğul olur. Bəzən dərsdən sonra biz yığışıb  milli və dünya bəstəkarlarınin əsərlərindən  parçalar ifa edirik. Qonşu sinfin  uşaqları da bizə qoşulurlar. Onlar üçün  də ritmik mahnılar ifa edirik. Sinif  rəhbərimiz İnarə Hümmətova  ifa etdiyimiz mahnıları dinlədikcə bizimlə qürrələndiyini dilə gətirir. Deyir ki, mən sizinlə   fəxr edirəm, çünki əvəzsiz istedad sahiblərisiniz.

Bacım və qardaşım da gimnaziyada təhsil alırlar

Qeyd edim ki, bacım Samidə və qardaşım Mirxətai də bizim gimnaziyada oxuyurlar. Onlar da qeyri-adi istedad sahibləridir. Bacım da  mənim kimi  fortepiano ixtisası üzrə təhsil alır.  O da beynəlxalq müsabiqələr  qalibidir.  Qardaşım isə klarnetdə ifa edir.

İlk baxışda asan görünən, əslində isə nəfəs  alətləri içərisində ən çətini sayılan, xüsusi  bacarıqla nəfəs ötürmələri, notlarla  üfürülən havanın ahəngini düzgün müəyyənləşdirmək bacarığı tələb olunan bu alətin  sirlərinə hər şagird asanlıqla yiyələnə bilmir.  Mirxətai ilk gündən bu alətin öhdəsindən gəlib.  O, həm bacarıqlıdır, həm də  inadkardır.  O, sübut edir  ki, gərgin əmək sayəsində çətinlikləri dəf etməklə, klarnet ifaçılığı sahəsində də uğurlara  imza atmaq olar.

Onun 8 medalı var

Qardaşım  eyni zamanda idmanın qılıncoynatma növü ilə məşğul olur. 8 qızıl medalı var. Bir çox ölkələrdə  qılıncoynatma yarışlarına qatılaraq birincilik qazanıb. 2019-cu ildə Türkiyədə keçirilən qılıncoynatma yarışlarında iştirak edərək III yeri qazanıb və bürünc medalla mükafatlandırılıb. Gürcüstanda, Avropada uşaqlar arasında keçirilən qılıncoynatma yarışlarında həmişə qalib olaraq I yeri tutub.

Nadir istedad sahiblərindən olan bu yeniyetmə qızın  öz uğurları ilə bərabər ailəsinin başqa üzvlərinin-bacı və qardaşının da müxtəlif sahələrdə  qazandıqları nailiyyətlər  barədə   ürəkdolusu danışığı ruhuma  rəng qatır, sevinc hissimi coşdururdu. Çünki  belə mötəbər yarışlarda qələbə sevincini bütöv bir xalq  yaşayır - Azərbaycan xalqı! 

Sifai SƏFƏROVA