Ali məktəblərə qəbul imtahanlarının nəticələri müzakirə olundu

Yanvarın 10-da Tələbə Qəbulu üzrə Dövlət Komissiyası Bakı şəhəri 1 nömrəli orta məktəbdə 2007-2008-ci tədris ili üçün ali məktəblərə qəbul imtahanlarının elmi-statistik təhlilinə həsr olunmuş zona müşavirəsi keçirdi.

Müşavirədə təhsil naziri Misir Mərdanov, Tələbə Qəbulu üzrə Dövlət Komissiyasının sədri Məleykə Abbaszadə, Bakı Şəhəri üzrə Təhsil İdarəsinin müdiri Nailə Rzaquliyeva, tanınmış alimlər, ekspertlər, paytaxtın ayrı-ayrı rayonlarının qabaqcıl məktəblərinin direktorları, müəllimlər və KİV nümayəndələri iştirak edirdilər.

Tədbiri təhsil naziri Misir Mərdanov giriş sözü ilə açaraq  artıq ilk ayını yaşadığımız təzə ilin hamı üçün uğurlu olmasını arzulayıb bütün təhsil işçilərinə ən xoş istəklərini çatdırdı. Təhsil naziri yola saldığımız 2007-ci ilin əlamətdar hadisələrlə, xüsusilə təhsil sahəsində qazanılan uğurlarla yaddaqalan olduğunu deyərək, əldə olunan nailiyyətlərin sayının bu il daha çox olmasını arzuladı.

Sonra çıxış üçün söz Tələbə Qəbulu üzrə Dövlət Komissiyasının sədri Məleykə Abbaszadəyə verildi. Məleykə xanım 2007-2008-ci tədris ili üçün keçirilmiş qəbul imtahanlarının elmi-statistik təhlilinə dair ətraflı məruzə etdi. Bakı şəhərinin 2007-ci il məzunlarının qəbul imtahanlarındakı nəticələrinə dair statistik məlumatı müşavirə iştirakçılarının diqqətinə çatdırdı. Bildirdi ki, 2007-ci ildə Bakı şəhərinin orta ümumtəhsil məktəblərini 26953 şagird bitirib. Onlardan 87,29 faizi (23528 nəfəri) ali məktəblərə sənəd verib. Qəbul imtahanlarının nəticələrinə əsasən şəhərin 9025 məzunu (sənəd verənlərin 38,47 faizi) tələbə adını qazanıb. Onlardan 40,42 faizi (3648 nəfəri) dövlət ali məktəblərinin ödənişsiz, 47,61  faizi (4297 nəfəri) ödənişli ixtisaslarına, 11,97 faizi (1080 nəfəri) isə özəl ali məktəblərə qəbul olunub. Bakı şəhərinin məzunlarının 1973 nəfəri 500-dən, o cümlədən 506 nəfəri 600-dən yuxarı bal toplayıb. Abituriyentlərin ən çoxu Azərbaycan Dövlət İqtisad Universiteti və Bakı Dövlət Universitetinə qəbul olunub.  

Qəbul imtahanlarında 297 Bakı məktəbinin məzunları iştirak edib. Bu il respublika üzrə yaxşı məktəblərin sırasına Bakı şəhərinin Texniki Humanitar liseyi, 72 nömrəli məktəb-liseyi, 291 nömrəli "Araz" ekologiya liseyi, 289 nömrəli "Zəngi" liseyi, 287 nömrəli "Zəkalar" liseyi, 43 nömrəli bağça-məktəb-lisey kompleksi, 304 nömrəli orta məktəb, 2 nömrəli orta texniki və humanitar elmlər liseyi, 261 nömrəli məktəb-lisey, 17, 23, 27, 30, 54, 134, 138, 145, 147, 160, 204, 214, 240, 245, 249, 258 və 282 nömrəli orta məktəblər daxil olub.

Azərbaycan bölməsi üzrə bütün imtahan fənlərindən göstəricilər respublika üzrə göstəricilərdən yuxarıdır. Abituriyentlərin qəbul imtahanlarında topladıqları orta bal 232,451-ə bərabərdir. Rus bölməsi üzrə də bütün imtahan fənlərindən göstəricilər respublika üzrə orta göstəricilərdən yuxarıdır. Abituriyentlərin qəbul imtahanlarında topladıqları orta bal 302,054-ə bərabərdir.

Bakı şəhəri üzrə abituriyentlər əsasən III ixtisas qrupuna üstünlük verirlər. Ən çox sənəd III qrup üzrə təqdim olunub - 8260 nəfər. Onlardan 2473-ü ali məktəblərə daxil olub. Bakı abituriyentlərinin seçdikləri ixtisaslar arasında 2-ci yerdə I qrup ixtisasları gəlir. Bu qrup üzrə 7587 abituriyent sənəd təqdim edib. Onlardan 2904-ü ali məktəbə daxil olub. 3-cü yerdə II qrup ixtisasları gəlir. Həmin qrup üzrə imtahanda iştirak edən 4760 abituriyentdən 2669-u ali məktəbə qəbul olunub. Abituriyentlərin ən az seçdikləri ixtisaslar IV qrupa aiddir. Bu qrup üzrə 2851 abituriyent imtahanda iştirak edib. Onlardan 979-u ali məktəbə daxil olub.

Bütün bunlar və digər məsələlər haqqında ətraflı danışan Məleykə xanım daha sonra ali məktəblərə builki qəbulun nəticələrinin keçənilki nəticələrlə müqayisəli təhlilini apardı.

TQDK sədri rəhbərlik etdiyi qurumun gördüyü işlərdən də ətraflı bəhs etdi. çıxışının sonunda 2008-ci ildə ali məktəblərə qəbulda olan yeniliklər barədə müşavirə iştirakçılarına geniş məlumat verdi.

Sonra Bakı Şəhəri üzrə Təhsil İdarəsinin ümumi təhsil  şöbəsinin müdiri Firudun Həmzəyevin Bakı şəhərinin 2006-2007-ci il məzunlarının ali məktəblərə qəbulunun nəticələri ilə bağlı məlumatları dinlənildi.

Müşavirəni təhsil naziri Misir Mərdanov yekunlaşdıraraq Tələbə Qəbulu üzrə Dövlət Komissiyasının sədrinin verdiyi məlumatların olduqca vacib və əhəmiyyətli olduğunu deyərək, hər bir təhsil işçisinin, xüsusilə orta təhsil müəssisələrinin direktorlarının öz işlərinə daha ciddi və məsuliyyətlə yanaşmalarını tövsiyə etdi.

Samirə KƏRİMOVA