Növbəti yeni bağça istifadəyə verildi

Aprelin 16-da paytaxtın Səbail rayonunun 20-ci sahəsində yeni inşa olunmuş 332 nömrəli körpələr evi-uşaq bağçasının açılışı oldu.

Bu münasibətlə keçirilən mərasimdə təhsil naziri Misir Mərdanov, Səbail rayon icra hakimiyyətinin başçısı Sahib Ələkbərov, Bakı Şəhəri üzrə Təhsil İdarəsinin müdiri Nailə Rzaquliyeva, idarənin məsul işçiləri və  qonaqlar iştirak edirdilər.

Qeyd edək ki, uşaqların istifadəsinə verilən yeni məktəbəqədər təhsil müəssisəsi də Bakı şəhərinin qəsəbələrinin 2006-2007-ci illər üzrə sosial-iqtisadi  inkişafının sürətləndirilməsinə dair tədbirlər proqramına  uyğun olaraq tikilib.

Təhsil naziri Misir Mərdanov bağçanın rəmzi açılışını bildirən qırmızı lenti kəsib bu münasibətlə hamını təbrik etdi.Sonra  nazir Misir Mərdanov, Səbail Rayon İcra Hakimiyyətinin başçısı Sahib Ələkbərov və digər qonaqlar məktəbəqədər təhsil müəssisəsi ilə ətraflı tanış oldular.

Körpələr evi-uşaq bağçasının müdiri Lalə Qənbərovanın verdiyi məlumatdan aydın oldu ki, 115 uşaq üçün nəzərdə tutulan məktəbəqədər təhsil müəssisəsi 6 qrupluqdur. Uşaqların tərbiyəsi ilə 12 tərbiyəçi və 6 tərbiyəçi köməkçisi məşğuldur. Tərbiyəçilərin hamısı ali təhsilli, öz sənətini, uşaqları sevən təhsil işçiləridir.

Müdirin bağça haqqında məlumatından sonra təhsil naziri və qonaqlar körpə,  kiçik, orta, məktəbəqədər hazırlıq qruplarına, yataq otaqlarına baş çəkdilər. Ən müasir avadanlıqlarla, oyuncaqlarla təmin olunmuş məşğələ otaqlarında uşaqların rahat məşğul olmaları  üçün hər cür şərait yaradılıb .Buradakı mühit uşaqlar üçün əsl evi xatırladır. Müasir standartlara tam cavab verən  ikimərtəbəli bağçanın yaraşıqlı dəhlizləri, qrup otaqları göz oxşayır. Məktəbəqədər təhsil müəssisəsində yüksək zövqlə aparılmış tərtibat işləri orijinallığı ilə xüsusi diqqət çəkir. Bağçanın müxtəlif məişət avadanlıqları ilə təchiz olunan mətbəxi genişliyi və rahatlığı ilə fərqlənir.Müəssisənin özünün ayrıca  istilik sistemi var.

Bağça ilə ətraflı tanış olan nazir Misir Mərdanov burada uşaqlar üçün yaradılan şəraitdən razı qaldığını, görülən işlərin onu qane etdiyini söylədi.

Geniş və yaraşıqlı musiqi zalına gələn təhsil nazirini, qonaqları salamlayan balacalar  şeir və mahnılarla çıxış etdilər. Uşaqlar və valideynlərlə səmimi söhbət edən nazir son  illər məktəbəqədər təhsil müəssisələrinin tikintisinə diqqətin artdığını deyərək ölkə başçısı cənab İlham Əliyev tərəfindən uşaqlara göstərilən qayğını yüksək qiymətləndirdi. Qeyd etdi ki, bir-birindən gözəl və keyfiyyətli tikilən bağçalarda  uşaqlara yüksək səviyyədə xidmət göstərilməlidir. Misir  Mərdanov bununla bağlı məktəbəqədər təhsil müəssisəsinin pedaqoji kollektivinə öz tövsiyələrini verərək onlara işlərində uğurlar arzuladı.

Məktəbəqədər təhsil müəssisəsinin pedaqoji kollektivini,mərasimdə iştirak edən bütün qonaqları əlamətdar hadisə münasibətilə təbrik edən Səbail rayon icra hakimiyyətinin başçısı Sahib Ələkbərov belə bir bağçanın tikilib istifadəyə verilməsini bu ərazidə yaşayan aztəminatlı ailələrin uşaqlarına gözəl bir töhfə olduğunu dedi.

Mərasimin sonunda təhsil naziri və qonaqlar bağçanın pedaqoji kollektivinin üzvləri və uşaqlarla xatirə şəkli çəkdirdilər. 

Samirə KƏRİMOVA