70 yaşlı "təzə məktəb"

Paytaxtın Maştağa qəsəbəsində yerləşən C.Cabbarlı adına 187 nömrəli məktəbin 70 illik yubileyi keçirildi. Tədbirdə təhsil naziri Misir Mərdanov, Bakı Şəhəri üzrə Təhsil İdarəsinin müdiri Nailə Rzaquliyeva, millət vəkilləri, Sabunçu rayon icra hakimiyyəti başçısının müavini, tanınmış ziyalılar, qəsəbə ağsaqqalları, məktəbin məzunları, qabaqcıl təhsil işçiləri və digər şəxslər iştirak edirdi.

öncə məktəblilərin əl işlərindən ibarət sərgi ilə tanış olan qonaqlar, sonra sinif otaqlarına və şagirdlərin nümunəvi idman çıxışlarına baxdılar.

Yubiley tədbirini açıq elan edən 187 nömrəli məktəbin direktoru Nailə Məmmədova məktəbin 70 illik tarixinə nəzər salaraq görülmüş işlərdən, qazanılmış nailiyyətlərdən danışdı, problemlərə toxundu, qəsəbə sakinləri tərəfindən həmişə "təzə məktəb" kimi qəbul edilən təhsil ocağının yetirmələrindən söz açdı. Qeyd etdi ki, 187 nömrəli məktəb 1200 şagird yerlik olsa da, hazırda burada 2662 şagird təhsil alır. Sonra direktor Təhsil Nazirliyinin bu sistemdə apardığı uğurlu islahatları önə çəkdi. Məktəbin 70 illik fəaliyyətini əks etdirən süjetin nümayişindən sonra söz təhsil naziri Misir Mərdanova verildi.

Cənab nazir tədbir iştirakçılarını salamlayıb 187 nömrəli 70 yaşlı "Təzə məktəb"in kollektivini yubiley münasibətilə təbrik etdi. Misir Mərdanov dedi: Bu gün məktəbin həyətinə baxarkən biz qərara aldıq ki, bina qısa müddətdə əsaslı təmir olunmaqla təhsil müəssisəsinin həyətində 4 mərtəbəli korpus tikilməlidir.

Qəsəbədə bir neçə təhsil ocağı olsa da, bu məktəb həmişə digərlərindən fərqlənib. Qəsəbənin tanınmış adamları vaxtilə burada təhsil alıblar. Nazir təhsil ocağının sabiq direktoru, məktəbə rəhbərlik etdiyi uzun illər ərzində onun inkişafı, təhsilin keyfiyyətini yüksəltmək üçün xeyli işlər görmüş Səyyarə Zeynalovanı xatırlayaraq təhsil ocağının yeni rəhbərinin də bu işləri uğurla davam etdirəcəyinə ümid etdiyini bildirdi.

ümummilli lider Heydər Əliyev və Prezident İlham Əliyevin ölkənin, o cümlədən təhsil sisteminin inkişafına göstərdikləri qayğıdan danışan nazir, YUNESKO və İSESKO-nun xoşməramlı səfiri, Heydər Əliyev Fondunun prezidenti, millət vəkili Mehriban xanım Əliyevanın son illər ölkədə məktəb tikintisi sahəsində gördüyü irimiqyaslı işlərə də toxundu. Təhsilin səviyyəsinin qaldırılmasında cəmiyyətin xüsusi rol oynadığını bildirən nazir, ölkə üçün əsl vətəndaşın yetişdirilməsinin vacibliyinə diqqət çəkdi, bununla bağlı lazımi tövsiyələrini verdi, müəllim nüfuzunun qaldırılmasının zəruriliyini vurğuladı.

Sonra Misir Mərdanov Bakı Şəhəri üzrə Təhsil İdarəsinin təqdimatı əsasında məktəbin bir neçə müəlliminə nazirliyin "Azərbaycan Respublikası qabaqcıl təhsil işçisi" döş nişanı və Fəxri fərmanlarını təqdim etdi.

Mərasimdə millət vəkili Eldar Quliyev, şair Söhrab Tahir, yazıçı Əlibala Hacızadə, BŞTİ-nin müdiri Nailə Rzaquliyeva və başqaları çıxış edərək təbriklərini çatdırdılar.

Məktəblilər tədbirin bədii hissəsindəki çıxışlarında ana, Vətən, dövlət başçısı və müəllimlərinə məhəbbətlərini ifadə etdilər. Yubiley tədbirinin sonunda məktəbin direktoru N.Məmmədova çıxış edərək nazir Misir Mərdanova və digər qonaqlara minnətdarlığını bildirdi.

Fazil İDRİSOĞLU,

fotolar müəllifindir