|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Azərbaycan müəllimlərinin XIII qurultayı Sentyabrın 22-də Azərbaycan müəllimlərinin
XIII qurultayının nümayəndələri ümummilli lider
Heydər Əliyevin adına Sarayın qarşısındakı
bağa toplaşaraq ulu öndərin abidəsi önünə
tər çiçək dəstələri qoydular. Saat 10.00-da Azərbaycan Dövlət Akademik
Opera və Balet Teatrında ümumilikdə XIII, müstəqillik
dövründə III qurultay öz işinə başladı. Ali
məclisin açılışında Azərbaycanın
təhsil naziri, professor Misir Mərdanov giriş nitqi söylədi: - Hörmətli
həmkarlar! Əziz qonaqlar! Yüz ildən artıq bir müddətdə
Azərbaycanın ictimai-siyasi və mədəni həyatında
mühüm rol oynamış, bir çox tarixi tədbirlərin
şahidi olan bu möhtəşəm salonda bu gün
Azərbaycan müəllimlərinin XIII qurultayı öz işinə
başlayır. Mən bu əlamətdar hadisə münasibətilə
qurultay nümayəndələrini, hörmətli qonaqlarımızı,
ölkəmizin pedaqoji ictimaiyyətini və bütün xalqımızı
səmimi-qəlbdən təbrik edir, qurultayımızın
işinə uğurlar arzulayıram. Hörmətli həmkarlar! İndiyədək
keçirilmiş qurultayların hər biri ölkəmizin
təhsil salnaməsinin şanlı
səhifələridir. İnanıram ki, Azərbaycan müəllimlərinin
bu qurultayı da millətimizin gələcəyi olan
təhsilin inkişafına yönəlmiş
əhəmiyyətli qərarlar qəbul etməklə
maarifçilik tariximizə davamlı islahatlar
mərhələsi kimi daxil olacaqdır. Qurultay hamımız üçün əziz olan
bayramlar ərəfəsində keçirilir. Oktyabrın 5-i
Beynəlxalq Müəllim Günü, oktyabrın 18-i isə Dövlət
Müstəqilliyi Günüdür. Fürsətdən istifadə
edərək bu əlamətdar bayramlar münasibətilə
hamınızı ürəkdən təbrik edir, şərəfli
işinizdə yeni-yeni nailiyyətlər arzu edirəm. Hörmətli nümayəndələr və
qonaqlar! Qurultayımızın işində
Azərbaycan Respublikası Prezidentinin İcra Aparatının
Humanitar siyasət məsələləri şöbəsinin
müdiri Fatma xanım Abdullazadə, Baş nazirin müavini Elçin
Əfəndiyev, Milli Məclis sədrinin birinci müavini
Ziyafət Əsgərov, sədr müavini Bahar Muradova,
parlamentin komissiya sədrləri və millət
vəkilləri, nazirlər, yaradıcı təşkilatların,
səfirliklərin, Dünya Bankının, qeyri-hökumət
təşkilatlarının numayəndələri iştirak
edirlər. İcazə verin, öz adımdan və sizin adınızdan
qonaqlarımızı bir daha salamlayım və onlara
"Qurultayımıza xoş gəlmişsiniz" deyim. Hörmətli qurultay iştirakçıları! Azərbaycan müəllimlərinin XIII qurultayına
ölkəmizin bütün bölgələrindən 878 nümayəndə
seçilmişdirE Yetərsay vardır. Təklif olunur ki,
qurultay öz işinə başlamaq üçün səlahiyyətli
hesab edilsin. Kim bu təklifə razıdırsa, xahiş
edirəm, səs verin (səsvermə gedir). Etiraz edən,
bitərəf qalan varmı? Yoxdur! İcazə verin, öz işinə başlamaq
üçün səlahiyyətli hesab olunduğundan Azərbaycan müəllimlərinin
XIII qurultayını açıq elan edim! Giriş nitqindən sonra
məktəblilərin ifasında Azərbaycanın Dövlət
himni səsləndi. Sonra Misir Mərdanovun təklifi ilə keçən
qurultaydan ötən müddətdə dünyasını dəyişmiş
təhsil işçilərinin əziz xatirəsi bir
dəqiqəlik sükutla yad edildi. Qurultayın işini səmərəli
təşkil etmək üçün katiblik, redaksiya heyəti
və mandat komissiyası seçilməsi təklif olundu. Xaçmaz
rayonu Xudat şəhər 2 nömrəli məktəbin sinif
müəllimi Nəzakət Kərimovanın təklifi
ilə 7 nəfərdən ibarət katiblik, Bakıdakı
T.İsmayılov adına 6 nömrəli "İntellekt"
məktəb-liseyin direktoru Ceyran Kuliyevanın təklifi
ilə 9 nəfərdən ibarət redaksiya heyəti,
Tovuz rayonu çobansıxnaq kənd orta məktəbinin kimya müəllimi
Talıb Mahmudovun təklifi ilə 7 nəfərdən
ibarət mandat komissiyasının tərkibi elan olundu.
Hər üç tərkib səsvermə yolu ilə seçildi. Professor Misir Mərdanov elan etdi ki,
Azərbaycan Respublikasının Prezidenti İlham Əliyev
qurultayın iştirakçılarına təbrik məktubu
ünvanlamışdır. Azərbaycan Respublikası
Prezidentinin İcra Aparatının Humanitar siyasət
məsələləri şöbəsinin müdiri Fatma xanım
Abdullazadə təbrik məktubunu oxudu. (Təbrik
məktubunun mətni qəzetin bugünkü sayında dərc
olunur). ölkə başçısının təbrik
məktubunu Azərbaycan təhsilinə, ümumilikdə
təhsil işçilərinə diqqət və qayğının
təzahürü kimi dəyərləndirən təhsil naziri
respublika Prezidentinə təhsil ictimaiyyəti adından
dərin təşəkkürünü bildirdi. XIII qurultayın gündəliyində aşağıdakı
məsələlər nəzərdə tutulmuşdu: 1.Azərbaycan Respublikası təhsil
nazirinin Azərbaycan müəllimlərinin XIII qurultayına
hesabat məruzəsi. 2. Mandat komissiyasının hesabatı. 3.Qurultayın yekun sənədlərinin
qəbul olunması. Gündəliyi təsdiq edən nümayəndələr
məruzə, çıxışlar və arayış üçün
reqlamentləri qəbul etdi. İclasa sədrlik edən İradə
Rəhimli (Bakıdakı 23 nömrəli məktəbin
direktoru) mandat komissiyası, katiblik və redaksiya
heyətinin öz işinə başlamasını təklif
edib, ötən müddət ərzində təhsil quruculuğu
sahəsində aparılan islahatyönümlü işlər, mövcud
problemlərin həlli və perspektivlər barədə
məruzə etmək üçün sözü Azərbaycan Respublikasının
təhsil naziri, professor Misir Mərdanova verdi. (Əməkdar elm xadimi Misir Mərdanovun
hesabat məruzəsi qəzetin bugünkü nömrəsində
dərc olunur). Dəfələrlə alqışlarla qarşılanan
məruzədən sonra mandat komissiyasının sədri
Faiq Şahbazlının hesabatı dinlənildi. (Hesabat
məruzəsi gələn nömrədə dərc olunacaq). Qurultaya yenidən sədrlik edən
təhsil naziri Misir Mərdanov təbrik üçün sözü
Azərbaycan Yazıçılar Birliyinin sədri, xalq yazıçısı
Anara verdi. Sonra Azərbaycan Milli Elmlər Akademiyasının
prezidenti, akademik Mahmud Kərimov təhsil işçilərini
MEA-nın əməkdaşları adından təbrik
etdi. Türkiyə dövlət və hökumət
rəhbərlərindən gəlmiş təbrikləri Türkiyənin
Azərbaycandakı səfirliyinin təhsil müşaviri
Səlahəddin Dikmen, Dünya Bankının Cənubi Qafqaz
ölkələri üzrə direktoru xanım Donna Douset Koyrolanın
təbrik məktubunu Dünya Bankının Azərbaycan üzrə
meneceri Qreqori Yedjeyçak təqdim etdilər. (Təbriklər
bu nömrədə dərc olunur). Məruzə ətrafında müzakirələr
başlandı. Naxçıvan MR təhsil naziri Piri Nağıyev,
Milli Məclisin Elm və təhsil daimi komissiyasının
sədri, Azərbaycan İqtisad Universitetinin rektoru,
professor Şəmsəddin Hacıyev, TQDK-nın sədri
Məleykə Abbaszadə, Azərbaycan Respublikası
Prezidenti yanında Dövlət İdarəçilik Akademiyasının
rektoru, professor Seyfəddin Qəndilov, S.C.Pişəvəri
adına humanitar fənlər gimnaziyasının ibtidai
sinif müəllimi Aybəniz İbrahimova, ADPU-nun pedaqoji fakültəsinin
dekanı, professor Fərrux Rüstəmov, Bakı Şəhəri
üzrə Təhsil İdarəsinin müdiri Nailə
Rzaquliyeva, Bakıdakı 12 nömrəli peşə liseyinin
direktoru Şərif Hacıyev, Bakıdakı 332 nömrəli
uşaq bağçasının müdiri Lalə
Qəmbərova, Azərbaycan Dövlət Pedaqoji Kollecinin
direktoru, professor Nurlana Əliyeva, Sumqayıt ŞTŞ-ın
müdiri Vidadi Bağırov, Bakıdakı 18 nömrəli
məktəbin Valideyn-Müəllim Assosiasiyasının
sədri Azər Hətəmov, Azərbaycan Uşaq Hüquqları
Alyansının sədri Nabil Seyidov, Heydər Əliyev adına
liseyin direktoru Fikrət Xəlilov, Bakı Avropa Liseyinin müəllimi
Xumar Əhmədbəyli, Şəmkir rayonu Zəyəm Cırdaxan
kənd 1 nömrəli orta məktəbin müəllimi Ruslan
İbrahimov, Zaqatala humanitar fənlər gimnaziyasının
müəllimi Bahar İsmayılova, Lənkəran şəhər
4 nömrəli məktəbin direktoru Yeganə Əsgərova,
Gəncə şəhər 22 nömrəli orta
məktəbin sinif müəllimi Afaq Əliyeva, Bakıdakı
12 nömrəli İxtisaslaşdırılmış olimpiya
ehtiyatları uşaq-gənclər idman məktəbinin
direktoru Elçin Mehdizadə çıxış etdilər. (çıxışlar
qəzetin gələn nömrəsində dərc olunacaq). Qurultaya ABŞ dövlət katibinin təhsil
və mədəniyyət məsələləri üzrə
köməkçisi xanım Qoli Ameri, YUNESKO-nun Baş direktoru Koişiro
Matsuura, İSESKO-nun Baş direktoru Əbdüləziz Tüveycri,
Gürcüstan Respublikasının elm və təhsil naziri
Georgi Nodia, Açıq Cəmiyyət İnstitutu - Soros
Fondunun prezidenti Corc Soros, ABŞ-ın Beynəlxalq
təhsil üzrə Amerika Şurasının prezidenti Den
Devidson, Alman Akademik Mübadilə Xidmətinin baş katibi
Kristian Bode, YUNİSEF-in Mərkəzi və Şərqi
Avropa ölkələri üzrə regional direktoru Maria Kalivis,
Britaniya Şurasının Cənub-Şərqi Avropa ölkələri
üzrə direktoru Terri Touni, Beynəlxalq Addım-Addım
Assosiasiyasının direktoru Liana Gent tərəfindən
təbriklər göndərilmişdi. Qurultayın sonunda Əsgər Quliyev ali məclisin qətnaməsini, Təranə Hacıyeva Azərbaycan müəllimlərinin xalqa müraciətini oxudular. |