Noyabrın 24-də Azərbaycan Dövlət Pedaqoji Universitetində professor A.Verdizadənin 95 illik yubileyinə həsr olunmuş "üzvi reagentlər analitik kimyada" mövzusunda respublika konfransı  keçirildi.

 Konfransda ADPU-nun professor-müəllim heyəti, ali məktəb rəhbərləri,  tələbələr və KİV nümayəndələri iştirak edirdilər.

Tədbiri giriş sözü ilə açan ADPU-nun rektoru, professor Y.Məmmədov bildirdi ki, konfrans Azərbaycanın  görkəmli alimi, analitik kimya sahəsində tanınmış mütəxəssis, kimya elmləri doktoru, professor Allahverdi Verdizadənin anadan olmasının 95 illik yubileyinə həsr olunub.

Qeyd olundu ki, ADPU-da  fəaliyyət göstərən Analitik və fiziki kimya kafedrasını 1969-cu ildə məhz professor A.Verdizadə təşkil etmiş və ilk gündən ömrünün sonuna  qədər həmin kafedraya rəhbərlik etmişdir.

O, görkəmli alim olmaqla bərabər, çox gözəl pedaqoq idi. Professor A.Verdizadənin Azərbaycanda kimya elminin inkişafında, yeni kimyaçılar nəslinin yetişməsində böyük xidmətləri olmuşdur.

Tədbirdə BDU-nun rektoru, akademik A.Məhərrəmov, ADPU-nun professorlarından Ə.Qurbanov, T.Ağdamski və başqaları çıxış edərək professor A.Verdizadənin pedaqoji fəaliyyətindən və keçdiyi mənalı həyat  yolundan söz açdılar.  

Şakir CƏFƏROV,
ADPU-nun  dissertantı