Azərbaycan Prezidenti İlham Əliyev oktyabrın 29-da İsmayıllı rayonuna səfəri çərçivəsində İvanovka kəndində sakinlərlə görüşü zamanı kənd məktəbinin direktoru Nadejda Jabina məktəbə mikroavtobus verilməsini xahiş etmişdi. Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyeva bu məsələnin həllini öz üzərinə götürmüşdü.

Artıq Nadejda Jabinanın arzusu reallaşmış, Heydər Əliyev Fondu tərəfindən İvanovka kənd orta məktəbinə "Hyunday" markalı 28 yerlik avtobus hədiyyə edilmişdir. Avtobusun açarları məktəb direktoruna təntənəli surətdə təqdim olunmuşdur.

Bu münasibətlə keçirilən mərasimdə rayon icra hakimiyyətinin başçısı Nizami Ələkbərov, Milli Məclisin deputatı Novruzəli Aslanov çıxış edərək Prezident İlham Əliyevin bölgələrə göstərdiyi diqqət və qayğıdan, insanların istək və arzusuna göstərdiyi həssaslıqdan danışmışlar. Natiqlər Mehriban xanım Əliyevanın bu hədiyyəsini onun Azərbaycan məktəblərinin hamisi olduğuna bariz nümunə kimi dəyərləndirmişlər.

Kənd məktəbinin direktoru Nadejda Jabina çıxış edərək hədiyyə üçün Mehriban xanım Əliyevaya kollektiv adından minnətdarlığını bildirmişdir.

Sonra icra başçısı Nizami Ələkbərov avtobusun açarlarını N.Jabinaya təqdim etmişdir.