Fevralın 17-də Bakıdakı 53 nömrəli məktəbdə xalq şairi Zəlimxan Yaqubla görüş keçirildi.

Məktəbin direktoru F.Həsənova tədbir iştirakçılarını salamlayaraq bildirdi ki, şeirlərini sevə-sevə oxuduğumuz şair Zəlimxan Yaqubun bu günlərdə 60 yaşı tamam oldu. Elə bu münasibətlə dövlət başçısı cənab İlham Əliyev tərəfindən "Şərəf" ordeninə layiq görüldü. Şairin həm 60 illik yubileyini, həm də "Şərəf" ordenini təbrik etmək üçün onu təhsil ocağımıza dəvət etmişik.

Görüşdə çıxış edən BDU-nun müəllimi, professor Qara Namazov xalq şairi Zəlimxan Yaqubun həyat və yaradıcılığından ətraflı danışdı.

Sonra söz xalq şairi Zəlimxan Yaquba verildi. Şair onu təbrik etdikləri, görüşə dəvət etdikləri üçün məktəbin kollektivinə təşəkkür etdi. Daha sonra o qeyd etdi ki, yaşadığım 60 il olduqca mənalı, maraqlı, rəngarəng bir ömür olub. Ulu öndər  Heydər Əliyevin verdiyi "Şöhrət" ordeninə, möhtərəm Prezidentimizin verdiyi "Xalq şairi" adına və nəhayət, "Şərəf" ordeninə layiq görülmüşəm.

Şair görüşdə öz şeirlərini də söylədi. Şagird və müəllimlərin çoxsaylı suallarını ətraflı cavablandırdı. Son zamanlar çapdan çıxmış "Peyğəmbər" və "Böyük ömrün dastanı" adlı kitablarını məktəb kitabxanasına hədiyyə etdi.

Məktəbin şagirdlərinin şairin şeirləri əsasında hazırladıqları kompozisiya tamaşaçılarda xoş ovqat yaratdı.

Görüşdə Əbilov adına mədəniyyət evinin "Şəlalə" xalq çalğı alətləri ansamblının bədii rəhbəri Zamiq Əliyevin Zəlimxan Yaqubun sözlərinə bəstələdiyi mahnılar səsləndi. 

Ə.DAŞDƏMİRLİ