|
Martın 2-də "Avropa" otelində görkəmli
alim,əməkdar müəllim,fəlsəfə elmləri doktoru,
Azərbaycan Memarlıq və İnşaat Universitetinin
Tarix və sosial-siyasi fənlər kafedrasının
müdiri, professor Nurqələm Mikayıl oğlu
Mikayılovun 80 illiyinə həsr olunmuş yubiley
mərasimi keçirilib.Tədbirdə universitetin
professor-müəllim heyəti ilə bərabər, ölkənin
bir çox təhsil müəssisələrinin nümayəndələri,
ictimai-siyasi xadimlər iştirak edib.
Tədbiri giriş sözü ilə açan Az.MİU-nun rektoru,
millət vəkili, professor Gulçöhrə Məmmədova
Nurqələm Mikayılov haqqında danışaraq alimin
universitetin həyatında müstəsna xidmətləri
olduğunu nəzərə çatdırıb. O qeyd edib ki,
Nurqələm müəllim artıq 35 ildir bu təhsil
ocağında kafedra müdiridir. N.Mikayılov ağsaqqal
bir pedaqoq kimi həmişə gənc alimlərə dəstək
olmuş, onların inkişaf etməsində yaxından
köməklik göstərmişdir. Professor G.Məmmədova
çıxışının sonunda bütün universitet kollektivi
adından Nurqələm müəllimi yubileyi münasibətilə
səmimi-qəlbdən təbrik edərək, belə şərəfli ömür
yolunun hamıya qismət olmasını arzulayıb,
yubilyara gül buketi və hədiyyələr təqdim edib.
Sonra çıxış üçün söz təhsil nazirinin müavini,
professor İradə Hüseynovaya verilib. O, tədbir
iştirakçılarını salamlayaraq təhsil naziri Misir
Mərdanov və təhsil işçiləri adından Nurqələm
müəllimin 80 illik yubileyini təbrik edib.
İ.Hüseynova Nurqələm müəllimin elmi
fəaliyyətindən geniş söhbət açaraq bildirib
ki,onun əhatəli və dərin məzmunlu tədqiqatları
fəlsəfə elminin inkişafına dəyərli töhfə
olmuşdur. Onun alimlik bacarığı təkcə
respublikamızda deyil, onun hüdudlarından
kənarda da böyük maraq doğurub. Buna bariz
nümunə kimi 1986-cı ildə Moskvada Kreml
sarayında keçirilən ali təhsil müəssisələrinin
Ümumittifaq müşavirəsində N.Mikayılovun başçılıq
etdiyi kafedranın qabaqcıl kafedralardan biri
kimi qiymətləndirilməsini qeyd etmək olar.Bu
kafedranın fəaliyyəti SSRİ ali təhsil nazirinin
məruzəsinə daxil edilib.
İ.Hüseynova çıxışının sonunda Azərbaycan
Respublikası Təhsil Nazirliyi kollegiyasının 1
mart 2010-cu il tarixli qərarı ilə Azərbaycan
Memarlıq və İnşaat Universitetinin Tarix və
sosial-siyasi fənlər kafedrasının
müdiri,professor Nurqələm Mikayıl oğlu
Mikayılovun yüksək ixtisaslı kadrların
hazırlanması sahəsində səmərəli elmi-pedaqoji
fəaliyyətinə görə və anadan olmasının 80 illiyi
münasibətilə Fəxri fərmanla təltif edildiyini
bildirib.
Sonra çıxış üçün söz xalq şairi Nəriman
Həsənzadəyə verilib. Şair N.Mikayılov haqqında
xoş sözlər söyləyərək bildirib ki, o, böyük alim
və pedaqoq olmaqla yanaşı, həm də gözəl insan,
yaxşı ailə başçısı və sədaqətli dostdur.
N.Həsənzadə çıxışını bir neçə şeir söyləməklə
yekunlaşdırıb.
Mərasimdə digər çıxış edənlər alimin həyat
yolundan, elmi fəaliyyətindən söz açaraq onu 80
illik yubileyi münasibətilə təbrik ediblər.
Sonda N.Mikayılov tədbir iştirakçılarına
minnətdarlığını bildirərək mərasimin yüksək
səviyyədə hazırlanmasına görə Az.MİU-nun
rəhbərliyinə və kollektivinə xüsusi təşəkkür
edib.
Niyazi RƏHİMOV |
