|
"İnsanlar təbiətinə görə heç bir şeyi
başqasına vermək istəmirlər. Onlar təkcə bir
şeyi - öz biliklərini başqalarına verməyə
hərisdirlər. Bilik elə bir şeydir ki,
başqalarına bağışlanılmasa, onun sahibi dərdə
düşər, ömrü qüssə və kədər içində keçər".
Görkəmli mütəfəkkirimiz M.F.Axundova məxsus olan
bu müdrik deyimi təsadüfi olaraq yazımıza giriş
verməmişik. Haqqında danışmaq istədiyimiz Raya
Təhməzovanın ömür yolu, pedaqoji fəaliyyəti
misal gətirdiyimiz fikirlə tamamilə uyğundur.
Raya Ziyad qızı Təhməzova 1950-ci ildə Zəngilan
rayonunda anadan olub, 1970-ci ildə M.F.Axundov
adına Rus dili və Ədəbiyyatı İnstitutunu
bitirib. Tələbəlik illərində rus dili və
ədəbiyyatı fənninin sirlərinə yiyələnən Raya
Təhməzova pedaqoji fəaliyyətə başladığı gündən
bütün həyatını şagirdlərinə həsr edib. O vaxtdan
artıq 40 il keçir. O, hazırda Şirvan şəhərindəki
16 nömrəli orta məktəbdə rus dili və ədəbiyyat
müəllimi işləyir və öz işini böyük həvəs və
maraqla yerinə yetirir. Məktəbin kollektivi
arasında işinə yaradıcı yanaşan təcrübəli
pedaqoq kimi tanınır. Dərslərində interaktiv
təlim metodlarından bacarıqla istifadə edir və
tədris etdiyi fənni şagirdlərə sevdirə bilir.
O, işlədiyi məktəbdə yaxşı müəllim olmaqla
bərabər, həm də nümunəvi sinif rəhbəridir. Onun
rəhbərlik etdiyi IX "Q" sinfinin şagirdləri Raya
müəllimi özlərinə yaxın dost, ikinci ana hesab
edirlər. Çünki o, dərs dediyi şagirdləri həmişə
düzlüyə, bütövlüyə, dosta sadiqliyə,
valideynlərin adını uca tutmağa və Vətənə
layiqli övlad olmağa çağırır. Yetirmələri də
harada olmalarından asılı olmayaraq, müəllimləri
ilə əlaqə saxlamağı heç vaxt unutmurlar. Buna
səbəb də Raya müəllimin, özünün dediyi kimi,
sənətinin vurğunu olması və dərs dediyi
şagirdlərini öz övladı kimi sevməsidir.
Raya müəllimi qarşıdan gələn 8 Mart Beynəlxalq
Qadınlar Günü və anadan olmasının 60 illiyi
münasibətilə ürəkdən təbrik edir, ona pedaqoji
fəaliyyətində yeni-yeni uğurlar arzulayırıq.
Şakir CƏFƏROV |
