Gənclərin çağırışaqədərki hazırlığına diqqət
artırılır
Ölkəmizdə uğurla davam edən yeni cəmiyyət
quruculuğunda ən ümdə məsələlərdən biri gənc
nəslin vətənpərvərlik ruhunda yetişdirilməsi,
onlarda təhsilə, elmə marağın daha da
artırılması və geniş dünyagörüşünün
formalaşdırılmasıdır. Yeniyetmələrin ümumtəhsil
məktəblərində hərbi xidmətə hazırlanmasını
nəzərdə tutan gənclərin çağırışaqədərki
hazırlığı fənninin tədrisi bu baxımdan xüsusi
əhəmiyyət kəsb edir.
Vətəni müdafiə etmək kimi şərəfli bir işə hazır
olmaq hər bir vətəndaşın borcudur. Ümummilli
liderimiz Heydər Əliyevin dediyi kimi: "Gəncləri
orduda xidmət etmək üçün tərbiyələndirmək bizim
əsas vəzifələrimizdən biri olmalıdır və bu
vəzifələri biz ardıcıl surətdə həyata
keçirməliyik ".
Azərbaycanın müstəqilliyinin, dövlətçiliyinin
günbəgün möhkəmlənməsi üçün savadlı, vətənpərvər
gənclərin yetişdirilməsində hamı fəallıq
göstərməli, həm ailədə, həm də məktəbdə uşaqlara
Vətənə məhəbbət hissi aşılanmalıdır. Bu baxımdan
Naxçıvan Muxtar Respublikası Şahbuz rayonu
A.Quliyev adına Kükü kənd orta məktəbində
gənclərin çağırışaqədərki hazırlığı fənninin
tədrisinin yüksək səviyyədə təşkili xüsusilə
diqqətəlayiqdir.
Məktəbin hərbi rəhbəri, leytenant Müşfiq
Hüseynov dərslərdə gənclərə Azərbaycan xalqının
zəngin dövlətçilik ənənələri barədə məlumat
verir, orta məktəb şagirdləri üçün Vətənə, xalqa
xidmətin, ilk növbədə, tədrisə ciddi
münasibətdən başlandığı fikrini dönə-dönə
vurğulayır. Şagirdləri çevik, cəsur olmağa
səsləyir, ən çətin məqamlarda belə çıxış yolu
tapmağın elmə, biliyə əsaslandığını real
həyatdan götürülmüş misallarla izah etməyə
çalışır.
Azərbaycan Respublikasının ərazi bütövlüyünün
bərpası, dövlətçiliyimizin möhkəmləndirilməsi
istiqamətində aparılan daxili və xarici siyasət,
bu sahədə qazanılan uğurlar haqqında gənc
müəllimdən məlumatlar alan şagirdlər Vətənin
müdafiəsinə hər an hazır olmağın gərəkliliyini
daha dərindən dərk edir, bir vətəndaş kimi
üzərlərinə düşən məsuliyyəti real şəkildə
dəyərləndirirlər. Onlar ərazi bütövlüyümüz
uğrunda canlarını fəda etmiş igid Vətən
oğullarının, Milli Qəhrəmanlarımızın həyatı və
göstərdikləri şücaətlər haqqında məlumatları
müzakirə edir, bu barədə əlavə ədəbiyyat və
məqalələr tapıb oxuyurlar.
Şagirdlərin marağını nəzərə alan Müşfiq Hüseynov
dərslərdə ermənilər tərəfindən 20 faiz
torpaqlarımızın işğal olunması, bir milyondan
artıq qaçqın və məcburi köçkünün yurd-yuvasından
didərgin düşməsi, 30 mindən artıq
azərbaycanlının şəhid olması, on minlərlə
vətəndaşın yaralanması, əlil olması və
xalqımızın başına gətirilən çoxsaylı vəhşiliklər
haqqında məlumatlara da geniş yer verir.
O, hələ uşaqlıqdan hərbi peşəyə marağı ilə digər
yaşıdlarından seçilib, məktəbdə gənclərin
çağırışaqədərki hazırlığı dərslərinə daha ciddi
yanaşıb. Vaxtilə Müşfiq Hüseynova dərs demiş
təqaüdçü, mayor Səməd Hüseynov onun bu fənni
daha dərindən mənimsəmək üçün daim xüsusi səy
göstərdiyini bildirir.
Orta məktəbi bitirdikdən sonra M.Hüseynov
Naxçıvan Dövlət Universitetinin ibtidai
hərbi-fiziki təlim fakültəsinə qəbul olunub. Ali
təhsilini başa vuraraq Kükü kənd orta məktəbində
hərbi rəhbər işləməyə başlayıb. İşlədiyi
müddətdə öz bacarığı və işə ciddi münasibəti ilə
şagirdlərin və pedaqoji kollektivin rəğbətini
qazanıb.
Gənclərin çağırışaqədərki hazırlığı fənninin
əsas məqsədi gəncləri ölkənin müdafiəsinə
hazırlamaq və onlara hərbi bacarıqları
mənimsətməkdən ibarətdir, - deyən gənc müəllim
ölkəmizin müharibə şəraitində olduğu indiki
vaxtda bu sahəyə diqqətin daha da artırılmasının
zəruriliyini qeyd edir. Bu baxımdan Azərbaycan
Respublikasının Prezidenti cənab İlham Əliyevin
rəhbərliyi ilə həyata keçirilən gənclər
siyasətinin layiqli nəticələr verdiyini, təhsil
müəssisələrində vətənpərvərlik tərbiyəsinə ciddi
yanaşıldığını bildirir.
Son illər gənclərin çağırışaqədərki hazırlığı
fənninin tədrisi üçün kifayət qədər əyani
vəsaitlər hazırlanıb. Bunun nəticəsidir ki, gənc
leytenant öz dərslərini daha maraqlı təşkil edə
bilir, nəzəri və praktiki məşğələlərə geniş yer
verir, vaxtaşırı şagirdlər sınaq imtahanlarına
cəlb olunurlar. Bu da onların bu sahədəki
biliklərinin daha da möhkəmlənməsinə, şagirdlər
arasında sağlam rəqabət mühitinin formalaşmasına
və gənclərin hərbi peşəyə meyil etməsinə əlavə
stimul verir.
Gənclərin çağırışaqədərki hazırlığı fənninin
tədrisinə yetirilən diqqətin nəticəsidir ki,
şagirdlər məktəbdə vaxtaşırı keçirilən hərbi
idman oyunlarına həvəslə qatılırlar. Kükü kənd
məktəbinin "Şahin" və "Cəsurlar" komandaları
dəfələrlə rayon səviyyəli yarışlarda yüksək
nəticələr əldə ediblər.
Əsmər CABBAROVA,
Naxçıvan MR Şahbuz rayonu A.Quliyev adına
Kükü
kənd orta məktəbinin müəllimi |