Təhsil Nazirliyinin 22 fevral 2010-cu il tarixli əmrinə müvafiq olaraq martın 17-18-də Bakı şəhərində fənn olimpiadalarının yekun turu keçirildi.   Kimya və biologiya fənləri üzrə bilik yarışlarına gələnlər ənənəvi olaraq Təhsil Nazirliyinin tabeliyindəki Kimya-biologiya təmayüllü liseydə öz biliklərini sınayırdılar. Burada olimpiadaya lazımi hazırlıq işləri görülmüşdü. Liseyin dördmərtəbəli əsas tədris korpusunun II mərtəbəsi biologiyadan, III mərtəbəsi isə kimyadan yarışanların ixtiyarına verilmişdi.

Final yarışları martın 18-də saat 9.00-da şagirdlərin bu məqsəd üçün ayrılmış otaqlarda yerləşdirilməsi ilə başlandı. Kimya və biologiya fənləri üzrə respublika münsiflər heyətlərinin sədrləri, professorlar Vaqif Abbasov və Ədalət Fərəcov olimpiadaların təşkili və keçirilməsinə bilavasitə rəhbərlik edirdilər. Onlara təşkilat komitəsinin üzvləri kömək göstərirdilər.

Şagirdlər onlar üçün ayrılmış sinif otaqlarında yerləşdirildikdən sonra olimpiada sualları onlara təqdim olundu, müvafiq izahatlar verildi. Hərəsi 5 sualdan ibarət tapşırıqların icrasına 3 saat vaxt ayrılmışdı. Cavablar elə həmin gün münsiflər heyəti üzvləri tərəfindən yoxlanıb qiymətləndiriləcəkdi.

Olimpiada gedən bir neçə otağa baxış keçirdik. Hər şey normal idi. Həzarətçilər yarışların təlimata uyğun keçməsinə, sakitliyin təmin olunmasına nəzarət edirdilər.

Öyrəndik ki, kimyadan ümumilikdə 150 şagird olimpiadanın yekun turunda iştirak edir. Onlardan 7-si dünya olimpiadasının qalibləridir. Onlar seçim turlarında iştirak etmədən birbaşa finala gəlmişdilər. Naxçıvan Muxtar Respublikasından bu fənn üzrə 19 şagird finala vəsiqə qazanmışdır. Yarış iştirakçılarından 49-u IX, 51-i X, 50-si isə XI sinif şagirdləri idi.

Biologiyadan isə finalçıların sayı 230-a qədər idi. Onlardan 36-sı Naxçıvan Muxtar Respublikasını, qalanı isə ölkənin digər bölgələrini təmsil edirdilər.

Bildirildi ki, biologiya fənni üzrə paytaxtın və bölgələrin ümumtəhsil məktəblərindən gəlmiş 193 şagird martın 17-də liseydə qeydiyyatdan keçsə də, final yarışlarında onların 162-si iştirak edir. Onlardan 56 nəfəri IX, 54-ü X, 52 nəfəri isə XI sinif şagirdidir.

Yeri gəlmişkən qeyd edək ki, kimya-biologiya təmayüllü liseydə olimpiadaya şagird gətirmiş təhsil işçiləri və övladları ilə gəlmiş valideynlər üçün də yaxşı şərait yaradılmışdı. Hava soyuq olduğundan liseyin zalı onların ixtiyarına verilmişdi. İstilik sistemi yaxşı işlədiyindən istər zalda, istərsə də olimpiada aparılan sinif otaqlarında normal hərarət vardı. Söhbət etdiyimiz valideyn və müəllimlər onlar üçün münasib şərait yaratdığına görə liseyin direktoru Mirhəsən Cavadovdan razılıq etdilər, olimpiadaya seçimin obyektiv aparıldığını, final iştirakçılarına qayğı ilə yanaşıldığını bildirdilər. 

Fizika və riyaziyyat fənləri üzrə olimpiadalar isə təhsil nazirinin   müvafiq əmrinə uyğun olaraq Fizika-riyaziyyat və informatika təmayüllü liseydə keçirilirdi.

Fizika fənni üzrə münsiflər heyətinin sədri Mirzəli Murquzovun verdiyi məlumata görə, olimpiadanın yekun turunda respublikanın ümumtəhsil məktəblərindən 104 şagird iştirak edirdi. Olimpiadanın obyektiv keçdiyini və heç bir təlimat pozuntusuna yol verilmədiyini söyləyən M.Murquzov cavabların yaxın günlərdə bilinəcəyini və rayon təhsil şöbələrinə göndəriləcəyini nəzərə çatdırdı.

Sonra riyaziyyat fənni üzrə respublika olimpiadasının yekun turunda iştirak etdik. Riyaziyyat üzrə münsiflər heyətinin sədri Rafiq Quliyev bizimlə söhbətində bildirdi ki, Naxçıvan MR daxil olmaqla, 168 şagird yekun turunda iştirak edir. Onlardan 31 nəfəri Naxçıvanda, 137 nəfəri isə burada cəmləşib. Sonda o, olimpiadada 12 nəzarətçinin olduğunu və turun keçirilməsi üçün 3 saat vaxt ayrıldığını qeyd etdi. 

Y.ƏLİYEV,
N.RƏHİMOV