Martın 30-da Azərbaycan Respublikası Təhsil Problemləri İnstitutunda "Şagird  nailiyyətlərinin  monitorinqi və qiymətləndirilməsi" mövzusunda  üçüncü ümumrespublika seminarı keçirildi. Tədbiri giriş sözü ilə açan TPİ-nin direktoru, professor Abdulla Mehrabov keçirilən seminarın  əhəmiyyəti haqqında məlumat verdi. Sonra   TPİ-nin Kurikulum Mərkəzinin koordinatoru, pedaqoji elmlər namizədi İlham  Cavadov çıxış edərək  şagird  nailiyyətlərinin qiymətləndirilməsinin strateji sahə kimi müəyyənləşdirilməsinin vacib olduğunu xüsusi qeyd etdi. 

Qiymətləndirmə ilə bağlı normativ-hüquqi sənədlər haqqında danışan İ.Cavadov həm də  Azərbaycan Respublikasında Ümumi Təhsilin Konsepsiyasında qiymətləndirmənin üç növü - beynəlxalq qiymətləndirmə, milli qiymətləndirmə və məktəbdaxili qiymətləndirmədən söz açdı. Qeyd edildi ki, beynəlxalq qiymətləndirmə hər üç  ildən bir seçmə yolla  15 yaşlı şagirdlərin təlim  göstəriciləri əsasında təhsilin vəziyyəti barədə  təsəvvür əldə etmək və perspektiv inkişaf istiqamətlərini proqnozlaşdırmaq  məqsədi ilə aparılır.

Milli qiymətləndirmə 4-5 ildən bir təhsil prosesinin təşkili, planlaşdırılması haqqında toplanmış məlumatlar vasitəsilə kurikulumun keyfiyyətini və  təhsil sistemində baş verən dəyişiklikləri dəyərləndirmək məqsədilə yerinə yetirilir.

 Məktəbdaxili qiymətləndirmə isə üç komponentdən ibarətdir ki, burada şagird irəliləyişlərinin monitorinqi - məktəb səviyyəsində, müəllimlər  və məktəb rəhbərliyi tərəfindən həyata keçirilir.

Nəhayət, təhsil pillələri  üzrə yekun qiymətləndirmə - mərkəzləşdirilmiş  qaydada aparılan buraxılış imtahanları  formasında həyata keçirilir.

Seminarda Təhsil Nazirliyinin nümayəndəsi Nəbi Mahmudov,  Kurikulum Mərkəzinin direktoru, pedaqoji elmlər namizədi Ənvər Abbasov, orta məktəb müəllimlərindən Kəbutər Səfərova (Bakı), Məhsəti Hacıyeva (Zaqatala) və başqalarının da çıxışları  oldu. Tədbir diskussiya şəklində başa çatdı. 

Şakir CƏFƏROV