Martın 17-də daha bir təhsil ocağında - paytaxtın S.Hacıyev adına 5 nömrəli orta məktəbində Valideyn-Müəllim Assosiasiyası təsis olundu. Bu münasibətlə keçirilmiş konfransda məktəbin 150-dək valideyni və Azərbaycan Milli VMA-dan, Ombudsman aparatından, digər məktəblərdən qonaqlar iştirak edirdilər.

Öncə məktəbin direktoru Nərminə Gündüzlü konfrans nümayəndələrini və qonaqları salamlayıb, yaradılmasına xeyli müddətdən bəri hazırlıq işləri gördükləri assosiasiyanın təsis konfransının baş tutması münasibəti ilə onları təbrik etdi.

VMA-nın yaradılması üzrə təşkilat komitəsinin sədri Günel Musəvi konfransı açıq elan etdikdən və Dövlət himni ifa olunduqdan sonra Azərbaycan Milli Valideyn-Müəllim Assosiasiyasının icraçı direktoru Təranə Şərifova  çıxış edərək təsis olunacaq qurumun əhəmiyyətindən, VMA-nın yaradılması istiqamətində son illər ölkəmizdə görülmüş işlərdən danışdı. Ölkənin 1000-dək məktəbində bu gün VMA-nın uğurla fəaliyyət göstərdiyini diqqətə çatdıran T.Şərifova onların qarşısında duran vəzifələrdən söz açdı, VMA-ların təhsil sistemində şəffaflığın yaradılmasına böyük töhfə verdiyini vurğuladı. O, paytaxtdakı 18 nömrəli məktəbdə 2003-cü ildə təsis olunmuş VMA-nın müsbət işini nümunə gətirərək, onun təşəbbüsü ilə məktəbdə təklif-tövsiyə qutusunun qoyulduğunu, həmin qutuya atılan təklif və tövsiyələrin diqqətlə araşdırılaraq nəzərə alındığını söylədi.

Sonra konfransın işçi heyəti seçildi, gündəliyi təsdiq olundu. Gündəlikdəki birinci məsələ - məktəbdə Valideyn-Müəllim Assosiasiyasının yaradılması, onun əsasnaməsinin təsdiqi barədə təşkilat komitəsinin sədri Günel Musəvi məlumat verdi.

Daha sonra məktəbin fəaliyyətindən, valideynlərlə əlaqəsindən bəhs edən təqdimat oldu. Konfrans iştirakçılarına VMA-nın əsasnaməsinin bəzi müddəaları, xüsusən də onun rəhbər orqanlarının, assosiasiya üzvlərinin vəzifələrini əks etdirən müddəaları təqdim edildi, müvafiq izahatlar verildi. Əsasnamə səsə qoyularaq qəbul edildi.

Konfransda habelə, məktəb VMA-nın rəhbər orqanları - 21 nəfərdən ibarət rəyasət heyəti, prezidenti və vitse-prezidenti, 5 nəfərlik nəzarət-təftiş komissiyası seçildi. Keçirilən açıq səsvermə nəticəsində məktəbin fəal valideynlərindən biri olan Azərbaycan Tibb Universiteti Əczaçılıq kafedrasının müdiri, professor Məhbubə Vəliyeva VMA-nın prezidenti, məktəbin tərbiyə işləri üzrə direktor müavini Zafta Şirinova vitse-prezidenti oldu. M.Vəliyeva konfransda çıxış edərək göstərilən etimada görə məktəbin rəhbərliyinə, müəllim və valideynlərə təşəkkürünü bildirdi, bu etimadı doğrultmağa, VMA-nı məktəbin bütün fəaliyyətində yaxından iştirak edən işçi bir quruma çevirməyə çalışacağını söylədi.

Konfransın qərarı ilə məktəbin fəal valideyni, tanınmış pedaqoq-alim, professor Yəhya Kərimova "Fəxri valideyn" adı verildi. Məktəbin direktoru N.Gündüzlü nəfis şəkildə hazırlanmış "Fəxri valideyn" diplomunu, təbrik ünvanını və xüsusi hədiyyəni valideynlər adından Yəhya Kərimova təqdim etdi. Y.Kərimovun məktəblə əlaqəsindən bəhs edən "Bizim Yəhya müəllim" adı altında fotogörüntülər nümayiş etdirildi.

Konfransda söz alan professor Y.Kərimov ona "Fəxri valideyn" adı verildiyinə görə məktəbin kollektivinə minnətdarlığını bildirdi, özünün də üzv olduğu VMA idarə heyətinin işi, gələcək fəaliyyəti, müasir dövrdə məktəblə əlaqə kontekstində valideynlərin öhdəsinə düşən vəzifələrlə bağlı fikir və qənaətlərini bölüşdü, tövsiyələrini verdi.

Məktəbin IX sinif şagirdi Eldanə Əliyeva çıxış edib VMA-nın yaradılmasını şagirdlərə göstərilən diqqət kimi dəyərləndirdi, məktəblə valideynlərin sıx əlaqəsinin son nəticədə onlara fayda verəcəyinə inamını ifadə etdi. 

Yusif ƏLİYEV