Təhsil Nazirliyindən aldığımız məlumata görə, bu ilin aprel-may aylarında nazirliyin təşkilatçılığı və Microsoft-Azərbaycan, İntel, AZEDUNET, Ultra, HP, MƏDƏD təşkilatlarının dəstəyi ilə "Elektron təhsil" ümumrespublika müsabiqəsi keçiriləcək.

"2008-2012-ci illərdə təhsil sisteminin informasiyalaşdırılması üzrə Dövlət Proqramı" çərçivəsində keçiriləcək müsabiqədə əsas məqsəd elektron tədris resurslarından, İnternet texnologiyalardan tədris prosesində istifadəni genişləndirmək, İnternetdən tədris məqsədləri üçün istifadənin yeni formalarını üzə çıxarmaq, tədris prosesində informasiya texnologiyalarından fəal istifadə edən müəllimləri həvəsləndirməkdən ibarətdir.

Müsabiqə "Təhsildə İnternet texnologiyaları" və "Müasir məktəbdə elektron tədris resursları" istiqamətləri üzrə təşkil olunur.

"Müasir məktəbdə elektron tədris resursları" istiqaməti üzrə müsabiqə üç ("Fənlərin tədrisində İT-dən istifadə üzrə ən yaxşı metodika", "İbtidai təhsil sistemində İT-dən istifadə üzrə ən yaxşı metodika", "Elektron tədris vəsaitlərindən istifadə edilməklə qurulan tədris prosesinin ən yaxşı modeli"), "Təhsildə İnternet texnologiyaları" istiqaməti üzrə müsabiqə isə iki ("Təhsildə İnternet resursları" və "Müəllimlərin bloqları") nominasiyanı əhatə edir.

Qaliblər peşəkar mütəxəssislərdən ibarət münsiflər heyəti tərəfindən iki mərhələdə keçiriləcək səsvermə yolu ilə müəyyənləşdiriləcək.

5 nominasiyanın hər biri üzrə qaliblərə noutbuklar, netbuklar və digər mükafatlar təqdim olunacaq.

Aprelin 6-da start götürmüş müsabiqəyə işlərin qəbulu 21 may tarixinədək davam edəcək. Müsabiqənin rəsmi İnternet səhifəsi www.musabiqe.edu.az ünvanında yerləşdirilmişdir.

Nizami MİRZƏ